Read Kissi O Kandɔɔ 2 Bible Online

O Kandɔɔ 2 - Kissi bible

O Kandɔɔ 2

¹Nuaa halataalaa, lɛŋnden a ɲɛm co lenin-ndon kpow n cuu cɔvɔɔ ni.

²Mɛɛ Hala cii baala kon tosa kpow, mó mal vallo, mó pɛngi o paale ŋɔmmɛwndɔlen coo.

³Mó dɔaw paale ŋɔmmɛwndɔle len duaa, mó siinguu len paale pɛngiaalen, kani ɲinkon o pɛngi a baala ndɔ cɔavaa ni.

⁴Nuaa Hala cɔw halataalaa a lɛŋnden o ceendo kandɔɔ ni. Tuma Mɛlɛka Hala cɔw halataalaa a lɛŋnden-ndo,

⁵yɔmndo ndu pilɛ bɛɛ ndóò vil-lɔ o lɛŋnden coo le, hali billo bɛɛ ndóò vil-lɔ le. Kani Mɛlɛka Hala ndóò tuisi vɔ piɔɔ o ceendo coo le. Vanaciee ve vɔ vɛlɛ le baalaa tosaa o lɛŋnden coo le.

⁶Fɔ mɛmma va fulaa lɛŋ-ndan ma va lɛŋnden pɔɔliaa ni.

⁷Mí Mɛlɛka Hala ɲɔla puuloo lɛŋ, mó cɔaw vanacieo a puulu kon. Mó hul ndu hoeyii yoomuɛi o tɛɛngun lamilinndon nin, mí vanaciee kon siŋnun ɲɛ yoomaa.

⁸O kon kɔɔli, mí Mɛlɛka Hala soli nakɔɔ o lɛŋnde Edɛn-nden nin, a ba paalen le can-ndo, mó mal vanapɔnɔ o cɔw kon-ndo o nakɔ kon nin.

⁹Mó soli yɔmnde súúlan kpow o nakɔ kon nin, í naŋ o tofaa mi ì yeela o dioo-e. Mó soli yɔm cindaa o nakɔɔ tɛɛn déŋ, mó soli vɛlɛ yɔm tosa mì vana siná dɛnɛ kɛndɔɔ a dɛnɛ vɔɔndo-o.

¹⁰Pee bɛndoo pum va fulaa Edɛn le nakɔ kon pɔɔliaa, mí pee kon piɔvan tɛiyon mún hiɔɔlu lon.

¹¹Tɛyii tasei diolan Pison, ndi balu lɛŋnde Havila len ni. Sianion co o lɛŋnde len nin taw,

¹²naŋɔɔ pila sianin mun naŋ ni. Bedeliɔmndo va vɛlɛ lon taw, a pow onikse.

¹³Tɛyii diinndɔɛi pee kon va Kihon ni. Ndi balu lɛŋnde Kus len kpow ni.

¹⁴Tɛyii yàándɔɛi va Tikre ni, ndi kei o lɛŋnde Asiri len a ba paalen le can-ndo ni. Tɛyii hiɔɔlundɔɛi pee kon va Efrate ni.

¹⁵Mí Mɛlɛka Hala cua vanapɔnɔɔ[3], mó mal ndu o nakɔɔ Edɛn nin le baalaa tosaa lenin a le nakɔ kalaa mandaa.

¹⁶Mí Mɛlɛka Hala hendul ndu tɔŋndo aa: «A nɔla mà de kɔmnde yɔm oo yɔm co o nakɔɔ ho nin,

¹⁷kɛ dia kɔmnde yɔm tosà mì vana sina dɛnɛ kɛndɔɔ a dɛnɛ vɔɔndo-o le. Kani paale n co ndu dio len, piɔ́mndo siŋnun ɲinkon mial nɔm.»

¹⁸Mí Mɛlɛka Hala dimi aa: «O niŋ mì vanapɔnɔɔ va ndu pilɛ le. I co ndu vana malaa toosial mò va maa ndu pila.»

¹⁹Mí Mɛlɛka Hala cɔaw visia yondoa a yowva súúlan kpow a puuloo, mó yaa nda o vanapɔnɔɔ lo le cɔu mɛɛ ndóò kenin nda diolan yɛ. Visi oo visi ndóò bɛnda mì ndóò nɔ diola vanapɔnɔɔ ndóò yɔngunin ndu lan.

²⁰O kon, mí vanacieo yɔngu visia cieeninnda, visia yondoa a yowva kpow diolan. Kɛ ndu pila ndóò sɔla vɔ vana malaa va maa ndu-o le.

²¹Le hee, mí Mɛlɛka Hala tuisi dialun vílɛ́in bɛndu-bɛndon vanapɔnɔɔ coo, mó hiawnun lɔan cundun. Mí Mɛlɛka soli ndu kpɛndɛi ipilɛ, mó mingi fonda kon peelu a visiei.

²²Mó toosiaa vanalanɔɔ a kpɛndɛi o soli ken vanapɔnɔɔ o n'dial-le, mó yaa ndu o vanapɔnɔɔ lo.

²³Mɛɛ vanapɔnɔɔ ce ndu, mó dimi aa: «Ɛ̀ɛ̀ hɛ́ɛ̀! Má cè nihau paa fula o paala nilan nin-ndo a dialii fula o dialun nun nin-nde! O nɔnin diolan aa vanalanɔɔ, kani o falun vanapɔnɔɔ nin o fula ni.»

²⁴Lelan, vanapɔnɔɔ faŋannin fuɲa ndɔ a kala ndɔ, mò holnun laa ndɔ, mà siŋnun dialii pilɛi nda ŋiɔn.

²⁵Vanapɔnɔɔ nda laa ndɔ á va tumnda fondo nda ŋiɔn kpow, kɛ vana-vana ve lasiɛmbu yɔŋ a o pilɔɔ le.