Read Kissi O Kandɔɔ 3 Bible Online

O Kandɔɔ 3 - Kissi bible

O Kandɔɔ 3

¹Kɛwvo ndóò hiow visia yondoa Mɛlɛka Hala cɔw-va kpow kɔlkalu vɔɔndo ni. Mó ɲuna vanalanɔɔ aa: «Bàà nuaa Hala dimul niaa ni aa niaa dia kɔmnde yɔmii co o nakɔɔ ho nin-nde le?»

²Mí vanalanɔɔ mulul ndu aa: «Ɛ-ɛ, n nɔla mì n de kɔmnde yɔmii co o nakɔɔ nin-nde kpow,

³kɛ le kɔmnde yɔm co hoo o nakɔɔ tɛɛn déŋ-ndo, nuaa Hala dimul naa ni aa: ‹La dia le, hali pilanndo bɛɛ la pilan te, yɔŋii niaa sɔla piɔ́mndo.›»

⁴Mí kɛwvo dimul vanalanɔɔ aa: «La sɔ́là piɔ́m te.

⁵Kɛ Hala sinà ɲɛkɛndɛi maa te la de dɔ́ɔ́ pɛ kɔmnde yɔm kon, hɔlta niaalan la kumbin, la siŋnun maa ndu Hala[4], la sina dɔ́ɔ́ pɛɛngulan ɲɛ kɛndɔɔ a ɲɛ vɔɔndo tɛɛn.»

⁶Mí vanalanɔɔ ca maa yɔm kon naŋ taw o dioo a o tofaa, maa yeemɛi bii vana le kɔmnde ndɔlen dioo le dɛnɛ sinaa bɛndoo sɔlaa. O kon, mó kiandu komɔɔ o pilɛ, mó dia. Mó yɔngu vɛlɛ pɔnɔ ndɔ, o nda va latulu-o, mí ndu bɛɛ dia.

⁷O kon, mí hɔlta ndalan la kumbin nda ŋiɔn kpow, má cannan maa tumnda fondo nda va ni. Le hee, má sɔandu pei voosoei, má yiwnun ndi o caŋ maa lakola.

⁸Mɛɛ nda tuei diom Mɛlɛka Hala-o balɔɔ o nakɔɔ nin o hoeyii fɛ́-fɛ́i paale delɛi nin, má kɔ vionnun ndu o yɔmnde nin.

⁹Mí Mɛlɛka Hala veelu vanapɔnɔɔ, mó ɲuna ndu aa: «Kuɛɛ nɛ n co yɛ?»

¹⁰Mí vanapɔnɔɔ mulul ndu aa: «Tueyɔɔ ya tuei diom nɔmndo o nakɔɔ nin ni, mí siòònde bii ya, mí viannun, kani tum fondo ya co ni.»

¹¹Mí Mɛlɛka Hala ɲuna ndu aa: «Nɛ̀ɛ́ cɔm yɛ nɔm maa tum fondo n co ni? Mò va maa kɔmnde yɔm ya kuuna nɔm le dioo len n de ni?»

¹²Mí vanapɔnɔɔ mulul ndu aa: «Vanalanɔ n yɔngu ya le vaa vana ni malaa-o, ndu yɔngu ya kɔmnde yɔm kon ni, mí dia.»

¹³Mí Mɛlɛka Hala ɲuna vanalanɔɔ aa: «Dɛnɛ yɛɛ n tosa yɛ hoo?» Mí cuaa muli aa: «Kɛwvo pálá ya nuaa ni mí dia kɔmnde yɔm kon.»

¹⁴O kon, mí Mɛlɛka Hala dimul kɛwvo aa: «Le dɛnɛ n tosa hoo-o, dangaa vanin nɔm coo visia pɔmbɔa a visia bɛndua kpow tɛɛn, a vanin sasɔnndo o dembe nɔmndo coo le kɔlan. Le fɛɛn a fɛɛn, cundoo n vanin dioo ni.

¹⁵I lueinin vɔvanndo niaa tɛɛn niaa vanalanɔɔ, vɔvanndo vanin cuavaa ndɔa a cuavaa nɔmnda tɛɛn. Po vanalanɔɔ pialnin nɔm bollen, mì nɔm lɔva ndu bɛngu tííndííyo.»

¹⁶Mí Mɛlɛka dimul vanalanɔɔ aa: «I tuisinin nɔm sangalan coo taw telen n vanin a folio-o. Mɛɛ ma diw lahɔl malan n vialu. Yeemɛi biinin nɔm le pɔnɔ nɔm hɛnanndo, kɛ ndu vanin nɔm bollen ni.»

¹⁷Mí Mɛlɛka dimul niko vanapɔnɔɔ aa: «Le tùú n cɛl sɔɛi laa nɔm-nde, má dia kɔmnde yɔm ya kuuna nɔm le dioo-o len-ndo, i dɔw lɛŋnden danga le yɔŋ vɔɔn nɔm kon. Háá mì yoomu nɔmndo cuu o ceendo coo, fɔ mà sanga sangaa pila malan n sɔla ɲɛdiaa nɔmndo lɛŋ.

¹⁸Lɛŋnden le solulnin nɔm yɔɔn a hɛɛnndon. Ɲɛ vanin vulɔɔ o ciɛɔn nin-ndo n vanin dioo ni.

¹⁹Lɔ́ɔ́ pá ma sɔlá nin ɲɛdiaa nɔmndo, fɔ ma kelun lalle o itendu. A lonin lende háá mà muungu lɛŋ, nɛɛ n fula-a. Kani a puuloo n cɔwnun ni, lelan o puuloo nin n co vɛlɛ muungu ni.»

²⁰Mí vanapɔnɔɔ ke laa ndɔ diolan aa Hava (kon co dimio ni aa «Yoomoo»), kani ndu yɔŋnun kala-mama vanndacieea kpow ni.

²¹Mí Mɛlɛka Hala cuɛi vanapɔnɔɔ nda laa ndɔ a yáwla visia.

²²Mó dimi aa: «Mɛɛ vanacieo siŋnun maa naa le dɛnɛ kɛndɔɔ a dɛnɛ vɔɔndo sinaa yɛ, naa bɛɛ n kùùnan ndu le tiiyaa o yɔm cindaa. Kani te o de pɛ kɔmnde yɔm kon, o co vannɔn yoomu le fɛɛn a fɛɛn.»

²³Le hee, mí Mɛlɛka Hala toaw vanacieo, mó soli ndu o nakɔɔ Edɛn nin, haliko mo kɔ va vallo tosaa o lɛŋnde o fula o puulu ndɔɔ nin-nden coo.

²⁴Mɛɛ Mɛlɛka soli ndu o nakɔɔ nin lende, mó handu mɛlɛkaa kanda ɲɛm Hala-on-nda kpalillo o nakɔ kon sondoo a mɔɔn leyinndon o laba. Má va mun hiŋndo le nɛi yɔm cindaa kon cumullo.