Read Kissi O Kandɔɔ 4 Bible Online

O Kandɔɔ 4 - Kissi bible

O Kandɔɔ 4

¹Mɛɛ vanapɔnɔɔ siná Hava laa ndɔ vanalanɔ, mí Hava cua folio, mó vialu Kain, mó dimi aa: «I sɔla hɔ́ɔ́ piaandoo Mɛlɛka o ba bɛngu.»

²Mó mulin vɛlɛ, mó vialu Abɛl, pɔmbɔɔ Kain pɛɛn. Mí Abɛl siŋnun vana mandaa n'cɔloo, mí Kain ndu siŋnun vana váà.

³Telen pum hiovɔɔ, mí Kain hun a ɲɛm o kow o ciɛi ndɔɛi nin-ndon, mó solul Mɛlɛka sálàá.

⁴Mí Abɛl ndu hun a cɔlua tasea cɔlua ndɔa kom-nda, mó solul Mɛlɛka sálàá a visin bɛɛŋun macuɛin kɛndɛ-kɛndɔn. Mí Mɛlɛka cɛl Abɛl a sálà ndɔɔ.

⁵Kɛ mó kɛɛ Kain a sálà ndɔɔ. Le hee, mí Kain tambu kɔl taw-taw, mó suuma suumaa pila.

⁶Mí Mɛlɛka ɲuna ndu aa: «Le yɛɛ n tambu yɛ kɔl ma va suumaa?

⁷Taa caa pɛ kelaa, a cuanin bollen, kɛ taa cee kelaa le, hakio co nɔm o dio maa ɲɛ-vueinan, o yeema mò tiw nɔm ba, kɛ nɔm, a bɛnda ma nɔla haki kalaa.»

⁸Mí Kain dimul Abɛl pɔmbɔ ndɔ aa: «N fula mì n kɔɛ yondoo nin.» Mɛɛ nda fula má kɔa yondoo nin, mí Kain del Abɛl pɔmbɔ ndɔ coo, mó dii ndu.

⁹O kon, mí Mɛlɛka ɲuna Kain aa: «Kuɛɛ nɛ Abɛl pɔmbɔ nɔm co yɛ?» Mí Kain mulul ndu aa: «I sínà le. Mò va maa ya co kpalilnɔ pɔmbɔ nuu ni.»

¹⁰Mí Mɛlɛka dimul ndu aa: «Dɛnɛ yɛɛ n tosa yɛ hoo? I co kooma pɔmbɔ nɔmndan tueyɔɔ koŋullo lɛŋ.

¹¹Lelan, kandɔɔ hau, dangaa co nɔm coo o lɛŋnde kooma pɔmbɔ nɔmma n soli-an ma luɛi nin-nden coo.

¹²Mɛ̀ɛ́-mɛ̀ɛ́ n tosa nin vallo lecoo, le lueilul-lɛnin nɔm tɔnɔ ndɔɔ le. A ve lɛnin icali o pumbú le. Le fɛɛn a fɛɛn nin, vana kelanndo n vanin o lɛŋnden coo ni.»

¹³Mí Kain dimul Mɛlɛka aa: «Yɔŋ vɔɔn ya tosa hoo-o hiow ya mayoomu.

¹⁴Mɛɛ n cii ya hau tovɔɔ ma faŋa ya o lɛŋnde ya va vàá len coo yɛ, i co faŋan nɔm o hɔl mì kɔ vionnun levil lándán. Kani i nɔ lɛ pumbú calaa le, i siŋnun vana kelanndo o lɛŋnden coo. Le hee, vana-vana saalun ya pɛ, o dii ya.»

¹⁵Kɛ mí Mɛlɛka mulul ndu aa: «Vana diinin nɔm te, kani vana-vana dii nɔm Kain pɛ, fɔ mi vanndacieea vi a ŋɔmmɛw malan màá nɔmndo cuu mingi o vana kon ndo.» Mí Mɛlɛka handu Kain pondalen le vaa teengen a vanaa tɔ̀a, haliko vana-vana nda bɔŋan pɛ, o díì ndu le.

¹⁶O kon, mí Kain faŋan Mɛlɛka o hɔl, mó kɔ calnun o lɛŋnde Nɔd len nin, lɛŋnde len le va lɛŋnde Edɛn-nden a ba paalen le can-ndo.

¹⁷Mɛɛ Kain siná laa ndɔ vanalanɔ, mó cua folio, mó vialu Henɔk. Mí Kain kandu kobio tangullo, mó ke kobi kon diola po ndɔɔ aa Henɔk.

¹⁸Henɔk kon yɔŋnun fuɲaa Irad ni, mí Irad vialu Mehuyaɛl, mí Mehuyaɛl vialu Metusaɛl, mí Metusaɛl vialu Lemɛk.

¹⁹Mí Lemɛk yil laandua nda ŋiɔn, o tasoo diolan aa Ada, o diinndɔɔ aa Silla.

²⁰Mí Ada vialu Yabal. Yabal kon yɔŋnun fuɲa-mama vanaa mandaa n'cɔlua lɔ̀l o cɛila-kolala-toandaalan bɛngu-a ni.

²¹Má vilul Yabal pɔmbɔɔ diolan Yubal. Ndu yɔŋnun fuɲa-mama vanaa lɔaa labangaa a vanaa hɔŋaa masɛ̀ŋnda ni.

²²Mí Silla bɛɛ vialu Tubal-Kain. Mó siŋnun sumnɔ kɛndɛ-kɛndɔɔ pila, ndóò cɔaw ɲɛm valin luɛyan tɛmtɛmndon a daɲan a á cilinndon ni. Yema laandu Tubal-Kain-ndo yɔŋnun Naama ni.

²³Mí Lemɛk dimul laandaa ndɔa aa: «Ada niaa Silla, la tuei-yɔ ɲɛ ya co niaa dimul-lo. Laandaa Lemɛk-a, la yaŋ-ndɔ nilan. I dii vanapɔnɔɔ o pilɛ le bolin nuu, mí dii cɛlɛkpɔɔ o pilɛ le funkpula nilan.

²⁴Te vanndacieea nda ŋɔmmɛw a nɔ le vuo le màá Kain-ndo mingio ni, le ya Lemɛk, fɔ mi vannda vi belaŋɔmmɛw a à ŋɔmmɛw malan màá nuu cuu mingi.»

²⁵Mí Adam sina vɛlɛ laa ndɔ vanalanɔ, mó vialu hɔ́ɔ́ piaandoo. Mí Hava ke ndu diolan aa Sɛt, kani mó dimi aa: «Hala ke ya vɛlɛ po celen o fonda Abɛl-lo, o Kain dii-o.»

²⁶Mí Sɛt bɛɛ vialu poo, mó ke ndu diolan aa Enɔs. Boondii ken kínɛí vanndacieea kandu Hala veeloo aa Mɛlɛka o piɛilen nin ni.