Read Kissi 2Samiɛl 5 Bible Online

2Samiɛl 5 - Kissi bible

2Samiɛl 5

¹Mí vannda fula o polama yɛ́-yɛ́ma Israɛlla kpow nin, má komal David Hebrɔn, má dimul ndu aa: «Má cè naa! Kooma pilɛan a vanaa pilɛa kpé naa n co naa niaa ni.

²Lɔ́ɔ́ Saul va paandu masaa naa coo-o, nɔm va Israɛlla simndan laci o cɔwvo ni. Nduyɛ, Mɛlɛka cii nin nɔm dimul maa nɔm vanin masa Israɛlla ni, vanaa ndɔa pɛɛn. Nɔm vanin simlacinɔ ndaa ni.»

³O kon mí kaasoŋaa kɔlkalua Israɛl kpow a kɔa Hebrɔn nɛɛ masaa David va-a, mí David yii kpemaa a nda Mɛlɛka o hɔl Hebrɔn ndon. O kon kɔɔli, má pɔla David, mó siŋnun masa Israɛlla.

⁴David ndóò nɔ vɔsilan beleyaa mó siŋnun masaa, mó tosa masalen vɔsilan belehiɔɔlu.

⁵O tosa masalen vɔsilan tan ŋɔmmɛw a tálá o polale Yuda len coo Hebrɔn, mó tosa vɛlɛ masalen Yerusalɛm vɔsilan beleyaa a layàá Israɛlla kpow coo a o polale Yuda len coo.

⁶Mí masaa David nda langbaa ndɔa kuel kobio Yerusalɛm le Yebusiia va o lɛŋnde len nin-nda, mí Yebusiia kan a dimul David aa: «La nɔlanin luɛyɔɔ nanu le, kani vanaa sumɛiya a namtaa a tiwba ma tow niaa!» Kon va dimio ni maa David ndóò nɔlanin kobi kon biyɔɔ le.

⁷Kɛ mí David bii fonda mayoomoo Siɔn, lelan nda ke fonda kon diolan ni aa Kobi David-o.

⁸Paale len David dimi ni aa: «Vana-vana yeema pɛ le Yebusiia nɔlaa, vana kon kei o soon co o lɛŋnden bɛngu-o, mò kɔ fula nɛɛ vanaa sumɛiya a namtaa ya David nɛinun haa taw-va co-a.» Lelan nda dimi ni aa: «Vanaa sumɛiya a namtaa lueinin o Cɛi-Mɛlɛka-o nin te.»

⁹Mí David cal o fonda mayoomu kon nin, mó ke ndu diolan aa Kobi David-o. O kon kɔɔli, mó tangul vɛlɛ fondala mayoomula celen kobi kon balɔɔ sɔ́, kandɔɔ Millo lekɔɔli tiiyaa háá lenin di.

¹⁰Mí David hiaw laci a yoomuan sɔlaa taw, kani Mɛlɛka, Hala-Nɔ-Kpaayaa-Kpow-vo va ndu ikɛi.

¹¹Mí Hiram va masaa Tir-o vim David vannda a yɔmii sɛɛdrei, mó yoo ndu vɛlɛ vanaa cuaa layindɔa a vanaa sialaa lapowva le ndu David cɛi lemasaa tengullo.

¹²O kon mí David sina maa Mɛlɛka pila kɛsi ndu masaa Israɛlla coo ni, a vɛlɛ maa le Israɛlaa, vanaa ndɔa, masale ndɔlen léè va tɔ́ɔ́ fulaa ni.

¹³Mɛɛ David faŋan Hebrɔn mó kɔa Yerusalɛm, mó cua vɛlɛ laandua a sámáá, mí nda bɛɛ vilul ndu hɔ́aa piaandua a à laandua.

¹⁴Diola poaa o velu kan Yerusalɛm-nda la co lan ni: Samua, Sobab, Natan, Salomɔn,

¹⁵Yibar, Elisua, Nefɛk, Yafia,

¹⁶Elisama, Eliada a Elifelɛt.

¹⁷Mɛɛ Filistia tuei maa a cii David pɔla má suili ndu masaa Israɛlla coo, mí nda kpow a can ndu nuwviaa le ndu biyɔɔ. David tueyɔɔ sɔɛi ken, mó kɔ viannun o fonda mayoomoo pum nin.

¹⁸Filistia tiiyaa lon, má kɔ tiw o ból Refaimnda nin.

¹⁹Mí David ɲuna Mɛlɛka aa: «Vɛ̀ɛ̀ o bɛnda mì kɔ del Filistia coo a cɔwvo? A malnin pá nda ya o ba?» Mí Mɛlɛka mulul David aa: «Kɔ! I co nda malɔɔ lekɛ́ndɛi nɔm o ba.»

²⁰Mí David kɔa Baal-Perasim, lon o kɔ nɔla Filistia ni. Mó dimi aa: «Mɛlɛka buli tɛɛngei ya laci o polama yaamɔaa nia tɛɛn maa mɛɛ kandaa piɔl mì mɛnndan ma tol a yoomuan yɛ.» Lelan nda ke fonda kon diolan ni aa: Baal-Perasim (kon co dimi ni aa «Vana bɛndu n'tɛɛngoo»)

²¹Mí Filistia ɲaanun, má mɛi piɔmaa ndaa lon. Mí David nda langbaa ndɔa kɔannun a nda.

²²Mí Filistia can, má hun vɛlɛ le cɔwvo, má sɛŋin, má tiw o ból Refaimnda nin sɔ́.

²³Mí David ɲuna vɛlɛ Mɛlɛka. Mí Mɛlɛka dimul ndu aa: «Kɔa nda laci sanaa a cɔwvo le, kei nda a makɔɔ, mà kɔ fulal nda o bundɛ iyùúo[11] dangalaa.

²⁴Tuma n tuɛinin bɛngulan diom o yúii[12] ken coo-o, a keleŋa cɔnɔn cɔ́-cɔ́. Kani ya Mɛlɛka vanin nɔm fulaa laci lende le vanaa cɔvaa Filistia tolɔɔ coo ni.»

²⁵Mí David tosa mɛɛ Mɛlɛka dimul ndu yɛ. O kon, mó nɔla Filistia, mó toaw nda kandɔɔ Keba kɔlan tiiyaa háá Kesɛr ciee-lekɔɔ.