Read Kissi 2Samiɛl 6 Bible Online

2Samiɛl 6 - Kissi bible

2Samiɛl 6

¹Mí David cuungiaa vɛlɛ vanaa cɔvaa Israɛlla, a va vaalan beleyaa,

²má can Baale-Yuda nda David-aa le kɔlan hunɔɔ a kesu kpema Hala-o, o ndáà pial diola ndɔlan coo-o, diola Mɛlɛka-Nɔ-Kpaayaa-Kpow-vo lan pɛɛn, o va o mɛlɛkaa kanda ɲɛm Hala-on-nda tɛɛn o kesu kpemaa coo-o.

³O pembei coo, o Abinadab lo cɛinin kesu kpema kalaa va ni. Má kɔ vow ndu o ɲɛ ɲaanan sɛnɛi soa nan-ndo nin, má kɔa a ndu. Poaa Abinadab-a, Usa nda Ahio, a va kɔlan a ɲɛ ɲaanan sɛnɛi

⁴kesu kpemaa va kon nin-ndo ni. Ahio va kɔlan laci.

⁵David nda Israɛlla kpow a va ɲaaloo dɔwnɔnndo Mɛlɛka o hɔl, má va ɲɛm-caan súú-súù ka lɔɔ, ɲɛm-caan nda toosiaa a yɔmii siprɛsiei-yon, bɔ̀linndan, bangalan, dundulan, bondomalan a kɛ́ŋndon.

⁶Ndáà tiiyaa o kpele lɔaa n'mallo Nakon ikɛi, mí nawva siɛla, má va le kesu kpema Mɛlɛka-o malɔɔ. Mí Usa siɛndi baa, mó saa ndu.

⁷Le hee, mí Mɛlɛka tuulu kɔl a Usa taw, mó lɔaa ndu le dɛnɛ o tosa kon o yiyan too. Mí Usa sɔla piɔ́mndo o kesu kon ikɛi lon.

⁸Mí David tambu kɔllo le tùú Mɛlɛka lɔɔ Usa mó vu-o. Lelan nda ke fonda kon diolan ni aa Perɛs-Usa (kon co dimio ni aa «Fonda Usa sɔla lɔɔ-o)», diola lan fonda kon nɔ vɔ háá paalen nden ni.

⁹Mí siòònde bii David ɲinkon taw a Mɛlɛka, mó dimi aa: «I yeema mì luei kesu kpema Mɛlɛka-o o ya lo cɛinin te.»

¹⁰O cɛl le kesu kpema Mɛlɛka-o mandaa o ndu lo cɛinin te, o Kobi David-o nin pɛɛn. Kɛ mó kɔ kɛsi ndu o Obɛd-Edɔm fula Kat-o lo cɛinin.

¹¹Mí kesu kpema Mɛlɛka-o tosa paangon mún yáá lon. Mí Mɛlɛka dɔaw Obɛd-Edɔm kon duaa a vanaa ndɔa kpow.

¹²Mɛɛ vannda kɔ dimul masaa David maa Mɛlɛka dɔw Obɛd-Edɔm duaa a vanaa ndɔa kpow le tùú kesu kpema Mɛlɛka-o va o ndu lo-o, mí David kɔa o Obɛd-Edɔm ndo, mó kɔ cua kesu kpema kalaa, mó muungu a ndu o kobi ndɔɔ nin a ɲaale bɛndu-bɛndoo.

¹³Mɛɛ vanaa va kɔlan a kesu kpema Mɛlɛka-o-a nɛi dɔ́ɔ́ bɛngoo leŋɔmpum o kɔlan, mí David soli sálàá a naw tovaa o pilɛ a á naw téndé celulaa o pilɛ.

¹⁴O kon, mó tundun yolan Mɛlɛka o hɔl a yoomuma ndɔan kpow. Doma ifalen solia lasálàá toosian a kola keesoo-o daama va ndu lekɔɔ ni.

¹⁵Mí David nda Israɛlla kpow a heelu a kesu kpema Mɛlɛka-o a kponyoo a á bululan hɔŋndo.

¹⁶Tuma nda va kesu kpema Mɛlɛka-o lueiyo o Kobi David-o nin-ndo, mí Mikal, cua Saul-lo va tofaa o dio-pɔmbɔɔ. Ndóò cɔu masaa David huuloo a hiŋnɔnndo Mɛlɛka o hɔl, mó pɛɛsa ndu o kɔl ndɔɔ nin.

¹⁷Mɛɛ nda hin a kesu kpema Mɛlɛka-o, má kɛsi ndu o fonda ndɔɔ o cɛi-kola-toandaa David ndóò tondu le ndu kɛsio lenin-ndo nin, mí David solul Mɛlɛka sálàla loamaalan a sálàla kɔlɲululan.

¹⁸Ndóò ciiyo sálàla lan solio, mó dɔaw vannda duaa o diola Mɛlɛka-Nɔ-Kpaayaa-Kpow-vo lan.

¹⁹O kon kɔɔli, mó piɔw vannda kpow ɲɛdiaa, Israɛlaa piaandua a à laandua va lon sɛ́lɛ́ bɛndoo-a pɛɛn, mí vana-vana sɔla buloo o pilɛ, dɛɛ n'tamaro toaŋaa o pilɛ a dɛɛ n'rɛsɛn toaŋaa o pilɛ. O kon, mí nda kpow, vana-vana muungu o ndu lo.

²⁰Tuma David va muungoo o ndu lo bɛɛ le yungu ndɔɔ duaa dɔvɔɔ-o[13], mí Mikal, cua Saul-lo hinul ndu, mó dimul ndu aa: «Àá masa Israɛlla! O tosa hau dɛnɛ lebɛɛ fɔ́! Mó fula kɔɔle fondo cɛa laandua buɛyaa ndɔa piaandua o hɔl maa vana fondo.»

²¹Mí David mulul ndu aa: «Mɛlɛka o hɔl ya tosa lende ni. Kani ndu Mɛlɛka mal fuɲa nɔm a yungu ndɔɔ kpede ni, mó hɛli ya, mí siŋnun simlacinɔ vanaa ndɔa, Israɛlla pɛɛn. Lelan le ndu Mɛlɛka ya viaw kponyoo ni.

²²I co vɛlɛ bɛɛ cɔɔlu dɔɔnian mò hiow hoo, mì tuisin ya pila o hɔl. Le cɛa laandua n co yɛ kan dimio-a nda, a co cɔu maa vana bɛndoo ya co ni.»

²³Mikal, cua Saul-lo vi lende o vilu cua le.