Read Kissi 1Masaa 15 Bible Online

1Masaa 15 - Kissi bible

1Masaa 15

¹O vɔsi tɔ́ a ŋɔmaandɔɔ o masale Yeroboam, po Nebat-o len bɛngu, mí Abiyam siŋnun masaa Yuda.

²Mó tosa masalen vɔsilan tan yáá Yerusalɛm. Kala ndɔ va Maaka cua Abisalɔm-ndo[35] ni.

³Mí ndu bɛɛ tuula fuɲa ndɔ, mó tosa hakila fuɲa ndɔ tosa lɔ́ɔ́ kon-ndan. Kɔl ndɔɔ ve Mɛlɛka Hala ndɔɔ coo kpow mɛɛ David fuɲa ndɔ mamaa ndóò yɔngu Mɛlɛka kɔl ndɔɔ kpow yɛ le.

⁴Kɛ a kon kpede, mí Mɛlɛka Hala ndɔɔ yiyan ndu coo le David, mó ke ndu ɲɛ-tengaa Yerusalɛm, mó solul ndu po óò loonin masalen o fonda ndɔɔ-o. O tosa kon haliko mi Yerusalɛm ndóò lo kobi lebol lemasaa.

⁵Kani faŋanndo o dɛnɛ Uri Hitiinɔ-o kɔɔli, dɛnnda sandaalan kínɛí David va tosaa Mɛlɛka o hɔl ni. O vi lende, o mel silala Mɛlɛka yɔngu ndu lan te.

⁶Roboam vi lende, cɔwvo tuŋ va nda tɛɛn nda Yeroboam ni.

⁷Sɔɔn tɔ̀un Abiyam-ndon a ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Yuda nin.

⁸Mɛɛ Abiyam dem fuɲaa ndɔa ciee-piɔ́m, má kumbu ndu o Kobi David-o nin. Mí Asa po ndɔ koma sul masaa o fonda ndɔɔ.

⁹O vɔsi bidiinndɔɔ o masale Yeroboam masaa Israɛl-ten bɛngu, mí Asa siŋnun masaa o tàndá Yuda-o coo.

¹⁰Mó tosa masalen vɔsilan belehiɔɔlu a ò pilɛ Yerusalɛm. Maaka kala ndɔ ndóò nɔ diolan ni[36].

¹¹Mí Asa tosa ɲɛ bɛnda Mɛlɛka o hɔl-lo mɛɛ David fuɲa ndɔ mamaa tosa yɛ.

¹²Mó cii vanaa va suunda soolaa n'piɔmndo-a o lɛŋnden nin, mó tɛɛmbuu vɛlɛ piɔmaa fuɲaa ndɔa mamaa ndaa cɔw-va kpow.

¹³Mó faŋa hali Maaka kala ndɔ bolle vanlaandua le tùú Maaka ndóò sɛl piɔmndo le hala laandoo Asera-o. Mí Asa pesipesi sungbule len, mó loam-nden o pee pɔmbɔɔ Sedrɔn kɔngɔ.

¹⁴Asa ndóò kaola Mɛlɛka a kɔl ndɔɔ kpow, kɛ o vi lende, o faŋa tombun soolan te.

¹⁵Mó kɔa a ɲɛm fuɲa ndɔ ndóò yɔngu le vali Mɛlɛka-o-on a n ndu pila ndóò yɔngu-on o Cɛi-Mɛlɛka-o nin: volion, sianion a ɲɛm celen.

¹⁶Asa vi lende, cɔwvo cuu ndu tɛɛn nda Baesa va masaa Israɛl-lo le.

¹⁷Mí Baesa va kon masaa Israɛl-lo luɛi a cɔwvo o tàndá Yuda-o nin, mó kɔ kungulan Rama ciee, mó va ciee kon kungaa le Asa masaa Yuda kuunaa kɔlan ndon.

¹⁸Mí Asa cua volion a sianin tɔ̀un va o Cɛi-Mɛlɛka-on nin-ndon kpow a bolofaa va o masaa lo cɛinin-ndo, mó viam vanaa bɛndua va ndu o ba bɛngu-a a mun Damas o Bɛn-Hadad, po Tabrimɔn-ndo lo, po imama Hɛsiɔn va masaa Aram-ndo pɛɛn. Mó viam nda le kɔlan ndu dimullo aa:

¹⁹«Kpemaa co naa tɛɛn naa nɔm, kani kpemaa va fuɲa nuu nda fuɲa nɔm tɛɛn. Lelan, má cè mɛɛ ya yɔ́ŋ nɔm volion a sianion yɛ. Kɔ ma kɔ tɛɛmbuu kpema co niaa tɛɛn niaa Baesa masaa Israɛl-lo, haliko mo faŋan o ya lo».

²⁰Mí Bɛn-Hadad cɛl diom masaa Asa dimul ndu-o, mó viam simlacia vanaa ndɔa cɔwva, má kɔ del kobila va o lɛŋnde Israɛl-ten nin-ndan coo a cɔwvo. Má nɔla Iyon, Dan, Abɛl-Bɛt-Maaka, tàndá Kinnerɔt-o a tàndà tɔ̀ Nɛftali-o kpow.

²¹Lɔ́ɔ́ Baesa tuei sɔɛi ken-ndo, mó mal Rama kungaa, mó muungu, mó kɔ cal Tirsa.

²²O kon, mí masaa Asa veelu Yudaa kpow, vana-vana lo kɔɔli le, le kɔlan powtan a pɛngɛn Baesa ndóò cuungiaa Rama le tangullo-on vilio le kɔlan tangul celen Keba, o tàndá Bɛnyamɛn-ndo nin a Mispa.

²³Sɔɔn tɔ̀un Asa-on, cɔwla bɛndula o nɔla lan a ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Yuda nin. O yuuvɛi ndɔɛi nin, mí nàà n'peloo bii ndu.

²⁴Ndóò vuo, má kumbu ndu o fonda ndáà kumbu fuɲaa ndɔa mamaa-o, o Kobi David fuɲa ndɔ mama-o nin. Mí Yosafat po ndɔ koma sul masaa o fonda ndɔɔ.

²⁵Asa tosaa masalen vɔsilan tan tiɔn o tàndá Yuda-o coo, mí Nadab po Yeroboam-ndo siŋnun masaa Israɛlla coo. Mó tosa masalen vɔsilan tan tiɔn.

²⁶Kɛ mí ndu bɛɛ tosa ɲɛ hɛnan Mɛlɛka loo mɛɛ fuɲa ndɔ tosa yɛ. Mó luei Israɛlla o hakio nin mɛɛ fuɲa ndɔ tosa yɛ.

²⁷Lɔ́ɔ́ Nadab nda vanaa cɔwva Israɛl del Kibetɔn va o lɛŋnde Filistia nin-ndo coo a cɔwvo-o, mí Baesa, po Ahiya fula o polale Isakar len nin-ndo yii masaa Nadab dúmbú, mó dii ndu.

²⁸O vɔsi yàándɔɔ o masale Asa va masaa Yuda-o len bɛngu Baesa dii Nadab ni, mó koma sul masaa o fonda ndɔɔ.

²⁹Baesa siŋnɔnndo dɔ́ɔ́ masaa, mó diw yungu Yeroboam-ndo kpow, o mɛi vana-vana yoomu le, mɛɛ Mɛlɛka ndóò dimi a sondo Ahiya, vana ndɔ baala fula Silo-o yɛ.

³⁰Le tùú Yeroboam ndóò tosa hakilan, mó mal vɛlɛ Israɛlla o hakila lan nin-ndo kon kpow tosan ni. Kani kɔllo Mɛlɛka Hala Israɛlla ndóò tuulu taw ni.

³¹Sɔɔn tɔ̀un Nadab-on a ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Israɛl nin.

³²Asa vi lende o bɛnda nda Baesa va masaa Israɛl-lo le, cɔwlan tuŋ la va nda tɛɛn ni.

³³Asa tosaa masalen vɔsilan tan yáá o tàndá Yuda-o coo, mí Baesa, po Ahiya-o siŋnun masa Israɛlla kpow. Tirsa o va icali ni, mó tosa masalen vɔsilan bidiin a lahiɔɔlu.

³⁴Kɛ mí ndu bɛɛ tosa ɲɛ hɛnan Mɛlɛka loo mɛɛ Yeroboam tosa yɛ. Mó luei Israɛlla o hakio nin.