Read Kissi O Kandɔɔ 29 Bible Online

O Kandɔɔ 29 - Kissi bible

O Kandɔɔ 29

¹Mí Yakɔb faŋan nɛɛ o lɔ́l-la, mó bii nɛiyo le kɔlan o lɛŋii co a ba paalen le can-nde-e nin.

²Paale pilɛ, mó saalun soon kólaa yondoo nin. O soon kólaa kon vannda ndáà hun cɔlua ndaa koesio ni. Saa a cuinnda kundalan layàá a va ihini o soon kólaa kon ikɛi. A pow yɛ́ndɛ́ bɛndoo pum ndáà kinda soon kalaa ni.

³Te ndáà cuungiaa pɛ cɔlua le nda koesio, ndáà faŋa pow yɛ́ndɛ́ bɛndu kon o soondo sondoo. Te ndáà cii nda pɛ koesi, ndáà mingi powvo pimbulu o sondoo.

⁴Mí Yakɔb ɲuna vanaa mandaa n'cɔlua o komal lon-nda aa: «Caaŋaa niaa, kuɛɛ niaa fula yɛ?» Mí vanaa mandaa n'cɔlua mulul ndu aa: «Haran naa n fula ni.»

⁵O kon, mó ɲuna nda aa: «La sina pá Laban, po imama Nahɔr-o?» Má muli aa: «Oi, n sina ndu.»

⁶Mó ɲuna vɛlɛ nda aa: «Vɛ̀ɛ̀ o co kɛndɛ lon?» Má mulul ndu aa: «O co kɛndɛ. Má cè bɛɛ Rasɛl cua ndɔ hunɔɔ a cɔlua!»

⁷Mí Yakɔb dimul nda aa: «Paalen le co vɔ bɔɔ lekala ŋama-ŋama, o co telen vana cuungiaa n'cɔlu le co vɔ hoo le. O naŋ mì la koesi nda, mì la mingi nda diólan.»

⁸Má mulul ndu aa: «N bɛnda vɔ mì n tosa ɲɛ-ɲɛ le, fɔ mì cɔlua cuu cuungian nanu malan naa n faŋa powvo o soon kólaa sondoo le nda koesio.»

⁹Tuma nda va suukan kon-ndo kínɛí, mí Rasɛl hun a cɔlua fuɲa ndɔ-a: saa a cuinnda. Kani ndu Rasɛl bɛɛ, vana mandaa n'cɔloo o va ni.

¹⁰Mɛɛ Yakɔb ce Rasɛl cua Laban bom ndɔ-o a cɔlua bom ndɔa kan, mó sɔɔnguu, mó faŋa powvo o soon kólaa kon sondoo, mó koesi saa a cuinaa bom ndɔ-a.

¹¹Mɛɛ o cii nda koesi, mó kɔman Rasɛl, mó piɔndi a caŋndo.

¹²Mó dimul Rasɛl maa toongoo Laban fuɲa ndɔ o co ni, maa ndu co po Rebeka yemaa Laban-ndo ni. Mí Rasɛl ɲaanun cɔ́-cɔ́, mó kɔ dimul fuɲa ndɔ.

¹³Mɛɛ Laban bɛɛ tuei dɔ́ɔ́ maa Yakɔb po Rebeka yema ndɔ-o hin ni, mó kɔa ndu diomɔɔ a kiltan. Mɛɛ o ce ndu, mó kɔ kɔman ndu, mó kɔa a ndu o ndu lo cɛinin. Mí Yakɔb downun ndu kona, mó cɔm ndu ɲɛ-ɲɛ tosan.

¹⁴Mí Laban dimul ndu aa: «Mɛɛ a caa hunɔɔ, vanayɛi nii kpeekpei n co ni.» Mí Yakɔb cii paangei yɛngɛsɛɛ o Laban bom ndɔ lo.

¹⁵Paale pilɛ, mí Laban dimul Yakɔb aa: «Bàà le co n co vanayɛi nii-o mà tosal-la vallo fondo? O bɛnda lende le. Lelan, dimul-la mɛɛ n yeema mì va nɔm salaa yɛ.»

¹⁶Nduyɛ, Laban ndóò nɔ cuaambɔa laandua nda ŋiɔn. O tasoo diolan aa Lea, o diinndɔɔ Rasɛl.

¹⁷Lea ndóò naŋ tiŋ hɔlla, kɛ Rasɛl ndóò caa simndan, ndóò naŋ vɛlɛ hɔlla taw.

¹⁸Mí Yakɔb luɛi Rasɛl lehɔl, mó dimul Laban aa: «Taa kɛsi pɛ Rasɛl cua nɔm ya o ba o nɔ̀u, i tosal nɔm vallo vɔsilan laŋɔmmɛw.»

¹⁹Mí Laban mulul ndu aa: «I sɔɔ laba. O co fisa le ya mò cal nɔm o ba o nɔ̀u a ndu kɛsio vanapɔnɔ celen o ba. Lelan, va ya o bɛngu coo.»

²⁰Mí Yakɔb tosa vallo vɔsilan laŋɔmmɛw le Rasɛl kɛsio o nɔ̀u ndu o ba. Kɛ mó ca vɔsila ŋɔmmɛwla lan maa palɛi bingi, kani ndóò kaola bɔɔ Rasɛl.

²¹Mɛɛ vɔsila lan la cuu, mó dimul Laban aa: «Yɔngu ya niko laa nuu, kani i cii vallo tosa le ndu. I yeema mì n kandu nɔ naa.»

²²Mí Laban tosa kafoo, mó veelu vanaa va o tàndà kon nin-nda kpow.

²³Mɛɛ ɲumndan ma tol, mó cua Lea, cua ndɔ tasoo, mó kɔa a ndu o Yakɔb lo cɛinin. Mí Yakɔb sina ndu vanalanɔ.

²⁴Mí Laban cua Silpa, buɛi ndɔ laandoo, mó yɔngu Lea cua ndɔ.

²⁵Mɛɛ paalen le sɛ, mí Yakɔb sina maa o co nda Rasɛl te lɔl te, kɛ nda Lea ni. Mó kɔ ɲuna Laban bom ndɔ aa: «Dɛnɛ yɛɛ n tosal-lɛ ya hoo? O co le Rasɛl te ya tosal nɔm vallo le? Le yɛɛ nɛ n hui yɛ ya?»

²⁶Mí Laban mulul ndu aa: «Naa naa o naa lo, cuaambɔɔ cel nɔu bɛ ndɔ tase le.

²⁷Lelan, siow niko palɛi ŋɔmmɛwve niaa Lea. Taa yeema pɛ mà sɔla vɛlɛ Rasɛl, mɛɛ tosal-la vɛlɛ vallo vɔsilan laŋɔmmɛw.»

²⁸Mí Yakɔb cɛl, mó siow palɛi ŋɔmmɛvii ken a Lea. Mí Laban kɛsi vɛlɛ Rasɛl cua ndɔ o nɔ̀u ndu o ba.

²⁹Mó yɔngu Rasɛl buɛi ndɔ laandoo, diolan aa Bilha.

³⁰Mí Yakɔb sina vɛlɛ Rasɛl vanalanɔ, mó kaola ndu taw. Ndu ndóò hiow kaola a Lea. Mó tosal vɛlɛ Laban vallo vɔsilan laŋɔmmɛw.

³¹Mɛɛ Mɛlɛka ce maa Yakɔb kaola Lea taw le, mó nɛŋi ndu ipulu, mí Lea vialu cuawva. Kɛ Rasɛl ndu ve vana vialaa le.

³²Mí Lea cua folio, mó vialu hɔ́ɔ́ piaandoo. Mó ke ndu diolan aa Rubɛn (kon co dimio ni aa «Má cè poo!»). Mó dimi aa: «Mɛlɛka ce mɔnɛi co ya biyɔɔ-e. I ce maa pɔnɔ nuu co ya nin kaola.»

³³O kon kɔɔli, mó cua vɛlɛ folio, mó vialu vɛlɛ hɔ́ɔ́ piaandoo. Mó dimi aa: «Mɛlɛka tuei maa háá hau, i sɔla vɔ kaola le, lelan o ke ya vɛlɛ hɔ́ɔ́ ho ni.» Mó ke ndu diolan aa Simeɔn (kon co dimio ni aa «O tuei»).

³⁴Mó cua vɛlɛ folio, mó vialu hɔ́ɔ́ piaandoo. Mó dimi aa: «O laan ndu, pɔnɔ nuu co ya holnɔn. Kani i vilul ndu hɔ́aa piaandua nda yáá.» Lelan, mó ke ndu diolan aa Levii (velanndo pila diola lan la velan a dimio ni aa: O holnun).

³⁵Mó cua vɛlɛ folio, mó vialu hɔ́ɔ́ piaandoo. Mó dimi aa: «O laan ndu, i candunin Mɛlɛka. Lelan o ke ndu diolan ni aa Yuda (velanndo pila diola lan la velan a dimio ni aa: O candu).» O kon kɔɔli, mo pɛngi violɔɔ.