Read Kissi O Kandɔɔ 27 Bible Online

O Kandɔɔ 27 - Kissi bible

O Kandɔɔ 27

¹Mɛɛ Isaak yuuva taw, mí pundaa cal ndu o lahɔl, o ve lɛ cɔ le. Paale pilɛ, mó veelu Esau po ndɔ aa: «Esau.» Mí Esau cɛl aa: «Yòó!»

²Mó dimul ndu aa: «A ce nin mɛɛ ya yuuva yɛ. Nduyɛ, i sina paale piɔ́mndo co ya komal te.

³Lelan, cua ɲɛm nɔm ledooson: kpaasiaa a kɔɔn, mà kɔɛ doosulen yondoo nin, mà kɔ nuwvial-la ɲɛmahiloo.

⁴A hin pɛ a visin mun, a toosial-la mun mɛɛ ya yeema mun yɛ, a ke ya i de. I cii pɛ mun dio, i dɔw nɔm duaa telen pá ya vu.»

⁵Tuma Isaak va Esau po ndɔ sɔɛi ken dimullo-o, Rebeka va tueyɔɔ. Mɛɛ Esau faŋan dɔ́ɔ́ mó kɔa doosulen yondoo nin le fuɲa ndɔ ɲɛmahiloo cuuo,

⁶mí Rebeka dimul Yakɔb po ndɔ diinndɔɔ aa: «Yaŋ-ndɔ nilan Yakɔb. I tuei Isaak fuɲa niaa Esau bɛ nɔm dimullo aa:

⁷‹Kɔ hun a visi ledoosoo, mà hun toosial-la ɲɛmahilu yeelɛiyo, haliko mi de ndu, mì dɔw nɔm duaa Mɛlɛka o hɔl telen pá ya vu.›

⁸Lelan, nɔm Yakɔb, yaŋ nilan mà tuei, mà tosa ɲɛ ya co nɔm dimul-lo.

⁹Ɲaanun nɛɛ cɔlua naa co-a, mà kɔ bii cuinaa téndéa nda ŋiɔn, ma cuu ya nda, mì hun toosial fuɲa nɔm ɲɛdiaa yeelɛiyo a visin ndan mɛɛ o yeema yɛ.

¹⁰I cii pɛ toosiaa, a cua a yoo ndu mun, haliko mo de, mò dɔw nɔm duaa telen pá o vu.»

¹¹Mí Yakɔb mulul kala ndɔ aa: «Esau bɛ ni nɔ yiinde lekɔɔ taw, ya yɛ i nɔ iyiin lekɔɔ le.

¹²Te i tosa pɛ lende, mì Pua pilan ya, o co sina maa dúmbóó ya yeema le ndu yiiyo ni. O kon, o dow lɛnin ya duaa le, kɛ ya pila tuisinnin dangaa coo ni.»

¹³Mí kala ndɔ dimul ndu aa: «Te sɔɛi danga ni, mɛɛ danga kon va ya pila coo. Nɔm tosa vɔ i ya dimul nɔm-nde tuŋ. Kɔ mà kɔ cuu ya cɔlua ya dimul nɔm-nda.»

¹⁴Mí Yakɔb kɔa, mó kɔ bii cuinaa téndéa nda ŋiɔn, mó cuu kala ndɔ nda. Mí kala ndɔ yaw ɲɛdiaa yeelɛiyo a ɲɛmahilu kon mɛɛ Isaak ndóò yeema yɛ.

¹⁵Mó cua volɔɔla cuɛinannda kɛndɛ-kɛndɛla Esau lan, po ndɔ tasoo pɛɛn, la va cɛinin-ndan, mó vow Yakɔb po ndɔ diinndɔɔ lan.

¹⁶Mó toosiaa yáwla cuinaa kan, mó bayiaa ndu lan o bala lɔɔlan a o labolo.

¹⁷Mɛɛ o cii, mó yɔngu ndu ɲɛmahilu o toosiaa kon-ndo a buloo le fuɲa ndɔ yoo.

¹⁸Mí Yakɔb luɛi o fuɲa ndɔ lo, mó yil ndu aa: «Pua isɛ.» Mí Isaak fuɲa ndɔ cɛl aa: «Mbaa. Nɔm nɛ̀ɛ́-nɛ̀?»

¹⁹Mí Yakɔb dimul fuɲa ndɔ aa: «Ya Esau po nɔm tasoo ni. I hin a ɲɛ n dimul-la le nɔm yɔngoo-o. Lelan, a ce ndu. Cɔn ma cal, ma de ɲɛmahilu yondo ya cuu nɔm-ndo, haliko ma dɔw ya duaa.»

²⁰Mí Isaak ɲuna ndu aa: «Vɛɛ n looku yɛ dɔ́ɔ́ hau visio diyɔɔ nuaa cɔ́-cɔ́?» Mí Yakɔb muli aa: «Mɛlɛka, Hala nɔmndo soli ndu ya o hɔl nuaa ni.»

²¹Mí Isaak dimul Yakɔb aa: «Sɔɔnguu vɔ ya macɛlu po nuu, mì piilian nɔm le sinaa te Esau po ni n co lekɛ́ndɛi ni.»

²²Mí Yakɔb sɔɔnguu ndu ikɛi, mí Isaak piilian ndu, mó dimi aa: «Diomndo ndu, diom Yakɔb-o o co ni. Kɛ balan ndan, bala Esau lan ni.»

²³Le tùú yáwla cuinndan la va labayiaa o bala Yakɔb lan-ndo, mí la velan a bala Esau lan taw. Le hee, fuɲa ndɔ sina ndu le. Kɛ nduyɛ, telen pá mó dɔaw ndu duaa,

²⁴mó cɔɔlu ndu ɲuna aa: «Lekɛ́ndɛi nɔm co Esau po ni ni?» Mí Yakɔb muli aa: «Oi.»

²⁵Mí Isaak dimul ndu aa: «Mɛɛ ke ya ɲɛdiaa mì de ɲɛmahilu nɔm ledoosoo, haliko mi dɔw nɔm duaa.» Mí Yakɔb ke ndu ɲɛdiaa, mó dia. Mó ke ndu vɛlɛ mɔiyan, mó kol.

²⁶Mí Isaak fuɲa ndɔ dimul ndu aa: «Sɔɔnguu nanu mà kɔman ya, po nuu.»

²⁷Mí Yakɔb sɔɔnguu, mó kɔman ndu. Mɛɛ o kɔman ndu, mí Isaak tuɛi volɔɔla ndɔlan cun, mó dɔaw ndu duaa aa: «Po nuu co cunndo vana ca ko aa ciɛi Mɛlɛka dɔw duaa-e ni.

²⁸‹Màá Hala tuisul nɔm kɛmndan fulaa coocoo! Màá o tosa mì tɔlɔɔlan la naŋ o yondola nɔmndan nin! Màá sɔla baloo a mɔiyan taw o tɔlɔɔla nɔmndan!

²⁹Màá vanaa-mangalaa-isɔɔa tosal nɔm baalaa, mì vannda tundun nɔm o labɛngunin! Màá piɔlnun ladio puapilɛa nɔmnda coo, mì ndepilɛa nɔmnda baŋ vulan nɔm o labɛngunin! Vana-vana dɔw nɔm pɛ danga, dangaa co le ndu. Vana-vana dɔw nɔm pɛ duaa, duaa co le ndu.›»

³⁰Tuma Isaak cii Yakɔb duaa dɔvɔɔ-o, mí Yakɔb kɔannun. Mí Esau bɛ ndɔ fula doosulen yondoo nin.

³¹Mí ndu bɛɛ toosiaa ɲɛdiaa yeelɛiyo, mó cuu fuɲa ndɔ ndu. Mó dimul ndu aa: «Pua, má cè ɲɛdiaa a ɲɛmahilu ya toosial nɔm-ndo, cɔn mà de, haliko mi nɔm pila dɔw ya duaa.»

³²Mí Isaak ɲuna ndu aa: «Nɔm nɛ̀ɛ́-nɛ̀?» Mó muli aa: «Ya Esau ni, po nɔm tasoo pɛɛn.»

³³Mí kɔllo fula Isaak vúm, mó ɲiiya. Mó ɲunan aa: «Kɛ nɛ̀ɛ́ bii yɛ nin hoo visi ledoosoo mó toosial-la ndu, mó cuu ya? I cii nihau ɲɛmahiloo dio malan nɔm hun a o nɔmndo. I cii vana cuu ya ɲɛmahilu kon-ndo duaa dɔvɔɔ. Nduyɛ duaa kon feŋan ndɛnin ndu coo le.»

³⁴Mɛɛ Esau tuei sɔɛi fuɲa ndɔ dimi ken-nde, mó koŋul a mɔnɛi. Mó tɛɛlun fuɲa ndɔ aa: «Éé Pua, ya bɛɛ dɔ́w ya duaa.»

³⁵Mí Isaak mulul ndu aa: «Pɔmbɔ nɔm hin, mó hialu duaa nɔmndo a kɔlkalu vɔɔndo.»

³⁶Mí Esau dimi aa: «Mò va maa le diola o nɔ aa Yakɔb lan o yii ya dúmbú bɛmbɛ lediin ni? O kandɔɔ tasoo, mó puu fonda ni ikaasonyaa. Nua vɔ vɛlɛ mɛɛ o hɛlu duaa nuu ya o ba yɛ.» Mó ɲuna fuɲa ndɔ aa: «Pua, duaa oo duaa lo lɛhau nɔm o ba le ya le?»

³⁷Mí Isaak mulul ndu aa: «I cii ndu siinguu vana nɔm bɛndoo, mí siinguu vɛlɛ puapilɛa ndɔa kpow buɛyaa ndɔa. I dɔw ndu duaa le baloo a mɔiyan sɔlaa taw. Yɛɛ nɛ ya nɔla yɛ vɛlɛ mì tosa le nɔm Esau?»

³⁸Mí Esau ɲuna ndu aa: «Pua, mɛɛ duaa pilɔɔ ho koni co nɔm o ba ni? A yandi, ya bɛɛ dɔw ya duaa.» Mó kandu dɔ́ɔ́ caŋndo coocoo kpélén.

³⁹Mí Isaak fuɲa ndɔ dimul ndu aa: «Yaŋ-ndɔ nilan. Fonda n vanin icali-o, ɲɛ venin naŋɔɔ o lɛŋnde len coo le. Mɔ́m venin fula o halataala mò kɛsi makɛm le tɔlɔɔla nɔmndan nɛŋi le.

⁴⁰Mɔɛi nɔmnde tosanin ni ma va yoomu[13]. A siŋnunnin buɛi pɔmbɔ nɔm-ndo. Kɛ a venin icali o pumbu le. A cuiŋinin volɔɔla lusula o handunin nɔm o lebol-tan, mà soli bolle nɔmnden lebɛngu.»

⁴¹Mí Esau cua nɛyɔn Yakɔb-o le duaa ndɔ o hɛlu fuɲa nda o ba-o. Mó dimi o kɔl ndɔɔ nin aa: «Piɔ́m fuɲa naa bendu lɛ le, te o vi dɔ́ɔ́ pɛ, i koma dii Yakɔb pɔmbɔ ni.»

⁴²Mí vanndo dimul Rebeka maa Esau po ndɔ tase co kɔngɔlanndo le pɔmbɔ ndɔ diyɔɔ. Le hee, mí Rebeka veelu Yakɔb, po ndɔ diinndɔɔ, mó dimul ndu aa: «Esau bɛ nɔm co kɔngɔlanndo le nɔm diyɔɔ le màá ndɔɔ mingio.

⁴³Lelan, yaŋ ya nilan mà tosa mɛɛ ya co nɔm dimul-lɛ. Faŋan nanu few-few, mà kɔɛnnun Haran o Laban bom nɔm ndo.

⁴⁴Kɔ mà kɔ va pɔɔ lon háá mì bɛ nɔm ɲulul kɔl.

⁴⁵Te o koma ɲulul pɛ kɔl, mò pɔɛɛnun a ɲɛ n tosal ndu-o, i vem vanndo nɔm kɔɔli, la kɔ hun. I yeema mì la hɛlun ya niaa ŋiɔn kpow o paale pilɛlen coo le.»

⁴⁶Mí Rebeka kɔ dimul Isaak pɔnɔ ndɔ aa: «I co a mɔnɛi a dɛnɛ cuavaa Hitiia ha. Te Yakɔb bɛɛ yil pɛ lanɔɔ o lɛŋnden nden nin, mɛɛ piɔ́m nuu bendu lɛ le.»