Read Kissi 2Samiɛl 12 Bible Online

2Samiɛl 12 - Kissi bible

2Samiɛl 12

¹O kon, mí Mɛlɛka viam Natan[23] o David lo, mó kɔ dimul ndu aa: «Langbaa pum va o kobio pum nin nda ŋiɔn, o pilɛ vana bolofaa, o pilɔɔ vana bala fondoo.

²Vana bolofaa ndóò nɔ nawva, saa a cuinnda taw-taw.

³Vana bala fondoo ndu ndóò nɔ ɲɛ-ɲɛ celen te, fɔ saa laandu téndé ndóò pendu-o. Mó va ndu ɲɛdiaa yɔngoo, mó sul ndu o ba nda cuaambɔa ndɔa latulu. Ɲɛdiaa pilɔɔ ndáà dia nda saa laandu kon ni, o taala kólaa pilɔɔ nin ndáà kol nda ndu ni, ndu o ibuŋ ndóò lɔl ni. O va ndu o ba maa cua ndɔ.

⁴Paale pum, mí miallo komal vana bolofaa. O bii cɔlu kɛ́-kɛ̀ o navaa ndɔa, saa ndɔa a cuinaa ndɔa tɛɛn le mial hin o ndu lo-o ɲɛdiaa yewlul te, mó kɔ bii saa laandu téndé pilɛ vana bala fondo kon ndóò nɔ-o, mó yaw ndu le mial hin kon ndu o ba-o.»

⁵O kon mí David tuulu kɔl taw-taw a vana bolofaa kon, mó dimul Natan aa: «Te Mɛlɛka co yoomu, vana tosa dɛnɛ kon-ndo bɛnda mò sɔla piɔ́mndo!

⁶O bɛnda mò yɔngu saa nda hiɔɔlu le saa pilɛ kon salaa. Kani o tosa dɛnɛ iɲíí le.»

⁷Mí Natan dimul David aa: «Nɔm kpeekpei co vana tosa dɛnɛ kon-ndo ni. Mɛlɛka Hala Israɛlla dimi aa: ‹Ya pɔla nɔm ni mí siinguu nɔm masaa Israɛlla coo. Ya baŋa nɔm Saul o ba ni.

⁸Ya yɔngu nɔm yungu vana nɔm bɛndoo ni, mí sɔaa laandaa ndɔa nɔm o ba, mí suili nɔm masaa Israɛlla a Yudaa coo. Te kon kpow ndóò tiw nɔm te, yáà tiwba mì yáà cɔɔlu vɛlɛ nɔm ɲɛm celen hendul lecoo.

⁹Kɛ le yɛɛ n pɛɛsa yɛ sɔɛi nii, ya Mɛlɛka, má tosa ɲɛ hɛnan ya loo? Nɔm vɔngul Uri Hitiinɔ o mɔɛi cɔwve bɛngu ni, má cua laa ndɔ, má siinguu ndu laa nɔm. Nɔm tosa ni mí Amɔnnda dii ndu o cɔwvo.

¹⁰Lelan, kandɔɔ sisa, mɔɛi cɔwve feŋan ndɛnin lɔ́ɔ́-lɔ́ɔ̀ o nɔm ndo cɛinin te, kani a pɛɛsa ya, má mulin vɛlɛ má cua lanɔɔ Uri Hitiinɔ, má siinguu ndu laa nɔm.

¹¹Yaŋ nilan mà tuei ɲɛ ya co nɔm dimul-lo: I tuisinin dɛnɛ palaa nɔm pila a yungu nɔmndo kpow coo. I cuanin laandaa nɔmnda mì yɔngu nda vana celen, mà hini a nda nɔm pila o hɔl ipala déŋ.

¹²Kani nɔm tosa o vionnɔnndo nin, kɛ ya Mɛlɛka, i mingulnin nɔm ndu Israɛlla kpow o hɔl ipala déŋ.›»

¹³O kon mí David dimul Natan aa: «I cua hakio a Mɛlɛka.» Mí Natan dimul David aa: «Mɛlɛka cii nɔm haki malɔɔ le haki kon, a vinin te.

¹⁴Kɛ le tùú n tosa dɛnɔɔ ho mà yɔngu yaamɔaa Mɛlɛka-a fɛɛlɔɔ le ndu tɛɛndanndo-o, po n velu ho-o lonin te, vuo o co ni.»

¹⁵O kon kɔɔli, mí Natan muungun o ndu lo. Mí Mɛlɛka tuisi po Bat-Seba, lanɔɔ fɔ̀nɔ̀ Uri ndóò vilul David-o nàá coo.

¹⁶Mí David tɛɛlun Hala le poombɔ kon, mó va sumndo biyɔɔ. Tuma o muungu o ndu lo cɛinin-ndo, mó lɔl pii ihini lɛŋ.

¹⁷Mí kaasoŋaa va ndu o ba bɛngu-a sɔɔnguu, má dɛɛniaa ndu le cɔnɔnndo ihini lɛŋ. Kɛ o cɛl te, mó kɛɛ vɛlɛ ɲɛdiaa nda o ba.

¹⁸O paale ŋɔmmɛwndɔlen coo, mí poombɔɔ vu. Kɛ mí siòònde bii buɛyaa David-a taw le ndu sɔɛi kalɛi dimullo, kani má va dimio aa: «Poombɔɔ ho va vɔ yoomu, n va sɔɛi o ndu lo o yeŋ naa lani le. Vɛ̀ɛ̀ naa n nɔla yɛ nihau mì n dimul ndu aa poombɔɔ vi, mò kɛɛ dɛnɛ vɔɔndo tosa?»

¹⁹Mɛɛ David tuei nda iɲiimu-ɲiimuei nda pila tɛɛn, mó dɔaw taasi maa poombɔɔ vi. O kon, mó ɲuna nda aa: «Vɛ̀ɛ̀ poombɔɔ vi ni?» Má mulul ndu aa: «Oi, o vi.»

²⁰Mí David can ihini lɛŋ, mó pulun few, mó suunun cuɛima cun kɛndɛan, mó mangalan volɔɔlan lekɔɔ. O kon kɔɔli, mó kɔa o Cɛi-Mɛlɛka-o nin le Hala piɛiyo. Mɛɛ o muungu o ndu lo, mó ɲuna ɲɛdiaa, má ke ndu, mó dia.

²¹Mí buɛyaa ndɔa ɲuna ndu aa: «Dɛnɛ súú yɛɛ nɛ n tosa yɛ hoo? Tuma poombɔɔ va vɔ yoomu-o, a va sumndo biyɔɔ má va caŋndo. Sisa yɛ poombɔɔ vi, kɛ a cɛn mà muungu ɲɛdiaa nɔm dio.»

²²Mó mulul nda aa: «Tuma poombɔɔ va vɔ yoomu-o, i va sumndo biyɔɔ a caŋndo, kani i va yiyanndo maa bɔɔle mì Mɛlɛka tuinun ya iɲíí, mò mingul-la ponndo yoomu.

²³Kɛ o cuu nihau vu, sum yɛɛ ya bii yɛnin vɛlɛ? I nɔla lɛnin ndu mingi yoomu le. Ya co nin ndu komal nɛɛ o kɔɛ-a ni, kɛ ndu hin ndɛnin te.»

²⁴Mí David ɲɔɔlu Bat-Seba laa ndɔ. Má mɔɔsa kpeloo[24], mí Bat-Seba cua folio mó vialu poo, mó ke ndu diolan aa Salomɔn, mí Mɛlɛka kaola po kon taw.

²⁵Mí David mingul Natan vana-tɛɛngaa-diom Hala-o po kon haliko mò va o ba Mɛlɛka-o bɛngu. Le kaola kon Natan ke poombɔɔ diolan ni aa Yedidia (kon co dimio ni aa «O Mɛlɛka kaola-o»)

²⁶Tuma kon Yoab ndóò del Raba kobi lebol Amɔnnda coo a cɔwvo ni, mó bii kobi lebol masaa va kon icali nin-ndo.

²⁷O kon kɔɔli, mó viam kiilaa o David lo le ndu kɔlan dimullo aa: «Ya Yoab, i del kobio Raba coo a cɔwvo, mí bii kpengii mɛnndan ma co-e.

²⁸Lelan, cuungiaa vanaa cɔvaa tɔ̀a nɛɛ pilɛ, mà hun balu kobi kalaa, mì nɔm pila bii ndu. Kani i yeema mi bii ndu le, yɔŋii diola nilan la lo vannda o lasondo.»

²⁹O kon mí David cuungiaa vanaa cɔvaa tɔ̀a kpow nɛɛ pilɛ, má kɔ del Raba coo a cɔwvo, má bii ndu.

³⁰Má sungu mɔsil lemasa va piɔmndo Milkɔm o lebol-lo, má vow David ndu. Lusul mɔsil kon ndóò hiow kilolan beleyaa. A powta báà kàlàlan ndáà toosiaa ndu ni. Má cɔwviaa vɛlɛ ɲɛm celen taw o kobi kon nin, má kɔannun a mun.

³¹Mí David bii vanaa va lon-nda, mó kɔa a nda o cɛlen nin. Mó kɔ tundu nda baalala kálà-kálàlan tosaa: yɔmnde a powtan siɔlɔɔ, yɔmnde kombiaa a kpilikion lɔu. Mó tosa ɲɛ pilɛ kon o kobila Amɔnnda nin kpow. O kon kɔɔli, mó muungu Yerusalɛm nda vanaa ndɔa cɔwva kpow.