Read Kissi 2Samiɛl 13 Bible Online

2Samiɛl 13 - Kissi bible

2Samiɛl 13

¹Tofa vɔ ɲɛ tosan o kon kɔɔli-o: Absalɔm, po David-o ndóò nɔ yemaa, naŋɔɔ pila yema ndɔ kon ndóò naŋ ni, diolan aa Tamar. Kɛ mí Amnɔn, po celen David-o yeema cuaambɔ kon taw.

²Amnɔn lo Tamar yema ndɔ yeemaa háá mo del a nàá. Kani cuaambɔ kon ndóò sina vɔ dɛnɛ vanapɔnɔ le. Le hee Amnɔn ndóò tiw vɔ ba mi ndóò tɔɔndan le ndu delɔɔ kɔɔli le.

³Kɛ Amnɔn ndóò nɔ caan ndɔ piaandoo pum diolan Yonadab, po Simea, puapilɛ David-o o va ni. Nduyɛ vana kɔlkaloo[25] pila Yonadab kon va ni.

⁴Mí Yonadab ɲuna Amnɔn aa: «Le kɔlɔ yɛɛ n co yɛ hiovɔɔ ho laci a ɲawvo idii oo idii nuaa, nɔm po masaa? A dimùl-la le?» Mí Amnɔn mulul ndu aa: «Yeemɛi Tamar-e co ya ni, yemaa Absalɔm puapilɛ ni pɛɛn.»

⁵O kon mí Yonadab dimul ndu aa: «Hini o kpele nɔmndo coo mà tosa maa a nàá n co ni. Tuma fuɲa nɔm hunnin nɔm yilɔɔ-o, a dimul ndu aa o cuu nɔm Tamar yema nɔm mó hun tosal nɔm ɲɛdiaa nɔm pila o hɔl, mò yɔngu nɔm, mà de.»

⁶Mí Amnɔn hinin, vanáà ca ko aa a nàá o va ni. Tuma masaa hin ndu yilɔɔ-o, mí Amnɔn dimul ndu aa: «I yeema mì Tamar yema ni hun toosial-la dɛɛla toaŋaalan tan tiɔn ya pila o hɔl nanu, mò yɔngu ya, mì de.»

⁷Mí David viam kiilaa Tamar kɔɔli o ndu Tamar lo, má kɔ dimul ndu aa: «Kɔ o Amnɔn yema nɔm ndo cɛinin, mà kɔ bɛɛndial ndu ɲɛdiaa.»

⁸Mí Tamar kɔa o Amnɔn yema ndɔ lo cɛinin, o komal ndu ihini o kpele. Mí Tamar linda kpeyanndo, mó vɔɔca ndu, mó toaŋ ndu.

⁹O kon kɔɔli, mí Tamar cua kpɛɛnɛi, mó yɔngu Amnɔn. Kɛ mí Amnɔn kɛɛ le dɛɛla toaŋaala lan dioo. Mó dimi aa: «La soli vannda kpow o ya lo cɛinin nanu.» O kon mí vannda kpow a fula.

¹⁰Mí Amnɔn dimul niko Tamar aa: «Cuu ya ɲɛdiaa kalaa o cɛi ni lɔlaa nin nanu, mà yɔngu ya, mì de.» Mí Tamar cua dɛɛla ndóò toŋ lan-ndan, mó kɔa a lan háá o Amnɔn yema ndɔ lo cɛinin o kpele.

¹¹Tuma o va ndu lan miɔɔ le dioo-o, mí Amnɔn bii ndu, mó dimul ndu aa: «Yema nuu, hun mì n va naa nɔm.»

¹²Kɛ mí Tamar mulul ndu aa: «Ɛ-ɛ yema, kpuva ya ma va a ya le. Vana tosa dɛnɛ vaa lende o lɛŋnde Israɛl-ten nin te. Tosa dɛnɛ lamàà kon te.

¹³Kuɛɛ nɛ ya kɔa yɛnin a siɛmbula lan? Ken tosan pɛ, nɔm bɛɛ siŋnun vana fondo-fondoo Israɛlla tɛɛn. Taa yeema ya pɛ, o co fisa ma kɔ fula masaa o hɔl. O kɛɛnin mò tuŋ nɔm ya le.»

¹⁴Kɛ a kon kpede, Amnɔn yeŋ ndu lani le. Mó kpuva ndu, mó hini a ndu.

¹⁵O foofo kon, mí Tamar kuisin ndu Amnɔn o kɔl, hiovɔɔ mɛɛ ndóò nɔ yeemɛi ndɔɛi yɛ. Mó dimul ndu aa: «Cɔn ma fula!»

¹⁶Kɛ mí Tamar mulul ndu aa: «Kɛì-kɛì bɛɛ! Kani taa tow ya pɛ maa soli ya o bɛ́ɛ̀, ken hiawnin vɔwlen a dɛnɛ vɔɔn n tosa ho a ya-o.» Kɛ Amnɔn tuí vɛlɛ ken te.

¹⁷Mó veelu buɛi ndɔ pɔmbɔɔ pum, mó dimul ndu aa: «Soli cuaa ho ya coo, mà mingi dioo nɛɛla.»

¹⁸Doma bɛndu kɛndɛ-kɛndɛ súú cuavaa lemasaa ndáà cel-lɔ o nɔ le-a ndáà vownun sindɛ-o va Tamar lekɔɔ. Mí buɛi kon soli ndu o bɛ́ɛ̀, mó mingi dioo nɛɛla kpáŋ.

¹⁹Mí Tamar vownun pultan o lebol[26], mó sɛɛsiaa doma ndɔɔ, mó handun balan o lebol, mó va kɔlan a yeelan.

²⁰Mí Absalɔm, yema ndɔ ɲuna ndu aa: «Mò va maa Amnɔn yema nɔm kpuva nɔm ni? Mɛɛ meenun, dimi ɲɛ-ɲɛ le, kani yema nɔm o co ni. Biinun ndi o kɔl te.» Mí Tamar kɔ va o malnanndo o Absalɔm yema ndɔ lo bɛɛ.

²¹Mɛɛ masaa David tuei sɔɛi ken, mó tambu kɔllo taw.

²²Absalɔm dimul Amnɔn ɲɛ-ɲɛ le, kɛ mó nɛinun ndu taw le kpuva o kpuva Tamar yema ndɔ-o.

²³Vɔsila tiɔn o dɛnɛ kon kɔɔli, mí Absalɔm veelu poaa masaa kpow nɛɛ vannda va saa ndɔa yiinde kilio Baal-Hatsɔr o pɛɛngulan a tàndá Efraim-ndo-a.

²⁴Mó kɔ komal masaa David, mó dimul ndu aa: «Tofa vɔ, vannda co saa nia yiinde kilio, ya vana nɔm baalaa. I yeema mi la liila ya lon niaa vanaa bɛndua co nɔm o ba bɛngu-a.»

²⁵Mí masaa mulul Absalɔm aa: «Ɛ-ɛ po nuu. O bɛnda mì naa kpow n kɔɛ le, yɔŋii o siŋnun bɔnɔ bɛndoo le nɔm.» Mí Absalɔm baŋnun kpíŋ, kɛ mí masaa kɛɛ le kɔlan. Kɛ mó dɔaw ndu duaa.

²⁶Mí Absalɔm dimi aa: «Mɛɛ nɔm kɛɛ le kɔlan yɛ, cɛl mì Amnɔn puapilɛ ni liila naa.» Mí masaa ɲuna ndu aa: «Le yɛɛ n yeema yɛ mó kɔɛ lon?»

²⁷Kɛ le mɛɛ Absalɔm baŋnun ndu kɔɔli yɛ, mí masaa cɛl, mó mal Amnɔn nda poaa ndɔa tɔ̀a kɔlan nda ndaa latulu.

²⁸Mí Absalɔm dimul buɛyaa ndɔa aa: «La mɛɛndan Amnɔn ɲɛkɛndɛi, telen mɔiyan ma biinin ndu mò naŋ kɔl taw-vo, i dimulnin niaa le ndu biyɔɔ, mì la dii ndu. La yɔŋ isiòòn te dɛ! Sɔɛi fula pɛ i muli. Lelan la vesa hɔlla, mì la tosa vanapɔnɔyɛi.»

²⁹Mí buɛyaa Absalɔm-nda tosa mɛɛ o dimul nda yɛ, má dii Amnɔn. Fɔ́ɔ́fɔ̀, mí poaa tɔ̀a masaa can, mí vana-vana hel o milɛɛ ndɔɔ coo, má sɔɔndian.

³⁰A va vɔ nɛi-tɛɛn, mí masaa David tuɛi maa Absalɔm cii poaa masaa kpow diw, maa hali o pilɛ lo yoomu le.

³¹O kon mí masaa sɛɛsiaa volɔɔla va ndu lekɔɔ lan, mó hini lɛŋ. Mí vanaa ndɔa baalaa kpow bɛɛ a balu ndu a volɔɔla sɛɛsiɛilan lekɔɔ.

³²Kɛ mí Yonadab, po Simea puapilɛ David-o muli, mó dimi aa: «Vana ni bɛndoo, dímì nuaa aa poaa masaa kpow le a vi le. Amnɔn ndu pilɛ kpé nda dii ni. Kani lɔ́ɔ́ Amnɔn kpuva Tamar yemaa Absalɔm mó hini a ndu-o, Absalɔm kelu o kɔl ndɔɔ nin le ndu diyɔɔ ni.

³³Lelan masaa, yíyàn maa poaa nɔmnda kpow le a vi le. Amnɔn daama vi ni,

³⁴o kon, mí Absalɔm sɔndan.» Mí langbanɔ felengi va kpalilten tosaa-o heelu hɔlla, mó ca dɔ́ɔ́ vannda kunda bɛndoo tolɔɔ o nɛi Horonayim-ndo, o pembei holnɔnndo. Mó hun dimul masaa aa: «I ce vannda hunɔɔ kunda bɛndoo o nɛi Horonayim-ndo, o pembei holnɔnndo.»

³⁵Mí Yonadab dimul masaa aa: «Masaa, poaa nɔmnda co hunɔɔ kon nuaa ni, lende le ya langa va nɔm dimullo le?»

³⁶Yonadab mei bɛɛ sondo le, mí poaa masaa tiiya, má deli a caŋndan, mí masaa nda vanaa ndɔa baalaa bɛɛ tuisi mɛmɛan pulua-pulua.

³⁷Mɛɛ Absalɔm ɲaanun, mó kɔannun o Talmai po Amihud va masaa Kesur-o lo, mó kɔ lo lon háá vɔsilan tan yáá. O telen kon bɛngu kpede, masaa David va o mɔnɛi piɔ́m po ndɔɔ nin tuŋ.

³⁹Kɛ mí masaa mɛɛlu kɔllo ɲulul a Absalɔm, kani mó sɔla ɲɔɔloo le piɔ́m po ndɔɔ.