Read Kissi 2Samiɛl 17 Bible Online

2Samiɛl 17 - Kissi bible

2Samiɛl 17

¹Mí Ahitofɛl dimul Absalɔm aa: «Mɛi-yɔ mì hɛli vanaa cɔwva vaalan tɔ́ a latiɔn, mì kuel David cɔɛllɛn.

²Mɛɛ o niinu sangaa nuaa kpɛŋ yɛ, o nɔ lɛhau mayoomu le. I kɔ fula pɛ nda coo fɛlɛmɛndɛn, vanaa co ndu ikɛi-ya co piɔl a kiltan, o kon i koma tisa dɔ́ɔ́ ndu masaa coo, i dii ndu.

³Lende ya co tosa ni mì mingi vannda kpow nɔm kɔɔli, kani vana n co hoo cɔlɔbaa-o vi dɔ́ɔ́ pɛ, a co cɔ mì vannda kpow a sɔla kɔlɲuloo.»

⁴Mí yiyan kon hɛnan Absalɔm nda kaasoŋaa kɔlkalua Israɛl kpow.

⁵Kɛ mí Absalɔm dimul ndu aa: «Veelu Husai Arkiinɔ, mí ndu bɛɛ dimul naa yiyan ndɔɔ.»

⁶Husai hunɔɔ, mí Absalɔm dimul ndu mɛɛ Ahitofɛl tuu yɛ. Mó ɲuna Husai aa «Vɛ̀ɛ̀ n kɔ o tuu kon coo baa n kɔa lecoo le? Cɔm naa yiyan nɔmndo.»

⁷Mí Husai mulul Absalɔm aa: «O laan, tuu Ahitofɛl tuu hoo-o bɛnda le.»

⁸O kon kɔɔli, mó dimul Absalɔm aa: «Nɔm pila sina fuɲa nɔm nda langbaa ndɔa. A sina maa vanaa cɔwva lekɛ́ndɛi nda co ni. A fula pɛ kɔl, a siŋnun maa kɔ́lɔ́vúlu nda cuel cuavaa ndɔa yondoo nin-ndo. Handɔɔ o kon coo, vana cɔwvo fuɲa nɔm co ni, o lɔlnin nɛɛ pilɛ nda caanda le.

⁹I ce maa o co nihau o viannanndo o buululan nin, te kon te nɛɛ celen. Te n kandu dɔ́ɔ́ pɛ cɔwvo ma diw vanaa naa, vannda kpow co sɔɛi ken tueyɔɔ, mà dimi aa a nɔla vanaa sim Absalɔm kɔɔli-a.

¹⁰O kon, hali vana cɔw mayoomu fula kɔllo maa yàlà-o vunin diallon. Kani Israɛlla kpow sina maa kuubanɔ cɔwvo fuɲa nɔm co ni. A langbaa kalla kpeekpei o co balɔɔ ni.

¹¹Lelan, tuu nuu co hoo ni: cuungiaa vanaa cɔvaa Israɛlla kpow nɛɛ pilɛ mɛɛ sióónndon va o mɛmma ihɛllan kɔngɔ nuaa yɛ, kandɔɔ o tàndá Dan-ndo nin, kɔlan tiiyaa háá Bɛɛr-Seba. Mì nɔm pila bɛɛ kɔɛ le cɔwvo.

¹²Mì n kuel David, mì n cɔlɔba ndu. Nɛɛ-nɛɛ naa n komal ndu pɛ, n tol ndu coo mɛɛ mɔ́mndo cucun lɛŋ nuaa yɛ. O kon ndu pila a vanaa co ndu kɔɔli-a, vana-vana lonin yoomu le.

¹³Te o sɔndan pɛ mò kɔ vionnun o kobio pum nin, naa Israɛlla kpow n kɔ baa yoei o kobi kon, n nan ndu háá o pee pɔmbɔɔ, hali powvo ndu pilɛ bɛɛ lonin ndon te.»

¹⁴Mí Absalɔm nda Israɛlla kpow a dimi aa: «Sila Husai Arkiinɔ-o hiow bɛnda a sila Ahitofɛl-lo!» Kani Mɛlɛka ndóò yeema le tuu Ahitofɛl-lo tɛɛmbuuo haliko mi ndóò tuisi Absalɔm dɛnɛ palaa coo.

¹⁵Mí Husai kɔ cɔm vanaa-solia-lasálàá, Sadɔk nda Abiatar tuula Ahitofɛl ndóò cɔm Absalɔm nda kaasoŋaa kɔlkalua Israɛlla lan, a tuula ndu pila Husai tuu lan.

¹⁶Mó dimi aa: «Lelan la viom niko vanndo cɔ́-cɔ́ o David lo, mò kɔ dimul ndu aa o lɔl cɔɛllɛn o dɛɛla Yurdɛn-ndo nin te. Kɛ o taŋ Yurdɛn mò kɔɛ lándán, yɔŋii kpundɛ piɔ́mndo del nda coo nda vanaa co ndu kɔɔli-a.»

¹⁷Yonatan po Abiatar-o, nda Ahimaas po Sadɔk-o va isisi Ɛin-Rokɛl, buɛi laandoo pum ndóò bɛnda le nda congɔnndo dimullo, mì nda pila ndáà kɔ dimul masaa David congɔn kon. Kani ndáà bɛnda mì ndáà fula ciee mì vannda ndáà ce nda le.

¹⁸Kɛ a kon kpede, mí langbanɔ felengoo pum ca nda, mó kɔ dimul Absalɔm. Mí kiilaa ŋiɔŋaa kan keleŋa lakɔnnɔn, háá má kɔ tiiya Bahurim o vanndo pum ndo bɛɛ. Soon kólaa va o vana kon-ndo bɛɛ déŋ, má toal vionnɔnndo lenin.

¹⁹Mí lanɔɔ vana kon cua valaa, mó kuumbuu o soon kólaa kon coo, mó tɛ̀i malun kullon lecoo, yɔŋii vanáà bii bila.

²⁰Mí buɛyaa Absalɔm-nda luɛi o cua kon ndo cɛinin, má ɲuna ndu aa: «Kuɛɛ nɛ Ahimaas nda Yonatan a co yɛ?» Mó mulul nda aa: «A hiow, má taŋ peo.» Mí kiilaa kan nuwviaa nda, kɛ a seelun nda le. O kon, má muungu Yerusalɛm.

²¹Tuma nda kɔɛnnun-ndo, mí Ahimaas nda Yonatan a koma fula, má kɔ downun masaa David kona, má cɔm ndu tuula Ahitofɛl tuu lan. Má dimul ndu aa: «Lelan, keleŋa peo taŋɔɔ dɛ!»

²²Fɔ́ɔ́fɔ̀, mí David nda vanaa va ndu kɔɔli-a can, má taŋ peo Yurdɛn. Tuma pá mí ɲɔɔ tenga, vana-vana ve lɛ kɔɔli le taŋɔɔ le.

²³Tuma Ahitofɛl ce maa vannda bii sila ndɔɔ loo, mó dovi sofɛlɛ ndɔɔ, mó muungun o ndu lo ciee. Mɛɛ o tiiya, mó congun yungu ndɔɔ, mó kɔ landun, mó vu. Má kumbu ndu o sɛi fuɲa ndɔ-o nin.

²⁴Tuma Absalɔm va peo Yurdɛn taŋɔɔ nda vanaa ndɔa cɔwva Israɛl kpow-vo, mí David ndu tiiya Mahanaim.

²⁵Mí Absalɔm handu Amasa bolle vanaa cɔwva o fonda Yoab-o. Fuɲa velu Amasa kon-ndo diolan aa Yitra, Israɛlnɔɔ o va ni. Ndu óò va a Abikail ni má vialu po kon, pɔmbɔɔ Seruya kalaa Yoab Abikail kon va ni, cua Nahas-o.

²⁶Mí Absalɔm nda Israɛlla kɔ kila dɔ́ɔ́ngɔ́ ndaa o tàndá Kalaad-o nin.

²⁷Tuma David tiiya Mahanaim-ndo, mí Sobi, po Nahas fula Raba o kobi lebol Amɔnnda nin-ndo, Makir, po Amiɛl fula Lo-Debar-o, a Barsilai fula Rokelim o tàndá Kalaad-o nin-ndo

²⁸yoo nda kpelela hinialan, kolala keeselan a kpɛɛnɛn puulon. Má yɔngu nda vɛlɛ maalon, ɔrse, kpeyanndo, kulun toaŋan, kavun bɛndon, cabueenndon,

²⁹lɛan, nɔnɔɔ hilihilio, saa a visin nawvon le dioo. Kani nuaa vanaa ke nda ɲɛm mun-nda nda dimin o kɔl ni: «Vannda ha yɔkpa bɔɔ. A sanga a yiaan a á bolola vesɛilan o lɛŋnde veselɛilen nin.»