Read Kissi 2Samiɛl 24 Bible Online

2Samiɛl 24 - Kissi bible

2Samiɛl 24

¹Tuma pum, mí Mɛlɛka tuulu vɛlɛ kɔl taw a Israɛlla, mó luei David yiyanndo nin le Israɛlla dɛnɛ bɛnda loo tosallo, mó dimul ndu aa: «Kɔ mà kɔ cɔm Israɛlla a Yudaa tɛ́kpɛ́-tɛ́kpɛ́, mà sɛva nda diolan.»

²Mí masaa dimul Yoab, ó va simlacinɔ vanaa cɔwva mó va ndu ikɛi-yo aa: «Balu o lɛŋnde Israɛl-ten kpow nin, kandɔɔ Dan kɔlan tiiya háá Bɛɛr-Seba, mì la cɔm vannda, mì la sɛva nda diolan kpow. Kani i yeema mì sina mɛɛ vannda co sɛ́lɛ́ yɛ.»

³Mí Yoab dimul ndu masaa aa: «Masaa, màá Mɛlɛka Hala nɔmndo kui vannda mò vangala nda bɛmbɔɔ kɛmɛ, mì nɔm vana ni bɛndoo pila ce nda a lehɔl! Kɛ nɔm yɛ, le yɛɛ nɛ n yeema yɛ le dɛnɔɔ ho tosaa?[49]»

⁴Kɛ mí masaa hiaw Yoab nda caaŋaa ndɔa nda va vanaa cɔwva bollen-nda a sondo. O kon, mí Yoab nda simlacia vanaa cɔwva fula o masaa lo, le kɔlan Israɛlla cɔmndo a nda diolan sɛvaa.

⁵Má taŋ peo Yurdɛn, má kɔ kandu sɛvaa o kobio Aroɛr nin a o kobi co o bóllo ba too-o nin. Má kei o tàndá yungu Kad-o nin, má kɔa Yaesɛr.

⁶Má kɔa o tàndá Kalaad-o nin o lɛŋnde Hitiia nin Kadɛs. Má kɔa Dan-Yaan a o tàndá balu ndu-o nin, má kɔa vɛlɛ o lɛŋnde Sidɔn-nden nin.

⁷Má hiaw laci, má tiiya Tir, kobi va kon o kpakio nin-ndo pɛɛn, má kɔa vɛlɛ o kobila Hiviia a o kobila Kanannda kpow nin, má kɔ tiiya háá Bɛɛr-Seba a ba too, o tàndá Yuda-o nin.

⁸Paangon mún ŋɔmahiɔɔlu a palɛi bidiin nda tosa ni, má cii lɛŋnden balɔɔ, má kɔ tiiya Yerusalɛm.

⁹Mí Yoab hun downun masaa David kona aa: «O Israɛlla tɛɛn, vanaa cɔvaa caa mɔɛi cɔwve hiŋndo ɲɛkɛndɛi-ya va faw-faw vanpiaandua vaalan kɛmɔɔ leŋɔmaa. O Yudaa tɛɛn yɛ, a va faw-faw vaalan kɛmɔɔ leŋuɛɛnu.»

¹⁰O kon kɔɔli, mí kɔllo kandu David fulaa, mí ndu pila yaalan le cɔm o cɔm kon Israɛlla mó sɛva nda-o, mó dimul Mɛlɛka aa: «I cua hakio taw. I tosa bɔɔ dɛnɔɔ maa diɔm. Lelan Mɛlɛka, mal-la haki yandi, ya vana nɔm baalaa.»

¹¹David cɔnɔnndo dɔ́ɔ́ diimandɔɔ, Mɛlɛka ndóò dimúl nin Kad vana-tɛɛngaa-diom Hala-o, ó va vana silaa David-o-o aa:

¹²«Kɔ o David lo, ma dimul ndu aa: ‹Mɛlɛka dimi aa o co nɔm sangalan tan yáá cɔm, mà hɛli o pilɛ. O n hɛlinin-ndo o tuisi nɔm kon coo.›»

¹³O kon mí Kad kɔa o David lo, mó kɔ tɛɛngul ndu diom Mɛlɛka dimi-o. Mó ɲuna David aa: «Yiaan luɛyɔɔ o lɛŋnde nɔmnden nin le vɔsilan tan ŋɔmmɛw-ou, yaamɔaa nɔmnda nɔm tovɔɔ o paangon mún yáá bɛngu-ou, nàà halimaa pum tolɔɔ o lɛŋnde nɔmnden coo le palɛi ndii yaa-ou, cuan-cuaa! O kuɛɛ nɛ n hɛli yɛ? Yiyan ma dimul-la ɲɛ ya kɔ mulul vana vem ya-o-o.»

¹⁴Mí David muli aa: «O sanga kɔl bɛndu-bɛndoo nin ya co nuaa ni. Kɛ o co fisa mì n del Mɛlɛka o ba, yɔŋii naa n del vanacieo o ba. Kani Mɛlɛka ndu caa vanà ɲííye tuinɔnndo taw.»

¹⁵Fɔ́ɔ́fɔ̀, mí Mɛlɛka tuisi nàà halimaa Israɛlla coo kandɔɔ ɲinkon idiiyo háá mí telen Mɛlɛka ndóò kelu kon-ndo cuu. Kandɔɔ Dan kɔlan tiiyaa háá Bɛɛr-Seba, mí vannda vu vaalan belaŋɔmmɛw o Israɛlla tɛɛn.

¹⁶Mɛlɛkanɔ Hala-o siɛndio baa a kpengii Yerusalɛm-nde le Yerusalɛm kon tɛɛmbuuo, mí ɲííye bii Mɛlɛka, mó mangala yiyanndo. Mó dimul mɛlɛkanɔ tɛɛmbua kon aa: «O va nihau nuaa, tuisi baa.» Tuma kon kpafii, mɛlɛkanɔ Hala-o va o kpele lɔaa n'mal Haarawna[50] Yebusiinɔ-o ikɛi.

¹⁷Mɛɛ David ce mɛlɛkanɔɔ vannda diwvo, mó dimul Mɛlɛka aa: «Ya cua hakio ni. Ya tɛɛmbuu tɛɛmbuuo ho ni. Vannda ha[51] tosa dɛnɛ vɔɔn kɛ́-kɛ̀ le. Lelan yandi, tuisi ya pila a yungu nuu sangaa ho coo.»

¹⁸O paale pilɛle len nin, mí Kad vana-tɛɛngaa-diom Hala-o komal David mó dimul ndu aa: «Kɔ o kpele lɔaa n'mal Haarawna Yebusiinɔ-o coo, mà cɔw fonda-loamaa-lasálàá lon le Mɛlɛka.»

¹⁹Mí David kɔa mɛɛ Mɛlɛka dimul Kad le ndu tɛɛngullo yɛ.

²⁰Haarawna lo a maluaŋ, mó ca masaa David nda vanaa ndɔa baalaa hunɔɔ sanaa o ndu lo. Mó bii kɔlan nda demullo, mó kɔ del o kuumbuan lɛŋ masaa o labɛngunin.

²¹Mó ɲuna aa: «Ko vɛ masaa hunɔɔ ho o ya buɛi ndɔɔ lo?» Mí David muli aa: «I yeema mì pendu kpele lɔaa n'mallo ho nɔm o ba le fonda-loamaa-lasálàá cɔvɔɔ le Mɛlɛka, haliko mi kpundɛ tol ho vannda coo-o cuu.»

²²Mí Haarawna dimul ndu aa: «Mɛɛ a ce ndu masaa, ɲɛ-ɲɛ n yeema pɛ le Mɛlɛka sálàá solullo lecoo, a soli. Má cè nawva le sálà loamaa solio! Ɲɛla ɲaanannda cɔlua nan-ndan la co vɛlɛ nanu a yɔmii ndɛi kpow le ciŋaa le sálàá lomɔɔ.

²³I yɔngu nɔm ɲɛm mun kpede masaa. Màá Mɛlɛka Hala nɔmndo cɛl sálà n co hunɔɔ soli-o!»

²⁴Kɛ mí masaa dimul Haarawna aa: «Ɛ-ɛ! Piondɔɔ ya yeema ni mì pendu ɲɛm mun nɔm o ba mɛɛ n nɔ báà yɛ. Kani i yeema mì solul Mɛlɛka Hala nuu sálàá a ɲɛm ya sɔla fondo-on te.» O kon, mí David yɔngu ndu volin latámán beleŋuɛɛnu le kpele lɔaa n'mal kon a navaa kan piondɔɔ.

²⁵Mó cɔaw niko fonda-loamaa-lasálàá lon, mó solul Mɛlɛka sálàla loamaalan a sálàla kɔlɲululan. O kon, mí Mɛlɛka ɲulul kɔl a lɛŋnden, mí kpundɛ ndóò tuisi Israɛlla coo-o cuu.