Read Kissi 2Samiɛl 23 Bible Online

2Samiɛl 23 - Kissi bible

2Samiɛl 23

¹Sɔɔn mɛɛlan David soo-on yɔŋnun mun ni: «Diomnda mɛɛlaala David, po Yisai-yo dimi lan la co lan ni, sɔɔn vana bɛndoo soo-on yɔŋnun mun ni, vana Hala Yakɔb-o pɔla mó siinguu ndu masaa-o, ò Israɛlla lisa taw o condon nin-ndo:

²Kɔl Mɛlɛka-o kei a ya mó va sɔɛi, o handu sɔɛi ndɔɛi ya o lediɛɛmu.

³Hala Israɛlla soo, pow kpova Israɛlla dimul-la aa: ‹Masa co masalen tosaa vanndacieea coo a sandei-yo, masa co masalen tosaa nda coo a siòòŋii Hala-e-o,

⁴maa ɲɛ-tengaa paale siaa masa kon co ni, maa ɲɛ téngà tuma yumbuyumbu ve coocoo loo o co ni. Piɔɔ sia pɛ mì ɲɛ-tengaa kon fula, hangulu ndɔɔ tòsá bil kiyɛiyo fula lɛŋ.

⁵Lende Hala co tosaa a yungu nuu ni: kani o yiilu ya kpema fɛɛn-fɛɛndo, o co o bɛɛndiaa ɲɛkɛndɛi, o co vɛlɛ o mandaa ɲɛkɛndɛi. O co cinda nuu a ɲɛ hɛnan ya-o solio mɛɛ ɲɛ và vulɔɔ.

⁶Kɛ vanaa vo Hala le-a nda, maa yɔm n'yɔɔ vana viaw-vo nda kpow co ni, ò vana cue a ba loo pɛɛn.

⁷Vana pilan ndu le, fɔ ma nɔ baw icilinndo o ba, te kon te fɔ ma nɔ piaw bállo o ba le tiindanndo. Yɔm n'yɔɔ vaa lende yɛ, o foofo vana loam ndu ni mungén![41]›»

⁸Diola kuubaa cɔvaa va David o ba bɛngu-a la co lan ni[42]: Yosɛb-Basebɛt[43] Hakemoniinɔ, o kunda vanaa mandaa masaa nin o va ni. Nuaa ndáà veelu vɛlɛ ndu ni aa Adino Ɛsniinɔ. Ndu dii vannda kɛmɛ leŋɔmaa o lepilɔɔ ni.

⁹O ndu kɔɔli, Eleasar po Dodo-o, po imama Ahohiinɔɔ pum. O va vana pilɛ o vanaa cɔvaa kɔɛ David kɔɔli o cɔwvo, lɔ́ɔ́ o kɔ tiŋ Filistia, mí Filistia kan cuungian le cɔwvo, mí Israɛlla ndáà helnun o pembon coo-o-a nin.

¹⁰Ndu Eleasar kon cɛn ni mó diw Filistia háá mí baa kengela ndu, mí ba kalaa baanun o mɔɛi cɔwve. Paale len, mí Mɛlɛka yɔngu Israɛlla yoomuan taw, má nɔla yaamɔɔa. Mí vanaa cɔwva muungu Eleasar o ibuŋ, kɛ le ɲɛ vanaa o diw-va cɔwviaa daama ndáà muungu ni.

¹¹Ndu cɛn pɛ, Samma po Akee Harariinɔ-o. Lɔ́ɔ́ Filistia cuungian Lehi o ciɛi n'cabueende nin le cɔwvo-o, mí vanaa cɔvaa Israɛlla ɲaanun nda.

¹²Kɛ mí Samma kɔ sim o ciɛi kɔllo, mó puusiaa Filistia o fonda kon, mó diw nda. Mí Mɛlɛka yɔngu Israɛlla yoomuan, má nɔla yaamɔɔa.

¹³Paale pum, a telen koavaa, mí vanaa cɔwva nda yáá, fulaa o kunda n'van beleyaa-o nin, a komal David o buululan Adulam nin, kani vanaa cɔvaa Filistia ndáà hin ni, mí ndáà kila dɔ́ɔ́ngɔ́ ndaa o ból va o lɛŋnde Refaimnda nin-ndo nin.

¹⁴David va nɛɛ ndɔa ndóò vennun kan-nda, mí kunda vanaa cɔvaa Filistia pum kɔ bii Bɛtlɛhɛm.

¹⁵Fɔ́ɔ́fɔ̀, mí yeemɛi pum bii David, mó ɲuna aa: «Ko nɛ̀ɛ́-nɛ̀ kɔ cuu yɛnin ya mɛmma co o soon mandaa mamɛnndo nin Bɛtlɛhɛm ciee-lekɔɔ-an le kolɔɔ?[44]»

¹⁶Mí kuubaa cɔvaa yáá-aa kan kɔ fula fɛlɛmɛndɛn o dɔ́ɔ́ngɔ́ Filistia nin, má kɔ kɔandu mɛnndan o soon mandaa mamɛn va kon Bɛtlɛhɛm ciee-lekɔɔ-o nin, má kɔa a man, má yɔngu David. Kɛ David kol man te, mó solul Mɛlɛka man sálàá, mó cuuŋuu man lɛŋ.

¹⁷O kon, mó dimi aa: «Mɛlɛka, i bɛnda mì kol mɛnndan man te. Mɛmndan man, sɔngɔ kooma vanaa pisi yoomu ndaa le kɔlan man kɔndɔɔ-a ma co ni.» O cɛl le man kolɔɔ le few. Dɛnnda bɛndula vanaa cɔvaa yáá-aa kan tosa lan la yɔŋnun ndán ní.

¹⁸Abisai pɔmbɔɔ Yoab[45], po Seruya-o, o kunda vanaa mandaa masaa nin o va ni[46]. Ndu hiŋ bállo ni, mó diw vannda kɛmɛ leyáá. Mó pialnun diolan taw o kunda vanaa yaa kon coo.

¹⁹Mó siŋnun vana bɛndoo vanaa yaa kan coo, mó siŋnun simlacinɔ ndaa. Kɛ o ve o kunda vanaa yaa-a kan nin te[47].

²⁰Benaya, po Yehoyada-o, kuubanɔɔ a vana dialun kalaa o va ni, Kabseɛl ndóò fula ni. Ndu dii kuubaa cɔvaa ŋiɔnda Moab ni. Ndu koni tol vɛlɛ paale pum o soon mandaa mamɛnndo nin ni, mó kɔ dii yàlàá. Paale len, mɛmma n'kpungban ma va delio.

²¹Ndu dii vɛlɛ Esiptenɔ vilɛi-vilɛi óò nɔ bállo o ba-o ni. Mó del ndu coo a cɔlɔbaa, kpélénkpélénndo va ndu Benaya kon o ba, mó hialu Esiptenɔɔ bál ndóò nɔ o ba-o o ba, mó dii ndu a bál ndɔ kon.

²²Dɛnndan ndan Benaya, po Yehoyada-o tosa ni mó sɔla tɔ́ɔ́ bɛndoo o kunda vanaa cɔvaa yáá-a tɛɛn.

²³Ndu hiow tɔ́ɔ́ kɛndɔɔ sɔla o kunda n'van beleyaa-o tɛɛn, kɛ o sulan a vanaa yáá-aa tasea le. Le hee, mí David handu ndu o vanaa va ndu kanda-a tɛɛn.

²⁴Asaɛl pɔmbɔɔ Yoab[48] va o kunda n'van beleyaa-o nin. Vanaa va vɛlɛ o kunda kon nin-nda yɔŋnun haa ni: Ɛlhanan po Dodo fula Bɛtlɛhɛm-ndo,

²⁵Samma Harodiinɔ a Elika Harodiinɔ,

²⁶Helɛs Paltiinɔ, Ira, po Ikɛs Tekoanɔ-o,

²⁷Abiesɛr Anatɔtnɔ, Mebunnai Husatiinɔ,

²⁸Salmɔn Ahohiinɔ, Marai Netofaanɔ,

²⁹Helɛb, po Baana Netofaanɔ-o, Itai po Ribai fula Kibea o polale Bɛnyamɛn-nden nin-ndo,

³⁰Benaya Piratoniinɔ, Hidai fula Nahale-Kas-o,

³¹Abi-Albɔn Arabatiinɔ, Asmavɛt Bahurimiinɔ,

³²Eliaba Saalboniinɔ, poaa Yasɛn-nda, o pilɛ va Yonatan ni,

³³Samma Harariinɔ, Ahiam, po Sarar Arariinɔ-o,

³⁴Elifelɛt, po Ahasbai-yo, po langbanɔ Maakatiinɔɔ pum, Eliam po Ahitofɛl Kiloniinɔ-o

³⁵Hɛsrai Karmɛlnɔ, Paarai Arbiinɔ,

³⁶Yikeal po Natan fula Soba-o, Bani Kadnɔ,

³⁷Selɛk Amɔnnɔ, Narai Beerotiinɔ ndu va vana cuaa ɲɛm cɔvun Yoab po Seruya-o-on ni,

³⁸Ira Yitriinɔ, Karɛb Yitriinɔ

³⁹a Uri Hitiinɔ. Faw-faw, n'van beleyaa a vanaa ŋɔmmɛw nda va ni.