Read Kissi 1Masaa 11 Bible Online

1Masaa 11 - Kissi bible

1Masaa 11

¹Handɔɔ o cua ndóò yil Faraɔnnɔɔ o ba o nɔ̀u nin-ndo coo, mí Salomɔn kaola vanlaandua mangalaa isɔɔa taw: Moabua, Amɔnnda, Edɔmnda, Sidɔnnda a Hitiia.

²Nduyɛ Mɛlɛka ndóò kuuna Israɛlla le vanaa kan, mí ndóò dimul nda aa: «La yil vanlaandua mangalaa isɔɔa o nɔ̀lan te, la cɛl vɛlɛ mì la kɛsi cuavaa niaa laandua vanaa-mangalaa-isɔɔa o ba o nɔ̀lan te, yɔŋii nda nɛlanɛla niaa, mì la mulin halaa ndaa sooloo[27]!» Kɛ o vanaa-mangalaa-isɔaa kan tɛɛn kpeekpei Salomɔn ndu kɔ koendikoendi laandua ni le yeemɛi ndɔɛi.

³Faw-faw, laandua kɛmɛ leŋɔmmɛw a sámáá kɛmɛ leyáá Salomɔn ndóò nɔ ni. Mí vanlaandua kan a mangala ndu kɔllo.

⁴Tuma o yuuva-o, mí laandaa ndɔa kan mingi ndu kɔllo o halaa celennda sooloo. Lelan, o tiw lɛ ba le Mɛlɛka Hala ndɔɔ kaolaa a kɔl ndɔɔ kpow mɛɛ David fuɲa ndɔ ndóò tosa yɛ le.

⁵Mí Salomɔn mulin Astartee, hala laandu Sidɔnnda a Milkɔm, hala lamàà Amɔnnda sooloo.

⁶Mó tosa ɲɛ hɛnan Mɛlɛka loo, o bii diom Mɛlɛka-o ɲɛkɛndɛi maa David fuɲa ndɔ le.

⁷Tuma kon, mí ndu Salomɔn toosiaa fonda-loamaa-lasálàá o pembii co Yerusalɛm o hɔl-ndɔ-e coo le Kɛmɔs, piɔm lamàà Moabua, a le Molɛk[28], hala lamàà Amɔnnda.

⁸Lende o tengul laandaa ndɔa mangalaa isɔaa kan kpow sooluulan le halaa ndaa sooloo ni, mí nda kpede va halaa ndaa kan sálàla cuɛima cun kɛndɛlan a sálàla n'cɔlulan solullo.

⁹Mí Mɛlɛka tuulu kɔl a Salomɔn le tùú ndóò faŋa kɔllo o ndu Mɛlɛka Hala Israɛlla lo-o. Kani mì Mɛlɛka ndóò cɔmnun ndu háá bɛmbɛ lediin,

¹⁰mí ndóò kuuna ndu le halaa celennda sooloo o cɔmnɔn bɛmbɛ lediin o cɔmnun ndu kon-ndo nin. Kɛ Salomɔn bii diom Mɛlɛka dimul ndu-o le.

¹¹O kon mí Mɛlɛka dimul ndu aa: «Le kela n kela hoo-o, le tùú n kɛɛ le kpemaa biyɔɔ-o, le tùú n kɛɛ le tɔŋnda ya yɔngu nɔm-ndan biyɔɔ-o, i co nɔm masalen poonda o ba, mì yɔngu vana nɔm baalaa pum.

¹²Kɛ nduyɛ, le tùú ya kaola David fuɲa nɔm-ndo, i poonda vɔnin masalen nɔm o ba telen n co hoo yoomu-o le, po nɔmndo ya hialunin nden o ba ni.

¹³Le bɛɛle David vana ni baalaa ke ya len a le hɛli ya hɛli kobio Yerusalɛm-ndo, i poondanin po nɔmndo masalen faw o ba le, kɛ i melnin ndu polalen lepilɛ o polama cuavaa Israɛlla tɛɛn.»

¹⁴Mí Mɛlɛka solul Salomɔn yaamɔɔ pum, Edɔmnɔɔ o va ni, diolan Hadad, fulaa o yungu lemasaa nin Edɔm.

¹⁵Tuma David va Edɔmnda cɔlɔbaa-o, mí Yoab, simlacinɔ ndɔ cɔwvo ndóò kɔa Edɔm a vannda pum kɔɔli, le vanaa cɔvaa Israɛlaa vi o cɔwvo-a kumbɔɔ. Mɛɛ o kɔɛ, mó kɔ diw vanpiaandua va Edɔm-nda kpow.

¹⁶Mí Yoab nda Israɛlla kpow ndáà tosa paangon mún ŋɔmpum Edɔm háá má diw vanpiaandua va lon-nda kpow.

¹⁷Kɛ mí Hadad ndóò sɔndan, mí ndóò ɲaanun Esipte a Edɔmaa va buɛyaa fuɲa ndɔa-a. Telen kon yɛ, Hadad vannun ndɔ felengi pɔmbɔ.

¹⁸Má can Madian, má kei Paran, má bii vannda pum ndon, má hiaw a nda o Faraɔnnɔɔ lo, masaa Esipte pɛɛn. Mí masa kon ke Hadad cɛiyo, mó va ndu baloo dɔvɔɔ, mó ke vɛlɛ ndu yondoo.

¹⁹Mí Faraɔnnɔɔ ca Hadad ɲia taw, mó ke ndu bɔla ndɔ[29] laandoo o nɔ̀u nin, pɔmbɔɔ vanalanɔ kɛsii kálàá, Tapenɛs laa ndɔ pɛɛn.

²⁰Mí pɔmbɔɔ Tapenɛs vilul Hadad poo diolan Kenubat. Mí Tapenɛs kalaa manda hɔ́ɔ́ kon o Faraɔnnɔɔ lo cɛinin, mí Kenubat sul nda poaa Faraɔnnɔ kon latulu o ndu lo cɛinin.

²¹Hadad lo Esipte, mó tuɛi maa David dem fuɲaa ndɔa ciee-piɔ́m, maa Yoab simlacinɔ vanaa cɔwva bɛɛ vi. O kon, mó dimul Faraɔnnɔɔ aa: «Mal-la n'pelu mì kɔɛ, mì muungu o lɛŋnde nilen nin.»

²²Mí Faraɔnnɔɔ ɲuna ndu aa: «Yɛɛ nɛ co yɛ nɔm pɛŋnden nanu ma va yeemɛi le muungoo o lɛŋnde nɔmnden nin?» Mó muli aa: «Ɲɛ-ɲɛ co ya lepɛŋ te, kɛ o va bɛɛ lende, cɛl-la mì kɔɛ.»

²³Mí Hala solul vɛlɛ Salomɔn yaamɔɔ celen diolan Resɔn, po Eliada-o. Resɔn kon, ɲaanɔnndo ndóò ɲaanun vana ndɔ bɛndoo ni, Hadadesɛr va masaa Soba-o pɛɛn.

²⁴Tuma David va vanaa cɔvaa Hadadesɛr-a diwvo-o, mí Resɔn cuungiaa langbaa sɛ́lɔ́ɔ́ taw, mó sim nda laci, má can má kɔ cal Damas, má va masalen tosaa lon.

²⁵Salomɔn vi lende, Resɔn fula o yaamɔɔle ndɔlen nin te. Dɛnɛ Hadad tosa-o yɔŋnun hoo ni: ndóò nɔ nɛyɔnndo taw a Israɛlla, o va vɛlɛ masalen tosaa Aram[30].

²⁶Yeroboam, po Nebat fula Sereda o polale Efraim-nden nin-ndo o yɔŋnun ni. Kala ndɔ yɔŋnun Serua ni, pɔnɔ ndɔ ve lɛ yoomu le. Yeroboam kon va vana pilɛ o buɛyaa Salomɔn-nda tɛɛn, kɛ telen pum mó simul Salomɔn.

²⁷Tofa vɔ mɛɛ o looku Salomɔn simul-lɛ: lɔ́ɔ́ Salomɔn va fonda ndáà veelu aa Millo-o cɔvɔɔ a tɛɛngun va o kpaki Kobi David fuɲa ndɔ-o-on baŋullo-o,

²⁸mí Salomɔn dɔaw Yeroboam kalaa taasi mɛɛ o va baalaa a dialun fulan yɛ, mó handu ndu bolle vanaa vilia lavolɔɔa, áà fula o polale Yosɛf len nin-nda. Kani yoomuan pila ndóò nɔ ni.

²⁹Paale pum, Yeroboam va fulaa Yerusalɛm, má kei bɔŋan o nɛi nda Ahiya fula Silo-o, Ahiya vana-tɛɛngaa-diom Hala-o pɛɛn. Doma sɛnɛiyo va Ahiya kon lekɔɔ. Nda ŋiɔn kpé va yondoo nin ndon ni.

³⁰Mí Ahiya bii doma sɛnɛi va ndu Ahiya kon lekɔɔ-o, mó sɛɛsiaa ndu pɛngɔn tɔ́ a n'miun.

³¹Mó dimul Yeroboam aa: «Cua pɛngɔn tɔ́, mì mun va le nɔm. Kani Mɛlɛka Hala Israɛlla dimi ni aa: ‹I co hunɔɔ Salomɔn masalen hiɔlɔɔ o ba, mì ke nɔm polan tɔ́.

³²Kɛ i melnin ndu polalen ten pilɛ kpé le kaola ya kaola David vana ni baalaa-o, a le hɛli ya hɛli Yerusalɛm o lɛŋnde Israɛl-ten nin kpow-vo.

³³I tosanin kon le tùú Israɛlla mulul-la kɔɔ, mà muungun Astartee, hala laandu Sidɔnnda, Kɛmɔs, hala Moabua a Milkɔm, hala Amɔnnda sooloo-o, a le tùú nda kɛɛ le kelaa o nɛila nilan coo má kɛɛ le dɛnɛ sandaa tosaa ya o hɔl-lo. A cɛl vɛlɛ le tɔŋndan a silala ndóò dimul nda lan biyɔɔ maa David fuɲaa ndu Salomɔn te.

³⁴I poondanin Salomɔn masalen kpow o ba le. Háá a piɔ́m ndɔɔ, i siinguunin ndu masaa vanaa nia coo le David vana ni baala, o ya hɛli-o. O bii silala nilan a tɔŋnda nilan-ndo.

³⁵Kɛ po ndu Salomɔn-ndo o ba ya poondanin masalen ni, mì ke nɔm polan tɔ́, ma tosa masalen nda coo.

³⁶Kɛ i kenin po ndɔɔ polalen lepilɛ, haliko mi polale David len le lo o kpɛŋɛ lemasaa coo ndu o hɔl Yerusalɛm le fɛɛn a fɛɛn, kobi ya pila hɛli le niaa vaa cɔmnɔnndo lon-ndo.

³⁷Nɔm Yeroboam yɛ, i siinguunin nɔm masaa yungula tɔ̀la Israɛlla coo mɛɛ n yeema yɛ.

³⁸Taa yaŋ pɛ nilan o sɔɔn nun kpow, ma kela o nɛila nilan coo, te dɛnnda nɔmndan la sandu pɛ ya o hɔl, taa bii pɛ silala nilan a tɔŋnda nilan mɛɛ David vana ni baalaa tosa yɛ, i vanin nɔm ikɛi, i beŋnin nɔm cɛiyo mò sim yili mɛɛ ya simul David o ndɔɔ yɛ, mì ke nɔm Israɛl.

³⁹Lende ya tuisinin polale David len siɛmbulan ni, kɛ o venin le lɔ́ɔ́-lɔ́ɔ̀ le.›»

⁴⁰O kon, mí Salomɔn can nɛilan nuwviaa le Yeroboam diyɔɔ. Kɛ mí Yeroboam ɲaanun Esipte, mó kɔ vionnun o Sisak masaa Esipte lo. Mó lo Esipte háá mí Salomɔn vu.

⁴¹Dɛnnda tɔ̀la Salomɔn-ndan, ɲɛ-ɲɛ o tosa a kɔlkalu ndɔɔ kpow la co lasɛvaa o sɛbɛ Dɛnnda Salomɔn-ndan nin.

⁴²Vɔsilan belehiɔɔlu Salomɔn tosa masalen Israɛlla kpow coo Yerusalɛm ni.

⁴³O kon kɔɔli, mó vu, má kumbu ndu o Kobi David fuɲa ndɔ-o nin. Mí Roboam po ndɔ koma sul masaa o fonda ndɔɔ.