Read Kissi 2Samiɛl 2 Bible Online

2Samiɛl 2 - Kissi bible

2Samiɛl 2

¹Dɛnnda lan hiovɔɔ, mí David ɲuna Mɛlɛka aa: «Vɛ̀ɛ̀ i heelu o kobio pum nin o tàndá Yuda-o nin?» Mí Mɛlɛka mulul ndu aa: «Oi, heelu.» Mí David ɲuna vɛlɛ aa: «Kobi kuɛɛ nɛ ya kɔ nin kpeekpei?» Mí Mɛlɛka mulul ndu aa: «Kɔ Hebrɔn.»

²Mí David kɔa nda laandaa ndɔa ŋiɔnda, Ahinoam Yisrɛeliinɔ nda Abikail, lanɔɔ fɔ̀nɔ̀ Nabal Karmɛlnɔ.

³Mí David kɔa vɛlɛ a langbaa ndɔa va ndu ikɛi-ya a yungula ndalan, má kɔ cal o cieon va Hebrɔn balɔɔ-on nin.

⁴O kon mí vannda Yuda hun Hebrɔn le David pɔlaa le ndu siinguuo masaa Yuda. Dɛnnda lan cuvɔɔ, má dimul David maa vannda Yabɛs ndáà kumbu Saul ni, Yabɛs hoo o tàndá Kalaad-o nin pɛɛn.

⁵Mí David yoo nda kiilaa, mó dimul nda aa: «Màá Mɛlɛka dɔw nia duaa! Kani la yiyan Saul vana niaa bɛndoo coo, mí la kumbu ndu.

⁶Niaa bɛɛ, màá Mɛlɛka lo o lediom coo a niaa, mò cɔm niaa sakpoyɛi ndɔɛi! Ya bɛɛ, i tosalnin niaa dɛnɛ kɛndɔɔ lende, le dɛnɛ niaa tosa kon-ndo.

⁷Lelan sisa la sim yili, la luei yoomuan, kani Saul vana niaa bɛndoo vinnun. Kɛ ya yungu Yuda-o pɔla ni mì va masaa nda coo.»

⁸Mí Abnɛr, po Nɛr-o, ó va vanaa cɔvaa Saul-la bollen-ndo cua Is-Bosɛt po Saul-lo, mó kɔa a ndu Mahanaim,

⁹mó kɔ suili ndu masaa o tàndá Kalaad-o coo, o tàndá Asur-o[3] coo, o tàndá Yisreɛl-lo coo, o tàndá Efraim-ndo coo a o tàndá Bɛnyamɛn-ndo coo. Mbɔ̀ vana dimi tuŋ maa Israɛlla kpow coo.

¹⁰Is-Bosɛt, po Saul-lo ndóò nɔ vɔsilan belehiɔɔlu lɔ́ɔ́ o siŋnun masaa Israɛlla coo-o. Mó tosa masalen vɔsilan tan tiɔn. Polale Yuda len daama léè cɛl masale David len ni.

¹¹Mí David tosa masalen vɔsilan tan ŋɔmmɛw o polale Yuda len coo, Hebrɔn o va icali telen kon ni.

¹²Mí Abnɛr, po Nɛr-o, nda buɛyaa Is-Bosɛt po Saul-lo-a can Mahanaim, má bii nɛiyo le kɔlan Kabaɔn.

¹³Mí Yoab, po Seruya-o[4], nda buɛyaa David-a bɛɛ a bii nɛiyo le kɔlan. Mí kundala tiɔnnda lan la kɔ bɔŋan o lumii mamɛnnde Kabaɔn. Mí kundaa pilɛ sim o kɔngɔɔ leeloo, mí kundaa pilɔɔ sim o kɔngɔɔ pilɔɔ leeloo.

¹⁴Mí Abnɛr dimul Yoab aa: «I yeema mì langbaa naa felengia cɛn, mà cɔlɔba naa o hɔl.» Mí Yoab muli aa: «Ava, a cɔn mà cɔlɔba.»

¹⁵Mí langbaa felengia kan can le cɔlɔbaa, má cɔm nda vellaa-velle: mí n'van tɔ́ a vanaa ŋiɔn a fula o polale Bɛnyamɛn-nden nin le Is-Bosɛt po Saul-lo, mí n'van tɔ́ a vanaa ŋiɔn fula o buɛyaa David-a nin.

¹⁶Mí vana-vana bii vana nda va cɔlɔbaa-o bollen, má cuukuan lungbon a mɔɔn cɔwvon. O kon, mí nda kpow a vu latulu. Má ke fonda kon Kabaɔn diolan aa Hɛlkat-Hasurim (kon co dimio ni aa «Yondo powta kpovaa»).

¹⁷Paale pilɛle len, mí cɔw vɔɔn-vɔɔndo can. Mí vanaa cɔvaa David-a nɔla Abnɛr nda vanaa ndɔa cɔwva, Israɛlla pɛɛn.

¹⁸Poaa yáá-aa Seruya-a va lon: Yoab, Abisai a Asaɛl[5]. Asaɛl ve vana lusulan te, keleŋaa pila ndóò keleŋa ni maa púvɛ.

¹⁹Mó bii Abnɛr kiltan kɔɔli, o sei o ba kɛndɛ coo le, o sei o ba mɛl coo le.

²⁰Mí Abnɛr tofan kɔɔli, mó ɲuna ndu aa: «Asaɛl nɔm ni nɛ?» Mó mulul ndu aa: «Oi, ya ni.»

²¹Mí Abnɛr dimul ndu aa: «Ɲaanun vana celen kɔɔli o ba kɛndɔɔ te kon te o ba mɛllo coo, mà bii vanaa cɔvaa felengia ha o pilɛ, mà hɛlu ndu ɲɛm cɔwvon o ba.» Kɛ Asaɛl pɛngi Abnɛr tovɔɔ le few.

²²Mí Abnɛr dimi vɛlɛ aa: «Poo Asaɛl pɛngi ya tovɔɔ! I yeema mì dii nɔm te, yɔŋii siɛmbulan la luɛi naa tɛɛn naa Yoab bɛ nɔm[6].»

²³Kɛ Asaɛl cɛl le ndu faŋanndo kɔɔli le. O kon, mí Abnɛr mingi baa a makɔɔ, mó cuku ndu demboo a bál tumndo, mí bállo kɔ fula ndu o kɔɔ, mó del o foofo kon, mó vu. Mí vanaa va keiyo o fonda Asaɛl vi kon-ndo-a kpow a va simndan.

²⁴Kɛ mí Yoab nda Abisai toal Abnɛr kiltan kɔɔli. Mɛɛ nda tiiya o pembei Amma, Kiya ikɛi o nɛi kɔɛ o lɛŋnde veselɛilen Kabaɔn-ndo, mí paalen le del.

²⁵Mí vanaa cɔvaa fula o polale Bɛnyamɛn-nden nin-nda cuungian, má sim polalen Abnɛr len kɔɔli, má kɔ hel o pembei pum tullo.

²⁶Mí Abnɛr ɲuna Yoab aa: «Vɛ̀ɛ̀ nuaa koni naa n lonin mɔɔn cɔwvon cuaa le naa pila diuvanndo ni? Sɔɛi he ceenin mɛɛlu le dɛ! A kúúnà vanaa nɔmaa cɔwva mà pɛngi puapilɛa ndaa tovɔɔ le?»

²⁷Mí Yoab muli aa: «Le Hala yoomaa, te nɔm óò dimi le cɔwvo ho kpaa le, háá siɔdii idii vanaa nia cɔwva ndáà pɛnginin nia tovɔɔ le.»

²⁸Mí Yoab hɔŋ buloo. Mí vanaa ndɔa cɔwva pɛngi puapilɛa ndaa Israɛlla tovɔɔ. Mí cɔwvo cuu.

²⁹Mí Abnɛr nda vanaa ndɔa cɔwva lɔl kɔlan pii o dɛɛlalan Yurdɛn nin, má kɔ taŋ peo, má taŋ Bitrɔn, má kɔ tiiya Mahanaim.

³⁰Mɛɛ Yoab pɛngi Abnɛr tovɔɔ, mó bɔɔŋiaa vanaa cɔwva nɛɛ pilɛ, mó cɔm nda tɛ́kpɛ́-tɛ́kpɛ́. Mó ca maa o buɛyaa David-a tɛɛn, n'van tɔ́ a vanaa ŋɔmahiɔɔlu, handɔɔ Asaɛl lecoo, nda ve lon te.

³¹Kɛ nduyɛ, n'van kɛmɛ leyáá a belaŋɔmpum buɛyaa David-a dii o vanaa cɔvaa fula o polale Bɛnyamɛn-nden nin-nda a o vanaa cɔvaa Abnɛr-a tɛɛn ni.

³²Má cua Asaɛl, má kɔ kumbu ndu o sɛi fuɲa ndɔ-o nin Bɛtlɛhɛm. O kon kɔɔli, mí Yoab nda vanaa ndɔa cɔwva lɔl kɔlan pii, má tiiya Hebrɔn telen paale siaalen.