Read Kissi O Kandɔɔ 38 Bible Online

O Kandɔɔ 38 - Kissi bible

O Kandɔɔ 38

¹O telen pilɛ kon bɛngu, mí Yuda faŋan puapilɛa ndɔa ikɛi, mó kɔ calnun Adulam langbanɔɔ pum o bɛngu coo, diolan Hira.

²Mó saalun cuaambɔle laandule pilɛ lon, fuɲa ndɔ diolan Sua, Kanannɔɔ o va ni. Mó yil ndu o nɔ̀u nin, mó sina ndu vanalanɔ.

³Mí cuaambɔɔ cua folio, mó vilul ndu hɔ́ɔ́ piaandoo, mí Yuda ke ndu diolan aa Ɛr.

⁴Mó cua vɛlɛ folio, mó vialu hɔ́ɔ́ piaandoo, mó ke ndu diolan aa Onan.

⁵Mó vialu vɛlɛ po yàándɔɔ, mó ke ndu diolan aa Sela. Tuma laa ndɔ velu po yàándɔ kon-ndo, Yuda va Kesib.

⁶Mí Yuda yil lanɔɔ le Ɛr, po ndɔ tasoo pɛɛn. Lanɔ kon diolan aa Tamar.

⁷Mí Ɛr, po tase Yuda kon siŋnun vana vɔɔndo Mɛlɛka o hɔl, mí ndu Mɛlɛka cii yoomu ndɔɔ.

⁸O kon mí Yuda dimul Onan po ndɔ aa: «A sina ɲɛ n bɛnda le tosaa le bɛ nɔm-ndo: luɛi bɔla nɔm coo mì la va niaa ndu, haliko ma vilul bɛ nɔm cuawva.»

⁹Onan ndóò sina maa cuavaa o va violɔɔ-a ndáà venin cuavaa ndɔ le. Lelan, lɔ́ɔ́-lɔ́ɔ̀ ndáà bɔŋa pɛ nda bɔla ndɔ o kpelemɔɔsaa nin, ndóò cuiŋi mɛmma ivanapɔnɔyama ndɔan lɛŋ, yɔŋii ndóò vilul bɛ ndɔ vi-o cuawva.

¹⁰Mí dɛnɛ ndɔ kon nɛinun Mɛlɛka. Ndu bɛɛ mí Mɛlɛka cii yoomu ndɔɔ.

¹¹O kon mí Yuda dimul Tamar aa: «Le tùú pɔnɔ nɔm vi-o, kɔ pɔɔ mà kɔ cal fuɲa nɔm o bɛngu coo háá mì Sela sul le lanɔɔ cuaa.» Kani nuaa ndu Yuda o va dimio o kɔl ndɔɔ nin ni aa: «O bɛnda lɛ mi hoo ndu vi vɛlɛ maa bɛndaa ndɔa le.» O kon, mí Tamar muungu o fuɲa ndɔ lo, mó kɔ va lon.

¹²Telen vilɛi o kon kɔɔli, mí lanɔɔ Yuda, cua Sua-o vu. Mɛɛ biisi kon cuu, mí Yuda kɔa Timna nda Hira caan ndɔ fula Adulam-ndo, le vanaa va saa ndɔa yiinde kilio-a tofaa.

¹³Mí vanndo kɔ dimul Tamar aa: «Má cè fuɲaa pɔnɔ nɔm kɔlan Timna le saa ndɔa yiinde kilio!»

¹⁴O kon mí Tamar solin volɔɔla ivii pɔnɔlan lekɔɔ, mó kuumbun kola vaan-vaando o hɔl, vanáà sina lɛ ndu le. Mó kɔ cal o nɛi-lábándoo Enaim ciee-lekɔɔ, o nɛi Timna-o coo. Kani mó ca maa Sela sul le lanɔɔ cuaa, kɛ vana ke ndu ndu mò siŋnun pɔnɔ ndɔ le.

¹⁵Mɛɛ Yuda komal Tamar icali lon, o ce ko aa vanalanɔ suundɛiyo ni. Kani hɔlla va ndu a kumbaa a kola vaan-vaando.

¹⁶Mó sɔɔnguu ndu ikɛi o nɛiyo dangalaa, mó dimul ndu aa: «I yeema mì n va naa ŋiɔn.» Kani ndóò sina maa lanɔɔ po ndɔɔ le. Mí cuaa ɲuna ndu aa: «Taa va pɛ a ya, yɛɛ nɛ n co yɛ ya ke?»

¹⁷Mí Yuda mulul ndu aa: «Mì bii cuin téndóó o cɔlua niaa tɛɛn mì cuu nɔm.» Mí Tamar dimi aa: «I cɛl, kɛ nduyɛ yɔngu ya pɔɔ landei pum telen pá mà hin a cuin kon.»

¹⁸Mí Yuda ɲuna ndu aa: «Landii yɛɛ n yeema yɛ mì yɔngu nɔm?» Mí Tamar muli aa: «Yɔngu tampɔn co hoo nɔm o labolo-o, ma yɔngu vɛlɛ yɔlɔn nɔmndon a tinda nɔmndo.» Mí Yuda yɔngu ndu ɲɛm mun, mó va a ndu, mí folio luɛi nda tɛɛn o bɔŋa kon.

¹⁹Mí Tamar can, mó kɔannun. Mó kɔ soli kola vaan-vaan va ndu lekɔɔ-o, mó mingin volɔɔla ivii pɔnɔla ndɔlan lekɔɔ.

²⁰Mí Yuda viam caan ndɔ fula kon Adulam-ndo le kɔlan cua kon cuin téndóó yɔngoo a le ɲɛm o yɔngu ndu o landei nin-ndon baŋaa. Kɛ o seelun cua kalaa le.

²¹Mí Hira ɲuna pilacieea lon aa: «Kuɛɛ nɛ cua suundɛi va hoo o nɛi-lábándoo Enaim coo-o co yɛ?» Mí vanaa kan mulul ndu aa: «Kabi bɛɛ vanalanɔ suundɛi cel-lɔ o fonda kon te.»

²²Mó muungu, mó kɔ dimul Yuda aa: «I seelun ndu le, mí pilacieaa kan ndon a dimul-la bɛɛ aa vanalanɔ suundɛi cel-lɔ o fonda kon te.»

²³O kon, mí Yuda mulul ndu aa: «Mɛɛ ɲɛm ya yɔngu ndu landei-yon va ndu o ba. Naa pila n tosa mì vannda mam naa le. Halikpe ya i yɔngu cuin téndóó ho mí nɔm kɔa a ndu, kɛ a seelun ndu le.»

²⁴Paangon mún yáá o kon kɔɔli, má hun dimul Yuda aa: «Tamar, lanɔɔ po nɔm suunda, mó cua folio o suunda kon nin.» Mí Yuda dimi aa: «A soli ndu mà lom ndu kpúlúká!»

²⁵Tuma nda va ndu solio o bɛ́ɛ̀-o, mó yɔŋ yoongoo o fuɲaa pɔnɔ ndɔ lo, mó dimi aa: «Vana nɔ ɲɔɔn mun-ndo ke ya folio ni. Nɔm pila mɛɛndan-ndɔ ma sina vana nɔ tampɔnndo ho, yɔlɔn mun a tindaa ho-o.»

²⁶Mí Yuda sina maa ɲɛla ndɔlan ni, mó dimi aa: «Ndu hiow sandei a ya. O tosa dɛnɔɔ ho fondo le, le tùú ya yɔngu ndu Sela po ni mo va pɔnɔ ndɔ loo o tosa hee ni.» O sina lɛ ndu vanalanɔ o kon kɔɔli le.

²⁷Mɛɛ telen ndɔ vialaa tiiya, mí pulei biŋin ndu, má ca maa pɛndua va ndu o dembe ni.

²⁸Telen o va o sanga vialaa nin-ndo, mí pɛndunɔɔ pilɔɔ soli baa, mí sokonɔ-vialaa bii ndu ba kon, mó yii kɛi siaŋaa lon, mó dimi aa: «Hoo fɔlɔn co fula.»

²⁹Kɛ mó mingi ba ndɔɔ, mí caan ndɔɔ pilɔɔ ndu vialun. O kon, mí sokonɔ-vialaa deŋi aa: «Nɔm buli nɛiyo ni má hun.» Má ke ndu diolan aa Perɛs.

³⁰O kon kɔɔli, mí o lo kɔɔli-o bɛɛ vialun, kɛi siaŋaa va ndu o yiyaa o ba. Má ke ndu diolan aa Serak.