Read Kissi O Kandɔɔ 49 Bible Online

O Kandɔɔ 49 - Kissi bible

O Kandɔɔ 49

¹Mí Yakɔb veelu poaa ndɔa, mó dimul nda aa: «La cuungian nɛɛ pilɛ mì cɔm niaa ɲɛ yɔŋnunnin niaa siɔdii laci-o.

²Poaa Yakɔb-a, la diinun nɛɛ pilɛ mì la yaŋ nilan ɲɛkɛndɛi. La yaŋ nilan mì la tuei ɲɛ Israɛl fuɲa niaa co dimi-o.

³Rubɛn, nɔm co po ni tasoo ni, hɔ́ɔ́ tase ya velu telen yáà nɔ yoomuan-ndo-o, telen kpaayaa va ya o n'dial taw-vo. Nɔm hiow tɔ́ɔ́ a yoomuan ni.

⁴Kɛ ŋol bɛɛ mì hiiyo fula nɔm maa mamɛn, fonda tasoo ve lɛnin le nɔm te. Kani a nɔɔliaa kpele fuɲa nɔm-ndo, a hel o ya lo kpele má tosa mààlan.

⁵Simeɔn nda Levii, pɔmbɔɔ a bɛndoo nda co ni. Kɛ má cɛlan nda ŋiɔn le dɛnnda vɔɔnndan tosaa.

⁶Màá i sɔɔnguu nda bɛɛ ikɛi o dúmbú nda yii-o coo le! Màá i yiyan bɛɛ a cuungian ndaa o kɔɔ le! Kani a diw vanndacieea a kɔl nda tuwvo, má kili navaa tovaa tɔndikɔɔlion a kɔl nda fulaa.

⁷Dangaa co o kɔl nda tuw nɔ iɲíí loo a o kela nda kɔlvesɛi bɛndoo coo. I co nda sɛŋi o lɛŋnde Yakɔb len nin, mì saŋ nda o lɛŋnde Israɛl-ten nin fásàn.

⁸Nɔm Yuda yɛ, nɔm puapilɛa nɔmnda candunin ni. A nangunin yaamɔaa nɔmnda mundulan a yoomuma nɔmndan. Poaa fuɲa nɔm-nda baŋnin vulan nɔm o labɛngunin.

⁹A toɲa, Yuda, yàlà téndóó n co ni. Po nuu, a fula pɛlɛlen má hun biɔmnun maa yàlà. Vana ca nɔm ko o biamnanndo a yàlàá kpeekpei ni. Nɛ̀ɛ́-nɛ̀ nɔla yɛ mò cua nɔm isisi lon?

¹⁰Tinda lemasaa feŋannin Yuda o ba le. Tinda kon lonin o polale ndɔlen coo háá mì vana nɔ tinda kon kpeekpei-yo hin. Vana vanaa-mangalaa-isɔɔa kpow vanin bɛɛlen keo-vo pɛɛn.

¹¹O baanin sofɛlɛ ndɔɔ o rɛsɛn tumndo, mò baa sofɛlɛ cuaa o lɛwve ipilɛ. O tɔaanin doma ndɔɔ o mɔiyan nin, mò cɛkɛla doma ndɔ bɛndoo o mɛmma n'rɛsɛnndan nin.

¹²Hɔlta ndɔlan la hiow divɔɔ a mɔima siaŋan. Ciŋun ndɔn hiow diondɔɔ a nɔnɔan.

¹³Calta Sabulɔn-ndan la vanin o mɛmma ihɛllan demullo, o nɔnin fonda dɛ̀ndɛ̀lan la sim-ndo o kɔngɔ ndɔɔ coo. Lɛŋnde ndɔlen le pɛngɛlannin háá Sidɔn.

¹⁴Isakar ndu, maa sofɛlɛ o co ni, o nɔ dialun kalan taw. O co maa sofɛlɛ co ihini o hèélan tan tiɔn tɛɛn-ndo.

¹⁵O canin maa pɛngio naŋ, maa lɛŋnden le naŋ. O siɛndinin congoo le volɔɔlan cuaa, o cɛlnin vali lepɔtɔllo.

¹⁶Dan ndu, ndu vanin vana kialaa n'yamaa o polale ndɔlen coo ni maa polama tɔ̀an Israɛl.

¹⁷Màá Dan va maa kɛw o nɛi, mɛɛ hɔ̀ɔ̀lɔ́ɔ̀ va o pemalen coo nuaa yɛ. Mò lɔva sow pelei, mì vana ɲaanan sow fula mò del macali!

¹⁸Éé Mɛlɛka! Nɔm ya tiindan ni. Baŋa ya yandi.

¹⁹Kad ndu, vannda kunda bɛndoo a delnin ndu coo, kɛ o mululunnin nda mo tow nda.

²⁰Asɛr ndu nɔnin ɲɛdiaa kɛndɔɔ taw, o yɔngunin ɲɛdiaa bɛnda le balo lemasaa-o.

²¹Nɛftali ndu vanin maa kial connun nila ɲulu-o, o koam cuavaa kɛndɛ-kɛndɛa-o.

²²Yosɛf ndu co maa tɛyii yɔm soli kɔmnden taw-vo, tɛyii yɔm co o tɔalaa o peo kɔngɔ-o. Lɛvun ndɔn hel pɛ sɔlɔbɔlɔɔ, n piasa o kungaa coo.

²³Vanaa vuaa n'kɔɔa tiŋ Yosɛf, a nuwviaa ndu sɛɛngianndo lekɔɔ. A co ndu vuuo a labɛɛla a kɔɔn ndan.

²⁴Kɛ kɔɛi ndɔɛi biŋin te, congúla ndɔlan la nɔ vɔ yoomuan, la co vɔ leemu-leemu. Kɛɛmasɔla Hala-Kpaaya Yakɔb-o le. Ndu co vana mandaa n'cɔloo a pow kpova Israɛl tiindan-ndo ni.

²⁵A toɲa, Hala fuɲa nɔm-ndo sɔɔnguunin nɔm ikɛi. Vana-Kpaayaa-Kpow dɔawnin nɔm duaa. Màá o tuisul nɔm piɔɔ fulaa coocoo, mò ke nɔm mɛnndan fulaa lɛŋ! Màá o ke nɔm cuawva a cɔlua taw-taw!

²⁶Duaa fuɲa nɔm-ndo hiow naŋɔɔ a duaa pembun masindɔn. Duaa kon hiow naŋɔɔ a ɲɛm vaan vana sɔla o pembun paandu-paandon coo-on. Màá duaa kon va Yosɛf o lebol mò va ndu o itendu! Ndu co vana bɛndu puapilɛa ndɔa ni.

²⁷Bɛnyamɛn ndu, maa tun yondo iyola o co ni. Idii púŋ o dia ɲɛ o bii-o ni. Icɔl vɛlɛ, o piɔw ɲɛm o hɛlu o cɔwvo-on.»

²⁸Haa kpow yɔŋnun vanaa lebolla o polama tɔ́ a mamiɔmma Israɛlla coo ni. Nuaa fuɲa nda soo o nda lo mó dɔaw nda duaa ni. Mí poaa ndɔa kpede, vana-vana sɔla duaa o ndɔɔ.

²⁹O mɛɛlulan niko, mí Yakɔb sila nda aa: «I co vu mì dem fuɲaa niaa mamaa vi-a ciee-piɔ́m. I vi pɛ, la kɔ kumbu ya vanaa nia banaa ikɛi o buululan nin, o yondo Efrɔn Hitiinɔ-o nin.

³⁰Buulula co lan Mak-pela lan pɛɛn, Mamre o hɔl-ndɔ, o lɛŋnde Kanaan-nden nin. Buulula Abraham pendu a yondo kon latulu Efrɔn Hitiinɔ o ba le vanvílɛ́iya kumbɔɔ lenin-ndan.

³¹Lon nda kumbu Abraham nda Sara laa ndɔ ni. Lon koni nda kumbu vɛlɛ Isaak nda Rebeka laa ndɔ ni. Lon ya kumbu vɛlɛ Lea laa ni ni.

³²Piondɔɔ Abraham pendu yondo kon a buulula lan Hitiia o ba ni.»

³³Mɛɛ Yakɔb cii poaa ndɔa silalan yɔngu kpede, mó mingi pelun ndɔn heelu o kpele, mó malnun kɔl, mó diam fuɲaa ndɔa vi-a.