Read Kissi O Kandɔɔ 42 Bible Online

O Kandɔɔ 42 - Kissi bible

O Kandɔɔ 42

¹Mɛɛ Yakɔb tuei maa a co baloo pisio Esipte, mó dimul poaa ndɔa aa: «Le yɛɛ niaa co yɛ calle he mì la va nuannanndo ho vellaa-velle nuaa?

²I tuei maa baloo co pisio Esipte. Lelan, la kɔ lon mì la kɔ pindu naa ndu yɔŋii naa n vu a yiaan man.»

³Mí bɛndaa Yosɛf-a n'van tɔ́ a kɔa Esipte le baloo piondɔɔ.

⁴Kɛ Yakɔb fuɲa nda cɛl mì Bɛnyamɛn, pɔmbɔɔ Yosɛf kɔɛ nda kɔɔli le. Kani nuaa ndóò dimi o kɔl ndɔɔ nin ni aa: «Yɔŋii dɛnɛ vɔɔn yɔŋnun ndu.»

⁵Mí poaa Israɛl-la tiiya Esipte vanaa celeŋaa va kɔlan lon-nda tɛɛn, kani yima fofolan ma va o lɛŋnde Kanaan-nden nin taw.

⁶Yosɛf va lɛŋnde Esipte len kpow bollen ni. Ndóò nɔ hɔlten o balo nda va cuavaa lelɛŋnda pisio o ba-o coo ni. Mí bɛndaa ndɔa hun baŋ vulan ndu o labɛngunin, má tundu bolle lɛŋ.

⁷Mɛɛ Yosɛf ce nda, mó sina maa bɛndaa ndɔa ni. Kɛ mó tosa maa o sina nda le, mó soaa o nda lo a hɔlta kalalan. Mó ɲuna nda aa: «Lɛŋnde kuɛɛ niaa fula yɛ?» Má mulul ndu aa: «O lɛŋnde Kanaan-nden nin naa n fula ni mí n hun ɲɛdiaa piondɔɔ nanu.»

⁸Mí Yosɛf sina bɛndaa ndɔa, kɛ nda sina ndu le.

⁹O kon mó loonun a lɔma ndóò sɔl lɔ́ɔ́ kon a nda o kɔɔ-an. Mó dimul nda aa: «Suansuaanda niaa co ni. Le fonda lɛŋnde naalen le nɔ mayoomu loo sinaa niaa hin nanu ni.»

¹⁰Mí bɛndaa ndɔa muli aa: «O co vanaa vaa lende le naa n co le, vana bɛndoo. Le baloo piondɔɔ kínɛí naa buɛyaa nɔmnda n hin ni.

¹¹Naa kpow fuɲa pilɔɔ velu naa ni, vanaa toɲaa naa n co ni, n co n'suansuaan te.»

¹²Mí Yosɛf dimi aa: «Còòlan fúú. La hin ma hunaa le fonda lɛŋnde naalen le nɔ mayoomu loo mɛɛndanndo.»

¹³Má dimul Yosɛf aa: «Òó vana bɛndoo! Naa buɛyaa nɔmnda, n va n'van tɔ́ a vanaa ŋiɔn, naa fuɲa pilɔɔ velu-a pɛɛn. O lɛŋnde Kanaan-nden nin naa n co icali ni. Pɔmbɔ naa lumndo lo fuɲa naa ikɛi lon, pɔmbɔ naa pilɔɔ co lɛ le.»

¹⁴Kɛ mí Yosɛf dimul nda aa: «Le hee kpeekpei ya dimi ni maa suansuaanda niaa co ni.

¹⁵O hee coo ya co toɲa niaa sina ni: te Faraɔnnɔɔ co yoomu, la feŋan nanu le fɔ mì pɔmbɔ niaa lumndo hin.

¹⁶La viom vana pilɛ o niaa tɛɛn, mò kɔ hun a ndu, mì a tɔ̀a co lo nanu-a va pɔɔ o biyɔɔ nin háá mì sina te toɲaa niaa dimi ni. Te o co kon te, mɛɛ te Faraɔnnɔɔ co yoomu, suansuaanda niaa co ni.»

¹⁷O kon mí Yosɛf mal nda o kaasoo nɛɛ pilɛ le palɛi ndii yáá.

¹⁸O paale yàándɔlen, mó dimul nda aa: «La tosa ɲɛ ya dimul niaa-o mì la baŋa yoomu niaa, kani vana ke Hala bɛɛlen-ndo ya co ni.

¹⁹Te vanaa toɲaa niaa co ni, mɛɛ puapilɛ niaa pilɛ lo nanu o biyɔɔ nin, o cɛi niaa co hoo nin o kaasoo-o, mì niaa tɔ̀a yoo yungula niaala yiaan ma co coo lan baloo.

²⁰Kɛ mì la kɔ muungu nanu a pɔmbɔ niaa lumndo. Kon cɔmnin ni maa toɲaa niaa dimi ni. O kon la sɔla lɛnin piɔ́m te.» Má cɛl le tosaa lende.

²¹Má dimulan vellaa-velle aa: «Le dɛnɛ naa n tosal puapilɛ naa lɔ́ɔ́ kon-ndo dɛnɛ palaa ho tol naa coo nuaa ni. Kani n ce ndu o mɔnɛi nin, mó cɛɛŋun naa o lani tei, n yeŋ nilan o cɛɛŋɔn ndɔ kon te. Naa bɛɛ lelan sangaa ho tol naa coo nuaa ni.»

²²Mí Rubɛn dimul nda aa: «I dimul niaa sɔɛi he lɔ́ɔ́ kon aa: ‹La tosa dɛnɛ kɔlvesɛi vaa nuaa mì la cua hakio a poombɔɔ ho le.› Kɛ la tui ya diom te. Bàà piɔ́m o sɔla-o co naa nihau mingulɔnndo mì n va sangaa nuaa ni.»

²³A ve sina maa Yosɛf co sɔɛi ndɛi tueyɔɔ le, kani vana hivia isɔɔ Yosɛf ndóò cua le suukanndo nda ndaa ni.

²⁴Mí Yosɛf faŋan nda ikɛi, mó kɔannun lándán, mó kɔ caŋ hiko-hiko. Mó muungu vɛlɛ nda ikɛi, má suukan nda ndaa. Mó bii Simeɔn, mó mal ndu o kaasoo nda o hɔl.

²⁵Mó dimul vannda le maalon peiyo o bɔlɔla ndalan nin cá-cá, le volin vana-vana mingio vowvo o bɔlɔ ndɔɔ nin a le nda ɲɛdiaa yɔngoo le keiyo dioo nɛi-tɛɛn. Mà tosal nda lende.

²⁶Má handu malun mun o sofɛlɛa ndaa coo, má kɔannun.

²⁷Mɛɛ nda tiiya nɛɛ ndáà yeema le lɔan-nda, mí vana pilɛ nda tɛɛn kumbi bɔlɔ ndɔɔ le sofɛlɛ ndɔɔ billo yɔngoo le dioo, mó ca volin ndɔn o bɔlɔɔ sondoo.

²⁸Mó dimul puapilɛa ndɔa aa: «A mingul-la volin nun, má cè mun o bɔlɔ nuu nin.» O kon mí kɔltan la fula nda, mí siòònde bii nda taw, má va ɲuunianndo vellaa-velle aa: «Yɛɛ nɛ Hala tosal-lɛ naa hoo?»

²⁹Mɛɛ nda muungu o Yakɔb fuɲa nda lo o lɛŋnde Kanaan-nden nin, má downun ndu kona, má cɔm ndu ɲɛ-ɲɛ yɔŋnun nda kpede.

³⁰Má dimul ndu aa: «Langbanɔ co bollen o lɛŋnde len nin-ndo, mó soaa o naa lo a hɔlta kalalan taw. Mó dimi aa suansuaanda naa n co ni.

³¹Mí n dimul ndu aa: Vanaa toɲaa naa n co ni, kabi bɛɛ n tosa lesuansuaan te.

³²Naa fuɲa pilɔɔ velu-a, n'van tɔ́ a vanaa ŋiɔn naa n co ni, puapilɛ naa pilɔɔ co lɛ le, pɔmbɔ naa lumndo lo fuɲa naa ikɛi o lɛŋnde Kanaan-nden nin.

³³O kon mí langbanɔ kon dimul naa aa: ‹Ɲɛ ya co tosa le sinaa maa vanaa toɲaa niaa co ni-o co hoo ni: la mɛi vana pilɛ ya o ba nanu, mì niaa tɔ̀a cua ɲɛm niaa nɔ makoo-on, mì la yoo yungula niaala yiaan ma co coo lan.

³⁴La kɔɛ pɛ, la kɔ hun a pɔmbɔ niaa lumndo, haliko mi sina te la co n'suansuaan te, te vanaa toɲaa niaa co ni. La hin pɛ a ndu, i mel niaa bɛ niaa[19], la kelan vɛlɛ a kɔlɲuloo o lɛŋnden nden nin.›»

³⁵Mɛɛ nda pɛi bɔlɔla ndalan, mí vana-vana ca bɔlɔ pɔmbɔɔ a volin ndɔn lenin o bɔlɔ ndɔɔ nin. Mɛɛ nda ce bɔlɔla pɔmbɔla lan a volin ndan lenin nda fuɲa nda-aa, mí siòònde bii nda kpow.

³⁶Mí Yakɔb dimul nda aa: «La yeema mì de poaa niaa tɔnɔ le? Yosɛf co lɛ le, Simeɔn bɛɛ lo o lekáá. Bàà la yeema vɛlɛ mì la puu ya Bɛnyamɛn o ba? Nduyɛ, ya niaa co mɔnɛi lueiyo nuaa ni.»

³⁷Mí Rubɛn dimul fuɲa ndɔ aa: «Sɔɔ Bɛnyamɛn ya o ba, i co nɔm ndu mingul nanu. Te i cuu nɔm ndu le, a diw poaa niaa ŋiɔnda.»

³⁸Mí Yakɔb muli aa: «I kɛɛ, i co niaa po nuu yɔngu mì la kɔɛ a ndu le. Kani bɛ ndɔ vi, ndu pilɛ kpé lo ya nin o ba ni. Te i yɔngu niaa ndu pɛ mì ɲɛ kei ndu yɔŋnɔn nɛi-tɛɛn, mɛɛ ya co nin o yuuvɛiyo nuaa yɛ, la yɛɛ ya ciee-piɔ́m o mɔnɛi nin.»