Read Kissi 2Samiɛl 9 Bible Online

2Samiɛl 9 - Kissi bible

2Samiɛl 9

¹Paale pilɛ, mí David dimi aa: «Vɛ̀ɛ̀ vana pum lo vɔ yoomu o polale Saul-ten nin? I yeema mi peelu diomnde nilen a ndu le Yonatan.»

²Nduyɛ yungu Saul-lo ndóò nɔ buɛiyo pum diolan Siba, má hun a ndu o David lo, mó ɲuna ndu aa: «Poo nɔm co Siba ni?» Mó muli aa: «Oi, masa nuu.»

³Mí masaa ɲuna ndu vɛlɛ aa: «Vɛ̀ɛ̀ vana pilɛ bɛɛ lo lɛ yoomu fulaa o polale Saul-ten nin te? I yeema mi tosal ndu dɛnɛ kɛndɛ Hala-o.» Mi Siba mulul masaa aa: «Po Yonatan-ndo pilɛ co vɔ icali, vana bɛvɛiyo o co ni.»

⁴Mí masaa ɲuna aa: «Kuɛɛ nɛ o co yɛ?» Mí Siba muli aa: «O co Lo-Debar o Makir, po Amiɛl-lo lo cɛinin.»

⁵Mí masaa David viam kiilaa le kɔlan ndu cuaa nɛɛ o va o Makir, po Amiɛl-lo cɛinin Lo-Debar-a.

⁶Mefibosɛt, po Yonatan-ndo, po imama Saul-lo tiiyaa o David lo, mó del lɛŋ o kuumbuan o kɔl coo masaa o hɔl. Mí David ɲuna ndu aa: «Nɔm co Mefibosɛt ni?» Mó muli aa: «Ya co vana nɔm baala kon ni.»

⁷Mí David dimul ndu aa: «Siòòŋii bii nɔm te. I yeema mi peelu diomnde nilen a nɔm le Yonatan fuɲa nɔm. I co nɔm lɛŋii Saul fuɲa nɔm mama-e mingul kpow. A vanin vɛlɛ lɔ́ɔ́-lɔ́ɔ̀ ɲɛdiaa dioo naa ŋiɔn latulu.»

⁸Mí Mefibosɛt baŋ vulan, mó dimi aa: «Masaa, le yɛɛ n co yɛ buulan bɛndoo ho le ya, ya tun vílɛ́iyo ho?»

⁹O kon mí masaa veelu Siba buɛi Saul-lo, mó dimul ndu aa: «Ɲɛm va le Saul a yungu ndɔɔ kpow-von, i yɔngu Mefibosɛt, po imama vana nɔm bɛndoo mun.

¹⁰Nɔm pila, poaa nɔmnda a buɛyaa nɔmnda, niaa bɛnda le vallo tosaa o yondala lan coo ni, mì la yoo ndu ɲɛm niaa vanin kovɔɔ-on le po vana nɔm bɛndoo baloo dɔvɔɔ. Kɛ naa Mefibosɛt vanin lɔ́ɔ́-lɔ́ɔ̀ dioo latulu ni.» Siba ndóò nɔ poaa tɔ́ a à ŋuɛɛnu a buɛiya bibiin.

¹¹Mí Siba dimul masaa aa: «Ɲɛ-ɲɛ vana ni bɛndoo, o co masaa-o dimi, buɛi nɔmndo co kon kpow tosa.» O kon maa mɛɛ David ndóò dimi yɛ, mí Mefibosɛt va niko dioo latulu nda masaa David, maa po ndɔ[19].

¹²Mefibosɛt ndóò nɔ po pɔmbɔɔ pum diolan aa Mika. Mí vanaa va o Siba lo cɛinin-nda kpow a siŋnun buɛyaa Mefibosɛt-a.

¹³Mí Mefibosɛt kɔ cal Yerusalɛm, kani nda masaa va ɲɛdiaa dioo latulu ni. Vana bɛvɛiyo o va ni, pelun miunndon kpow mún tambu ni.