Read Kissi 2Samiɛl 22 Bible Online

2Samiɛl 22 - Kissi bible

2Samiɛl 22

¹Paale Mɛlɛka baŋa David yaamɔaa ndɔa kpow o ba len, taama-taama paale o baŋa ndu Saul o ba len, mí ndu David solul Mɛlɛka condei.

²Mó dimi aa: «Mɛlɛka co pow kpova nuu ni, ndu co kpaki nuu a vana baŋaa nuu ni.

³Pow kpovaa Hala nuu co le ya ni, nɛɛ ya viannun-nda pɛɛn. Ndu co kɔ̀ɔ̀ cɔw kanda ya-o ni, ndu co vana ni ciindiaa ni, ndu baŋa ya vanaa kɔlvesɛiya o ba ni.

⁴Biiloo co le Mɛlɛka! I ɲuna pɛ dɔ́ɔ́ ndu le ya malaa, o baŋa ya yaamɔaa nia o ba.

⁵Yoei piɔ́mnde ndíì cii nin ya bayian, tindima ciee-piɔ́mndan maa luei nin ya siòònde.

⁶I va nin o biyaa le kɔlan ciee-piɔ́m, yaŋɔɔle piɔ́mnden le va nin biondoo le ya biyɔɔ.

⁷O sanga ni bɛndu kon nin, mí koŋul Mɛlɛka o lani, mí yonda o ndu Hala lo. Mó tuɛi ya koŋullo nɛɛ o co o cɛi ndɔ biilaa nin-nda, mí diom nuu del ndu o lani.

⁸Mí lɛŋnden le hiilun, mí le ɲiiya, mí nɛɛ halataalaa kɛsi tumndo-a hiilun yongban-yongban. A toɲa, mí lɛŋnden a halataala biiŋun le tùú Mɛlɛka ndóò tuulu kɔl-lo.

⁹Mí kumnde va ndu fulaa o tɛɛngun lamilinndon nin, mí yinnde kɔltuwlen le va fulaa ndu o sondo, mí dɛngulta sɔngɔɲɔnndan la va fulaa.

¹⁰O kon mí Mɛlɛka nangu halataalaa, mó toal. Kumii tiŋii dikpisiie va ndu o n'pelu mɔku-mɔku.

¹¹Mó hel o mɛlɛkanɔ kanda ɲɛm Hala-on-ndo coo, mó can balɔɔ coocoo. Vanáà ce ndu pɛ aa o kumbannda ihoeilan coo o va ni.

¹²Mó tuisi ɲumndan ndu pila balɔɔ sɔ́, mó lo o mɔ́mndo nin a o yumbuyumbu bɛndoo nin.

¹³Ɲɛ-tengaa bɛndoo va ndu laci, dɛngulta leyinndan la va fulaa lenin.

¹⁴Mí Mɛlɛka deŋi o halataala maa letaŋ, mí Ó-Hiow-Ɲɔɔn-Kpow-vo soli diomndo.

¹⁵Mó vuu kɔɔn, mí yaamɔaa ndɔa sɛŋin, mí piɔɔ voli, mí yaamɔaa ndɔa ɲaanun a siòònde.

¹⁶Mɛlɛka pɛɛliaa, mí mɛmma ihɛllan ma vela mí pee kɔllo fula ceen, mí hoeiye fula ndu o tɛɛngun lamilinndon, mí lɛŋnde tumnden le kalaŋan.

¹⁷O lo o halataala coocoo, mó tuisi baa, mó saa ya, mó soli ya o mɛmma bɛnduan nin.

¹⁸O baŋa ya yaamɔaa nia kpaayaa o ba, vanaa nɔ nɛyɔn nuu, má hiaw ya yoomuan-nda pɛɛn.

¹⁹Mí ndáà ciŋilan ya o paale dɛnɛ palaalen coo, kɛ Mɛlɛka va tiindan nuu ni.

²⁰Mó soli ya, mó kɛsi ya nɛɛ fɛkɛiya, mó baŋa ya, kani i hɛnan ndu.

²¹Mɛlɛka tosal-la mɛɛ sandii nii co yɛ, mó dɔaw ya vɔ̀ngɔ̀ mɛɛ bala nilan la dendu yɛ.

²²Kani i co keelaa o nɛila ndu Mɛlɛka lan coo, i tosa dɛnɛ vɔɔn mì kɔɛ Hala nuu levil te.

²³I co silala Mɛlɛka yɔngu lan kpow biyɔɔ, i co faŋan o pɛɛkula ndɔlan coo le.

²⁴I yɔŋnun vana sakpoo a ndu, mí mandan le dɛnɛ vɔɔndo tosaa.

²⁵O kon mí Mɛlɛka dɔaw ya vɔ̀ngɔ̀ le dɛnɛ sandaa nuu, a le diondɔɔ ya dendu ndu o hɔl lo.

²⁶Vana lo pɛ o diomnden coo a nɔm, nɔm Mɛlɛka bɛɛ lo o diomnden coo a ndu. Vana yɔŋnun pɛ sakpo a nɔm, nɔm bɛɛ cɔm vana kon sakpoyɛi nɔmnde.

²⁷Vanndo va pɛ vana diandaa, nɔm bɛɛ cɔm ndu diondɔɔ nɔmndo, kɛ vanndo va pɛ vana muuluanndo, nɔm bɛɛ cɔm ndu maa a caa muulɔnndo.

²⁸Nɔm ciindiaa vanaa co o sangaa nin-nda ni, nɔm tofa vanaa kuundiannda ni ciŋ, mà tuisi nda siɛmbulan.

²⁹Mɛlɛka nɔm co ɲɛ ni tengaa ni, nɔm teengiaa ya o ɲumndan nin ni.

³⁰Te nɔm co pɛ ya ikɛi, i nɔla mì del vanaa co a ɲɛm cɔwvon o ba-a coo. Te nɔm Hala nuu co pɛ a ya latulu, i nɔla mì huulu o kpakio coo.

³¹Hala ndu, nɛi ndɔɔ tiwnun, sɔɛi Mɛlɛka-e co idiandaa válán. Ndu co vana kanda vanaa viannun ndu o ba bɛngu-a kpow-vo ni.

³²Nɛ̀ɛ́-nɛ̀ co yɛ Hala, te o co Mɛlɛka le? Nɛ̀ɛ́-nɛ̀ co yɛ pow kpovaa, te o co Hala naa le?

³³Hala ya tiindan ni, ndu co ya simndan laci ni.

³⁴Ndu siinguu pelun nun ni maa pelun puvɛ, ndu simì ya o pembon coo ni.

³⁵Ndu co bala nilan cɔwvo pɛɛkoo ni, ndu co tosaa ni mí bala nilan la caa kpaasiaa idaɲaa kindɔɔ.

³⁶Nɔm Mɛlɛka co ya kandaa le ya ciindiaa ni. A co ya mulullo mí va siŋnɔnndo langbanɔ kálàá.

³⁷Nɔm tosà ni mì keleŋá kɔlan, o kon pelun nun ɲiiyà le.

³⁸I co yaamɔaa nia ɲaanɔnndo kɔɔli, mí va nda diwvo, mɛɛ mi cii nda few malan ya muungu.

³⁹I co nda diwvo, mí va nda vɔɔciaa, a cen ndɛnin lɔ́ɔ́-lɔ́ɔ̀ le. A co ihini lɛŋ lɛ́ɛ́siɛn ya o pelon bɛngu.

⁴⁰Nɔm Mɛlɛka co ya yoomuan lueiyo o cɔwvo nin ni, mí va yaamɔaa nia nɔlaa.

⁴¹Nɔm co yaamɔaa nia tovɔɔ ya laci ni, i co vanaa nɔ nɛyɔn nuu-a diwvo.

⁴²A co tofaa, kɛ vana-vana co le nda baŋa le, a co hɔlla heeloo o Mɛlɛka lo, kɛ o co nda mulul te.

⁴³I co nda cuiyo, mí va nda mingio maa cundu, i co nda nɛwvo mɛɛ vana nɛw loolio o nɛi nuaa yɛ.

⁴⁴Nɔm Mɛlɛka, a co ya baŋaa o sɔngɔla vanaa nia bɛngu, a co ya mandaa vanaa-mangalaa-isɔɔa laci. Vanaa ya sina le-a co o ba nuu bɛngu.

⁴⁵Vanaa súúla celennda co ya sangalaa, i soo dɔ́ɔ́ pɛ a tosa mɛɛ ya dimi yɛ.

⁴⁶Mialaa kan fula mayoomu, a co boŋiboŋio le yɔlɔn nda yii nda-on.

⁴⁷Mɛlɛka co yoomu! Sangalaa co le Pow kpova nuu! Màá Hala nɔ cinda nuu o ba-o sɔla lisaa!

⁴⁸Hala kon cɛl ni mì mingi màá, ndu tuisi vanaa súúla celennda ya o ba bɛngu ni.

⁴⁹Mɛlɛka, nɔm hɛlu ya yaamɔaa nia o ba ni, nɔm yɔŋ mí nɔla vanaa nɔ nɛyɔn nuu-a, nɔm puu ya vanaa kɔlvesɛiya o ba ni.

⁵⁰Lelan, Mɛlɛka, i sangalanin nɔm vanaa-mangalaa-isɔɔa kpow tɛɛn, mì lisa diola nɔmndan o condon nin.

⁵¹Mɛlɛka tosa dɛnnda bɛndulan le masa o hɛli-o baŋaa, o lo o diomnde ndɔlen coo a masaa o pɔla-o, David pɛɛn, a polale ndɔlen ndu kɔɔli le fɛɛn a fɛɛn.»