Read Kissi O Kandɔɔ 45 Bible Online

O Kandɔɔ 45 - Kissi bible

O Kandɔɔ 45

¹Mɛɛ Yosɛf ndóò nɔla lɛ kɔl ndɔɔ saa le kɛɔ caŋndo vanaa va lon-nda o hɔl te yɛ, mó dimi aa: «La soli vannda kpow.» Vana-vana celen lo ndu ikɛi cɛinin ndon te. O kon, mó cɔmnun bɛndaa ndɔa maa ndu co Yosɛf ni.

²Kɛ mɛɛ o va sɔɛi a caŋndo taw, mí Esiptea tuɛi. Mí sɔɛi ken tiiya o cɛi lemasa Faraɔnnɔɔ nin di.

³Mí Yosɛf dimul bɛndaa ndɔa aa: «Ya co Yosɛf ni. Vɛ̀ɛ̀ fuɲa nuu co vɔ yoomu?» Kɛ bako bɛɛ bɛndaa ndɔa nɔla sɔɛi le ndu mulullo le, kani mí siòònde bii nda a ndu taw.

⁴Mí Yosɛf dimul nda aa: «La sɔɔnguu ya ikɛi.» Má sɔɔnguu ndu ikɛi. Mó dimul nda aa: «Ya co Yosɛf ni, pɔmbɔ niaa niaa pisi má hun a ndu Esipte nanu-o pɛɛn.

⁵Kɛ nduyɛ sisa, mɔnɛi bii niaa le, kɔlta hiilun niaa nin le pisi niaa pisi ya má hun a ya o cɛlen nin nanu-o le. Kani le yoomu niaa baŋaa Hala hivi ya niaa laci nanu ni.

⁶Bau, o co nihau vɔsilan tan tiɔn, yima fofolan ma co o lɛŋnden nin, o lo vɛlɛ vɔsilan laŋuɛɛnu, vana veenin iciɛɛ le, vana kuwnin vɛlɛ ɲɛ-ɲɛ le.

⁷Hala vem ya niaa laci nanu le niaa malaa ni, haliko mi la lo yoomu o lɛŋnden nden coo, mì la sɔla baŋan kɔndɔfillo.

⁸Lelan, o co niaa le cuu ya nanu le, kɛ Hala pila cuu ya ni. O siinguu ya fuɲaa Faraɔnnɔɔ, vana bɛndoo le cɛi ndɔɔ a simlacinɔɔ le lɛŋnde Esipte len kpow.

⁹Le hee, la muungu cɔ́-cɔ́ fuɲa nuu o ibuŋ, mì la kɔ dimul ndu aa: ‹Yosɛf po nɔm yil nɔm, Hala siinguu ndu vana bɛndoo o lɛŋnde Esipte len kpow coo. Lelan, aa nɔm cɔn mà kɔɛ o ndu lo cɔ́-cɔ́.

¹⁰A kɔɛ pɛ, a kɔ va icali o tàndàá Kosɛn nin, le vaa ndu Yosɛf macɛlu niaa cuavaa nɔmnda, cuavaa-imamaa nɔmnda, saa, cuinnda a navaa nɔmnda, a ɲɛ-ɲɛ co le nɔm.

¹¹A co va lon mò toosiaa kpekula nɔmndan, yɔŋii bolofaa niaa cuu, mì la lo bala fondo niaa yungu nɔmndo a ɲɛ-ɲɛ co nɔm o ba. Kani o lo vɔ vɛlɛ vɔsilan tan ŋuɛɛnu malan yima fofolan man ma cuu.›

¹²Niaa pila co cɔu ciŋ, Bɛnyamɛn pɔmbɔ ni bɛɛ co cɔu maa ya Yosɛf co sɔɛi o niaa lo ni.

¹³La downun fuɲa nuu kona, mì la cɔm ndu ɲɛ kɛndɛ ya cal coo Esipte nanu-o. La kɔ tɛɛsial ndu ɲɛ-ɲɛ niaa ce nanu. Handɔɔ o kon coo, mì la hin a ndu nanu cɔ́-cɔ́.»

¹⁴O kon kɔɔli, mó kafalan Bɛnyamɛn pɔmbɔ ndɔ o labolo, mí nda ŋiɔn kpow a caŋ fúkpàà-fùkpàà a kafalannda lende.

¹⁵Mó kɔɔmian vɛlɛ bɛndaa ndɔa tɔ̀a a caŋndo. Fɔ o kon kɔɔli bɛndaa ndɔa nɔla sɔɛi o ndu lo ni.

¹⁶Mí tɔ́ɔ́ tiw o cɛi lemasa Faraɔnnɔɔ nin maa bɛndaa Yosɛf-a hin. Mí ɲɔɔ hɛnan Faraɔnnɔɔ a vanaa bɛndua kpow.

¹⁷Mó dimul Yosɛf aa: «Dimul bɛndaa nɔmnda aa a handu volɔɔlan o cɔlua ndaa coo, mà muungu Kanaan,

¹⁸mà kɔ cua fuɲa nda a yungula ndalan. Mà muungu o ya lo nanu, mì yɔngu nda lɛŋii ɲɔɔn naŋ coo-e, mì yɔngu vɛlɛ nda ɲɛm kɛndɛn co o lɛŋnden nden nin-ndon.

¹⁹Dimul nda vɛlɛ maa taa va pɛ muungoo Kanaan, a cua ɲɛla ɲaanannda pɔmbɔla cɔlua nan-ndan o lɛŋnde Esipte len nin le kɔlan hunɔɔ a cuavaa ndaa a á laandaa ndaa lenin. Mà cua vɛlɛ fuɲa nda, mà hin a ndu nanu.

²⁰Mɔnɛi bii nda le ɲɛm nda mɛinin lon-ndon te, kani ɲɛ-ɲɛ co ɲɛ kɛndɔɔ o lɛŋnde Esipte len nin, o vanin le nda.»

²¹Mí poaa Israɛl-la tosa mɛɛ nda dimul nda yɛ. Mí Yosɛf yɔngu nda ɲɛla ɲaanannda soa nan-ndan mɛɛ Faraɔnnɔɔ ndóò dimi yɛ. Mó yɔngu nda vɛlɛ ɲɛm dian le keiyo dioo nɛi-tɛɛn.

²²Mó yɔngu vana-vana volɔɔla cuɛinanndan le mangalanndo. Kɛ Bɛnyamɛn ndu, mó yɔngu ndu volin latámán kɛmɛ leyáá a domalan tan ŋuɛɛnu le mangalanndo.

²³Mó siiluu sofɛlɛa tɔ́ ɲɛm kɛndɛ-kɛndɛn co o lɛŋnde Esipte len nin-ndon, mó yɔŋ fuɲa ndɔ. Mó siiluu vɛlɛ sofɛlɛa laandua tɔ́ maalon, buloo a ɲɛm dian celen, mó yɔŋ fuɲa ndɔ le keiyo dioo nɛi-tɛɛn telen o vanin kɔlan Esipte-o.

²⁴Mó congun bɛndaa ndɔa, mó mal nda kɔlan, mó sila nda kpéŋ-kpéŋ maa a kei sɛɛngian nɛi-tɛɛn te.

²⁵Má faŋan Esipte, má muungu Kanaan o Yakɔb fuɲa nda lo.

²⁶Má tɛɛngul ndu yoongu kon aa: «Yosɛf po nɔm co vɔ yoomu. Ndu co vana bɛndoo o lɛŋnde Esipte len kpow coo ni.» Kɛ Yakɔb kuŋ te o soli le, kani o ve sɔɛi ndɛi laalan maa toɲa le.

²⁷Má dimul ndu ɲɛ-ɲɛ Yosɛf soo. Mɛɛ o ce ɲɛla ɲaanannda soa nan-ndan, la Yosɛf yɔŋ le kɔlan a ndu Yakɔb lenin-ndan, mí ɲɔɔ tosalan ndu mɛ̀ɛ́-mɛ̀ɛ́ vanndo tendul nuaa yɛ.

²⁸O kon, mí Israɛl dimi aa: «Ɲuna co lɛ ya o sondo le, i sina nihau maa Yosɛf po ni co yoomu. Fɔ mì kɔ del ndu hɔlten malan ya vu.»