Read Kissi 1Masaa 12 Bible Online

1Masaa 12 - Kissi bible

1Masaa 12

¹Mí Roboam kɔa Sikɛm, kani Sikɛm lon Israɛlla kpow ndáà cuungian le ndu siinguuo masaa ni.

²Yeroboam, po Nebat-o lo Esipte, nɛɛ ndóò ɲaanun masaa Salomɔn-nda, mó tuɛi a bɔŋan kon Sikɛm o kɔɔ.

³Má viam vannda le kɔlan ndu veeloo, mó hun. Mí Yeroboam a Israɛlaa cuungian kan-nda kpow a tiiya o Roboam ndo, má dimul ndu aa:

⁴«Biyɔɔ lecɛo tuŋ fuɲa nɔm va naa ni, mó mal naa o baalala kálà-kálàlan nin, mí masale ndɔlen le kindila naa. Kɛ o laan ndu, nɔm nɔm dɔɔnial naa sanga lecɛ fuɲa nɔm tuisa naa coo-o a volɔɔla lusulaala o handu naa o lebol-tan, mì n tosal nɔm baalaa.»

⁵Mí Roboam mulul nda aa: «La kɔ, mì koma yiyan. Palɛi yaa hiow pɛ, la komal-la nanu.» O kon, mí vanaa kan kɔannun.

⁶Mí masaa Roboam koma ɲuna kaasoŋaa kɔlkalua va Salomɔn fuɲa ndɔ ikɛi telen o va yoomu-o-a aa: «Sila yɛɛ niaa nɔ yɛ le ya le vannda ha mulullo?»

⁷Má mulul ndu aa: «Hau, taa siŋnun pɛ vana baala vannda ha, taa tosa pɛ ɲɛ nda dimi-o, taa dimul nda pɛ sɔɔn kɛndɔn, mɛɛ vanaa kalaa co hunɔɔ siŋnɔn buɛyaa nɔmnda le lɔ́ɔ́-lɔ́ɔ̀.»

⁸Kɛ mí Roboam kɛɛ sila kaasoŋaa kɔlkalua yɔngu ndu-o, mó kɔ ɲuna langbaa felengia va lambi ndɔɔ ma va ndu ikɛi-ya.

⁹Mó dimul nda aa: «Vannda ha ɲuna ya le volɔɔ lusulaa fuɲa nuu handu nda o lebol-lo dɔɔniaa. Vɛ̀ɛ̀ ya mulul-lɛ nda?»

¹⁰Mí langbaa felengia va kan lambi ndɔɔ-a mulul ndu aa: «Mulul vanaa dimul nɔm kan maa fuɲa nɔm bii nda biyɔɔ lecɛo, kɛ nɔm yɔnyɔla nda-a aa: ‹Suei nii pɔmbɔɛi hiow ba fuɲa nuu[31] celullo.

¹¹Lelan, te volɔɔ lusulaa fuɲa nuu ndóò siilu niaa paandu ni, o laan nin, volɔɔ niaa nɔla cua loo ya co niaa siiluu ni. Te a sionnden fuɲa nuu va niaa paandu lɔɔ ni, ya i co niaa hunɔɔ soŋɔ̀ɔ̀ a kɔlule kpeendaalen[32].›»

¹²Paale yàándɔlen, mí Yeroboam nda vannda kpow a muungu o Roboam ndo. Kani lende ndóò dimul nda ni.

¹³Ndáà kɔlan, o kɔ mulul nda diomnde kɛndɛ le, kani o bii sila kaasoŋaa kɔlkalua yɔngu ndu-o le.

¹⁴Mó mulul nda mɛɛ langbaa nda va lambi pilɔɔ-a ndáà sila ndu yɛ. Mó dimi aa: «Te volɔɔ lusulaa fuɲa nuu ndóò siilu niaa paandu ni, o laan nin, volɔɔ niaa nɔla cua loo ya co niaa siiluu ni. Te a sionnden fuɲa nuu va niaa paandu lɔɔ ni, ya i co niaa hunɔɔ soŋɔ̀ɔ̀ a kɔlule kpeendaalen.»

¹⁵Masaa yeŋ vannda lani le few. Mɛlɛka pila ndóò cɛl le dɛnnda lan tosanndo lende ni, haliko mi diom ndóò dimi a sondo Ahiya, vana-tɛɛngaa-diom Hala fula Silo le Yeroboam, po Nebat-o tɛɛngullo-o ndóò peelun.

¹⁶Mɛɛ Israɛlla kpow a ce maa masaa ve nda lani yaŋɔɔ le, má mulul ndu aa: «Yɛɛ co yɛ naa tɛɛn naa David-aa? N nɔ kɛ́ latulu naa po Yisai-yo-aa le! Sei! Naa Israɛlla, n muungun o la naa lo cɛinin. Nɔm po David-o ho, a ce cɛi nɔmndo, koma tosa mɛɛ n yeema yɛ.» O kon, mí Israɛlla muungun o la nda lo.

¹⁷Mí Roboam koma lo masalen tosaa Israɛlaa fula o kobila va o tàndá Yuda-o nin-ndan-nda coo.

¹⁸O kon kɔɔli, mí masaa Roboam vim Israɛlaa va icali a ba luaŋ-ndo-a Hadoram va baala lepɔtɔllo bollen-ndo. Kɛ má kɔ vii ndu a powtan, mó vu. Mí masaa Roboam keleŋa helɔɔ o ɲɛ ɲaanan ndɔ soa nan-ndo coo, mó ɲaanun le kɔnndan Yerusalɛm.

¹⁹Nuaa Israɛlaa va icali a ba luaŋ-ndo-a sɛyan a polale David len ni, má lo lende háá paalen nden.

²⁰Tuma Israɛlla kpow a tuei maa Yeroboam muungu-o, má bɔɔŋian, má viam kilaa ndu kɔɔli le hunɔɔ o cuungian nda kon, má kɔ suili ndu masaa Israɛlla kpow coo. Fɔ polale Yuda len daama le lo yungu David-o kɔɔli ni.

²¹Roboam tiiyaa dɔ́ɔ́ Yerusalɛm, mó kɔ cuungiaa vanaa cɔvaa mayoomua vaalan kɛmɛ a belaŋɔmaa, fulaa o polale Yuda len a o polale Bɛnyamɛn-nden nin le kɔlan Israɛlaa tɔ̀a delɔɔ coo a cɔwvo, le nda mingio o masale Roboam, po Salomɔn-ndo len bɛngu.

²²Kɛ mí Hala dimul Semaya, vana-tɛɛngaa-diom Hala-o aa:

²³«Dimul masaa Yuda, Roboam po Salomɔn-ndo pɛɛn, mà dimul vɛlɛ polale Yuda len a polale Bɛnyamɛn-nden kpow aa:

²⁴‹Nuaa Mɛlɛka soo ni aa: La kɔa mì la kɔ del puapilɛa niaa Israɛlla coo a cɔwvo le, kani ya pila cɛl ɲɛ tosan-ndo ni. Lelan la muungu o laniaa lo.›» Ndáà tueyɔɔ sɔɛi Mɛlɛka dimul nda ken-nde, má muungu o la nda lo mɛɛ Mɛlɛka dimul nda yɛ.

²⁵Mí Yeroboam siinguu kobio Sikɛm kobi mayoomoo o tàndà n'pembu Efraim-ndo nin, mó cal lon. O kon kɔɔli, mó can ndon, mó kɔ tangul vɛlɛ kobio Penuɛl.

²⁶Mí Yeroboam dimin o kɔl nin aa: «Te i tosa pɛ mamɔɔlan, masale nilen le co muungu o David lo cɛinin.

²⁷Kani te vannda ha lo pɛ kɔlan Yerusalɛm le sálàlan solio o Cɛi-Mɛlɛka-o nin, kɔlta ndalan la co hunɔɔ mulin o vana nda bɛndoo lo, Roboam masaa Yuda pɛɛn, mà mululun ya, mà dii ya, o kon mà mulin dɔ́ɔ́ o ndu Roboam masaa Yuda lo.»

²⁸Le hee, mí masaa Yeroboam nuwviaa nɛilan, mó cɔaw navaa téndéa nda ŋiɔn a sianion, mó dimul vannda aa: «Éé Israɛlla! O co lɛhau le niaa kandu sangaa le kɔlan Yerusalɛm te. Lelan, la tofa vɔ halaa niaa, a soli niaa o lɛŋnde Esipte len nin-nda!»

²⁹Mó kɛsi navaa n'siania kan o pilɛ Betɛl o pilɔɔ Dan.

³⁰Mí dɛnɛ kon siŋnun pow boŋaa le vannda malɔɔ o hakio nin. Mí vannda yaa nawvo pilɔɔ a kponyoo háá Dan.

³¹Mí Yeroboam tangul cɛila máánndan, mó hɛli vanaa fula o polale Levii len nin te-a vannda tɛɛn, mó siinguu nda vanaa-solia-lasálàá.

³²Mó handu kafoo o paale tɔ́ a leŋuɛɛnundɔlen coo, o paangii ŋɔmaandɔɛi nin. Mí kafo kon tosan mɛɛ kafo va tosanndo Yuda-o va yɛ. Mí ndu pila soli sálàlan o fonda-loamaa-lasálàá coo. Nuaa o tosa Betɛl ni, mó solul navaa ndóò cɔw-va sálàlan, mó kɛsi vanaa-solia-lasálàá ndóò hɛli-a a pum Betɛl lon le cɛila máánnda ndóò tangul lon-ndan.

³³O paale tɔ́ a leŋuɛɛnundɔlen coo, o paangii ŋɔmaandɔɛi nin, mí Yeroboam tosa kafoo Betɛl le Israɛlla. Kani lɔ́ɔ́ ndu pila ndóò yem le kafo kon-ndo va kon ni. Kafoo tiiyaa, mí ndu pila soli sálàlan o fonda-loamaa-lasálà ndóò cɔw le ansan lomɔɔ-o coo.