Read Kissi O Kandɔɔ 28 Bible Online

O Kandɔɔ 28 - Kissi bible

O Kandɔɔ 28

¹O kon, mí Isaak veelu Yakɔb, mó dɔaw ndu duaa, mó dimul ndu aa: «Yìl vanalanɔ Kanannɔɔ o nɔ̀u le.

²Bɛɛndian mà kɔɛ Padan-Aram o Betuɛl fuɲa nɔm mama lo, fuɲaa kala nɔm pɛɛn, ma kɔ yil cua Laban bom nɔm-ndo o pilɛ o nɔ̀u.

³Màá Hala Vana-Kpaayaa-Kpow dɔw nɔm duaa, mò nɛŋi nɔm ipulu, mì polale nɔmnden le kui háá mà siŋnun fuɲa-mamaa le vanaa-mangalaa-isɔɔa súúlan taw!

⁴Màá o tuisi nɔm duaa o dɔw Pua Abraham-ndo coo niaa cuavaa nɔmaa imamaa, haliko mi lɛŋnde n co len icali nin o sumialle len le siŋnun lɛŋnde nɔm! Kani Abraham fuɲa nɔm mama Hala yɔngu len ni.»

⁵Nuaa Isaak vem Yakɔb po ndɔ Padan-Aram ni. O kon, mí Yakɔb can, mó kɔa o Laban bom ndɔ lo, po Betuɛl Aramiinɔ-o pɛɛn. Laban kon yɔŋnun yemaa Rebeka ni, kalaa Yakɔb nda Esau pɛɛn.

⁶Mí Esau ca maa Isaak dɔw Yakɔb duaa mó viam ndu Padan-Aram le kɔlan lanɔɔ yilɔɔ. Mó sina vɛlɛ maa telen fuɲa nda va Yakɔb congɔnndo-o, mó kuuna ndu aa o yil vanalanɔ Kanannɔɔ o nɔu le.

⁷Mí Yakɔb bii sɔɛi fuɲa ndɔ nda kala ndɔ-e, mó kɔa Padan-Aram.

⁸Mí Esau sina dɔ́ɔ́ maa vanlaandua Kanannda hɛnan fuɲa ndɔ le.

⁹Le hee, mó kɔa o Ismaɛl lo, po Abraham-ndo pɛɛn, mó kɔ yil Mahalat cua ndɔ, yemaa Nebayɔt o nɔ̀u, mó handu vɛlɛ kon o laandaa celeŋaa ndóò nɔ nin-nda coo.

¹⁰Mí Yakɔb faŋan Bɛɛr-Seba, mó kɔa Haran.

¹¹Mɛɛ paalen le del, mó cua powvo le bollen yambɔɔ lecoo, le lɔan o fonda ɲumndan ma tul ndu kon-ndo.

¹²Mó sɔl lɔan. O lɔma sɔlaama man nin, mó ca ɲɔɔ maa lakpáákpáá[14] cɔnɔnndo lɛŋ mo kɔ tiiya bollen o halataala di. Mɛlɛkaa Hala-a va helɔɔ a tolɔɔ o kpáákpáála lan.

¹³Mɛlɛka pila va isisi ndu Yakɔb ikɛi, mó dimul ndu aa: «Ya co Mɛlɛka ni, Hala Abraham fuɲa nɔm mamaa a Hala Isaak-o. Lɛŋnde n co len ihini coo len, i co nɔm len yɔngu niaa cuavaa nɔmaa imamaa.

¹⁴Polale nɔmnden le kuinin maa cundoo lɛŋ. Le tiwnin o tàndà oo tàndà nin: a ba paalen le can-ndo, a ba le del-lo, a ba too a á ba luaŋ-ndo. Yungulan o lɛŋnden coo kpow la sɔlanin duaa nɔm a polale nɔmnden o ba bɛngu.

¹⁵Tofa vɔ, ya pila co nɔm ikɛi. Fonda oo fonda n kɔɛ pɛ, i mandanin nɔm. I minginin nɔm vɛlɛ o lɛŋnden nden nin. I melnin nɔm te háá mì peelu kpema ya cuel nɔm-ndo.»

¹⁶Mɛɛ Yakɔb tendu, mó dimi aa: «Yàá Mɛlɛka co o fondaa ho! Ya i ve ndi sina nuaa le.»

¹⁷Mí siòònde bii ndu, mó dimi aa: «Fondaa ho co bɔɔ fonda kaamaa bɛndu. Nanu ndu kɛsɛ-kɛsɛ Cɛi-Hala-o co nanu, dio halataalaa pɛɛn.»

¹⁸Diimandɔɔ idiiyo púŋ, mó can, mó cua pow ndóò yambu kon bollen coo-o, mó siinguu ndu pow sálàá, mó baŋ ndu lɛŋ, mó tala cuɛiyan lecoo.

¹⁹Mó ke fonda kon diolan aa Betɛl (kon co dimio ni aa «Cɛi-Hala-o»). Paandu, nuaa fonda kon ndóò nɔ diolan ni aa Lus.

²⁰O kon, mó cua ciɛɔ́n o Mɛlɛka lo, mó dimi aa: «Te Hala lo pɛ ya ikɛi, te o kanda ya pɛ o kela ya co hoo-o nin, mò yɔngu ya ɲɛdiaa a ɲɛ cuɛinanndo,

²¹mì muungu kɛndia fuɲa nuu o ibuŋ, mɛɛ Mɛlɛka siŋnunnin Hala nuu.

²²Pow ya baŋ hoo mì siinguu ndu pow sálàá-o, o siŋnunnin Cɛi-Hala-o, mì va ndu o-tɔ́ndɔɔ yɔngoo o ɲɛm o co va ya yɔngoo-on kpow nin.»