Read Kissi 2Samiɛl 19 Bible Online

2Samiɛl 19 - Kissi bible

2Samiɛl 19

¹O kon mí misimisio bii masaa David. Mó va helɔɔ a caŋndo o cɛi coocoo va o dio luɛyaa kobio nin-ndo coo a dimio aa: «Éé po nuu Absalɔm! Éé ponndo! Éé po nuu Absalɔm! Te ya pila kóò vi o fonda nɔmndo nuaa ni! Éé Absalɔm! Kpòkóó Absalɔm!»

²Má kɔ dimul Yoab aa: «Masaa co caŋndo a somisominndo taw le Absalɔm po ndɔ.»

³Paale len, mí kponyo nda nɔla yaamɔɔa o cɔwvo-o siŋnun biisio le vanaa cɔwva kpow. Kani a va tueyɔɔ maa masaa va a mɔnɛi taw le piɔ́m po ndɔɔ.

⁴Mí vannda muungu ɲinkon ciee o vionnɔnndo nin mɛɛ vanaa nda nɔla o cɔwvo-a ɲaanun a siɛmbulan nuaa yɛ.

⁵Masaa va hɔlaa kumbaa, mo va caŋndo kpélén aa: «Éé Absalɔm po ni! Éé Absalɔm! Éé po nuu! Éé ponndo!»

⁶O kon mí Yoab luɛi o ndu masaa lo cɛinin, mó dimul ndu aa: «A tuisi hau buɛyaa nɔmaa baŋa nɔm-nda siɛmbulan kpow. Nduyɛ nda baŋa nɔm pila, poaa nɔmnda, cuavaa nɔmnda a sámáá nɔmnda kpede ni.

⁷Kani vanaa nɔ nɛyɔn nɔmndo-a, nda n kaola ni, mí vanaa kaola nɔm-nda nɛinun nɔm. A cɔm hau kpendekele maa simlacia a buɛyaa nɔmnda kpede a co ɲɛ-ɲɛ nɔm o hɔl te. I sina maa naa kpow náà n vi pɛ hau, mì Absalɔm ndóò lo yoomu ndu pilɛ kpé, kon ndóò hiaw nɔm hɛnan.

⁸Lelan sisa, cɔn mà fula, mà kɔ soo o vanaa nɔmaa baalaa lo. Kani le Mɛlɛka co hoo yoomu-o, taa fula le, vana-vana lonin nɔm kɔɔli cɔɛllɛn te. Kon tosan yɛ pɛ, dɛnɛ palaa toalnin nɔm coo-o hiawnin kalei a dɛnnda palaala kei nɔm coo kabi kandɔɔ o felengiyɛi nɔmnde nin-ndan.»

⁹O kon mí masaa can, mó kɔ cal o dio luɛyaa kobio. Má dimul vannda kpow aa: «La tofa vɔ masaa icali o dio kobio se!» Mí vannda kpow hun o ndu lo. Israɛlla[31] ndáà sɔɔndian nin, mí vana-vana kɔannun o ndu lo.

¹⁰O polama Israɛlla[32] nin kpow, mí vannda va sɔɛi lecoo. Má va dimio aa: «Masaa ho baŋa naa yaamɔaa naa o ba ni, ndu soli naa Filistia o ba bɛngu ni. Kɛ ndu le ɲaanun nuaa, mó faŋan o lɛŋnde ndɔlen nin le Absalɔm te?

¹¹Absalɔm náà n hɛli yɛ kon le vaa masa naa-o, ndu vi o cɔwvo. Yɛɛ niaa co yɛ niko cumndo le masaa David mingio nanu?»

¹²Mí masaa David ndu viam kiilaa o vanaa-solia-lasálàá lo, Sadɔk nda Abiatar pɛɛn, mó dimul nda aa: «La soo o kaasoŋaa kɔlkalua Yuda lo, mí la dimul nda aa à vá vanaa mɛɛlaa le ya David mingio o ya lo cɛinin te.» Kani masaa ndóò tuei nin tuu Israɛlaa tɔ̀a ndáà tuu-o.

¹³Lelan mó dimul nda le nda tɛɛngullo aa: «Niaa co puapilɛa nia ni, niaa co vanayɛi nii kpeekpei[33] ni. Lelan la vá vanaa mɛɛlaa le ya mingio o masale nilen coo le.

¹⁴La kɔ dimul vɛlɛ Amasa aa: ‹Vanayɛi kpeekpei naa n co naa ndu ni. Lelan, ndu ya handunin vanaa cɔwva bollen o fonda Yoab-o le lɔ́ɔ́-lɔ́ɔ̀ ni. Te i tosa kon te, dɛnɛ palaa súú-súù Hala yeema pɛ o tuisi ya coo.›»

¹⁵Mí David muli vannda Yuda kpow kɔltan o ndu lo maa kɔl vana pilɛ, mí Yudaa cɛlan, má viam vannda masaa kɔɔli le ndu dimullo maa o muungu o ndu lo a buɛyaa ndɔa kpede.

¹⁶Mí masaa bii nɛiyo le muungoo, mó tiiya o peo Yurdɛn kɔngɔ. Mí vannda Yuda hun ndu bɔŋa Kilkal le ndu tɛɛnguuo.

¹⁷Mi Simei, po Kera fula Bahurim o tàndá Bɛnyamɛn-ndo nin-ndo toal a kiltan nda Yudaa le taŋɔɔ le masaa David bɔŋaa.

¹⁸Vanaa fula o tàndá Bɛnyamɛn-ndo nin-nda vàá pilɛ, Siba va buɛi yungu Saul-lo-o, poaa ndɔa tɔ́ a à ŋuɛɛnu a buɛyaa ndɔa bidiin, ndáà liila ndu Yurdɛn le masaa bɔŋaa ni.

¹⁹Tuma dɛ̀ndɔ̀ɔ́ va yungu masaa peo tɛɛnguuo le kɔlan ɲɛ ndáà bɛnda le tosaa-o dimio-o, mí Simei, po Kera-o del masaa o labɛngunin,

²⁰mó tɛɛlun ndu aa: «Yandi vana bɛndoo, pɔɛɛnun a tɛɛmbuu nuu. Pɔɛɛnun dɛnɛ yáà tosal nɔm paale n va faŋanndo Yerusalɛm-nden-ndo. Bii sɔɛi ken o kɔl te!

²¹Kani i sina lekɛ́ndɛi maa i cua hakio a nɔm. Lelan ya yɔŋnun hau vana tasoo fulaa o polale Yosɛf len nin ni, le hunɔɔ nɔm masa nuu bɔŋaa.»

²²O kon mí Abisai, po Seruya-o soaa, mó ɲuna masaa aa: «Vɛ̀ɛ̀ le hee Simei yeow hoo masa Mɛlɛka pɔla-o-o kɛɛnin piɔ́mndo sɔla ni?»

²³Kɛ mí David mulul ndu aa: «Yɛɛ nɛ co yɛ naa tɛɛn naa niaa, niaa poaa Seruya-a ha? Le yɛɛ niaa co yɛ ya simullo? Vɛ̀ɛ̀ mì vana dii vɛlɛ hau vanacieo o lɛŋnde Israɛl-ten nin? Vɛ̀ɛ̀ o co tiindanndo le ya sɔla nuaa maa ya le co hau masa Israɛlla kpow le?»

²⁴Mí masaa dimul Simei aa: «Vana diinin nɔm te.» Mí masaa mɛnalan ndu.

²⁵Tuma vannda kɔɛ masaa David bɔŋaa-o, mí Mefibosɛt, po Saul-lo bɛɛ kɔa ndu bɔŋa. Kɛ nduyɛ kandɔɔ paale masaa faŋan-nden, háá paale o muungu len Yerusalɛm kɔlɲulu fɛɛ len, Mefibosɛt pulu n'pelu le, o sendi siaiye o milinndo bɛngu le, o too vɛlɛ volɔɔla ndɔlan te.

²⁶Mɛɛ o tiiya Yerusalɛm o masaa lo, mí masaa ɲuna ndu aa: «Éé Mefibosɛt! Le yɛɛ n kɛɛ yɛ le kɔlan naa ŋiɔn latulu?»

²⁷Mó muli aa: «Àá masaa! Buɛi nuu pala ya ni. I va yiyanndo le sofɛlɛ nuu toosiaa, mì yáà kɔɛ lecoo nɔm kɔɔli, kani vana bɛvɛiyo ya co ni.

²⁸Kɛ mí buɛi nuu kɔ ɲiinduu ya còòlan coo, mó lɔalu ya o nɔm ndo. Kɛ o va bɛɛ lende, nɔm, maa mɛlɛkanɔ Hala-o n co ni. Lelan, tosa mɛɛ ɲɔɔ hɛnan nɔm yɛ.

²⁹Kani naa yungu fuɲa nuu kpow, vanaa ndáà bɛnda le piɔ́mndo sɔlaa nɔm vana bɛndoo o ba-a naa n co ni. Kɛ a kon kpede, má siinguu ya vana pilɛ o vanaa dia ɲɛdiaa niaa ndaa latulu-a tɛɛn. Ɔ́ɔ̀ kɛndɛi celen ya ɲunanin vɛlɛ nɔm le ya tosallo-e?»

³⁰Mí masaa dimul ndu aa: «Le yɛɛ nɛ n co yɛ vɔ sɔɛi o dɛnɛ kon coo? Nuaa ya dimi ni aa ‹La kɔ piɔvan lɛŋii Saul-le niaa Siba.›»

³¹Mí Mefibosɛt dimi aa: «Siba nɔla mo cua lɛŋii ken kpow. Ya le ya, haliko nɔm masaa, nɔm co vana ni bɛndoo-o muungu kɛndia o nɔm ndo.»

³²Mí Barsilai fula o tàndá Kalaad nin-ndo can Rokelim, mó tuusu, mó taŋ peo Yurdɛn nda masaa. O kon kɔɔli, má sɛyan Yurdɛn ndon.

³³Barsilai ndóò yuuva nin taw, vɔsilan belaŋɔmaa ndóò nɔ ni. Ndu va masaa David baloo yɔngoo telen David kalaa va Mahanaim-ndo ni, kani ndóò nɔ bolofaa taw.

³⁴Le hee, mí masaa David dimul ndu aa: «N kɔ latulu naa ŋiɔn, mì kɔ manda nɔm o ya lo Yerusalɛm, mì toosiaa balahavɛila nɔmndan kpow.»

³⁵Kɛ mí Barsilai muli aa: «Àá masaa! I nɔ lɛ vɔsila bɔɔ le vaa yoomu le. Le yɛɛ ya heelu yɛnin vɛlɛ Yerusalɛm naa nɔm masaa?

³⁶Vɔsilan belaŋɔmaa ya nɔ nin nuaa ni. Vɛ̀ɛ̀ i nɔla lɛ pá dɛnɛ kɛndɔɔ a dɛnɛ vɔɔndo sɛiyo? I tui lɛ bɛɛ ɲɛm dian ya co dioo-on a ɲɛm ya co kolɔɔ-on yeelaa le. I tiw lɛ ba hiyanndo sinaa diomnda vanpiaandua a diomnda vanlaandua co condei-ya tɛɛn te. Le yɛɛ ya kɔa yɛnin vɛlɛ calle masaa o bɛngu coo?

³⁷Lelan, peo Yurdɛn daama ya co nɔm tɛɛnguu ni mì liila nɔm ɲɛ-pɔmbɔ. Kɛ hali kon, le yɛɛ nɔm masaa dɔaw yɛnin ya vɔ̀ngɔ̀ vaa lende?

³⁸Lelan, cɛl mì ya vana nɔm baalaa muungu, mì kɔ vu o ya lo, o sɛila fuɲa nuu a kala nuu ikɛi. Kɛ má cè Kimham vana nɔm baala[34], la kɔ niaa niaa ndu. Òó masaa! Kɔ tosal ndu dɛnɛ kɛndɛ hɛnannin nɔm-ndo.»

³⁹Mí masaa dimi aa: «I tuei, n co lakɔ naa Kimham, mì kɔ bii ndu mɛɛ n yeema yɛ. Ɲɛ-ɲɛ n yeema pɛ ya o ba, nɔm dimul-la kínɛí, mì tosal nɔm kon.»

⁴⁰Mɛɛ masaa taŋ peo Yurdɛn, mí vannda cuu taŋɔɔ kpow, mí masaa David kɔman Barsilai, mó dɔaw ndu duaa, mó congun ndu. O kon kɔɔli, mí Barsilai muungun o ndu lo.

⁴¹Mí masaa kɔa Kilkal, Kimham va ndu kɔɔli. Mí Yudaa kpow nda Israɛlaa fula a ba luaŋ-ndo-a baa pilɔɔ a liila masaa.

⁴²Mí vanaa fula a ba luaŋ-ndo-a sɔɔnguu masaa David ikɛi, má ɲuna ndu aa: «Le yɛɛ puapilɛa naa fula o polale Yuda len nin-nda a kungulan yɛ nɔm coo, má tɛɛnguu nɔm peo Yurdɛn a yungu nɔmndo, nduyɛ vanaa nɔmaa cɔwva kpow a va lon?»

⁴³Mí vanaa fula o polale Yuda len nin-nda mulul Israɛlla aa: «Kani naa n hiow va vanayɛi masaa. Hali mí la tuulu kɔl le ken te. Mò va maa masaa va naa baloo dɔvɔɔ ni? Mò va maa ɲɛ o ke naa ni?»

⁴⁴Fɔ́ɔ́fɔ̀, mí Israɛlla mulul nda, má dimi aa: «Naa n nɔ masaa ho bɛmbɔɔ tɔ́ hiovɔɔ niaa coo! Hali David pila, naa n hiow ndu nɔ a niaa[35]. Le yɛɛ nɛ la ke naa lebɛɛ le? O co naa fɔlɔn te n soo le masa naa mingio nanu le?» Kɛ mí vanaa fula o polale Yuda len nin-nda dimi diomnda vɔɔnndan hiovɔɔ Israɛlla coo o sɛɛngian nda kon nin.