Read Kissi 2Masaa 10 Bible Online

2Masaa 10 - Kissi bible

2Masaa 10

¹Vanpiaandua fula o polale Akab len nin-nda va n'van belaŋɔmmɛw Samari. Mí Yehu sɛwviaa sɛbɛlan, mó piɔw lan simlacia, kaasoŋaa kɔlkalua a vanaa va cuavaa vanaa fula o polale Akab len nin-nda mandaa-a. Mó sɛva o sɛbɛla lan nin aa:

²«Niaa o ba poaa masaa co ni, niaa o ba ɲɛla ɲaanannda soa nan-ndan la co ni, niaa o ba soa a ɲɛm cɔwvon n co ni, la co o calta vanaa cɔwva nin. Te sɛbɔɔ ho komal niaa dɔ́ɔ́ pɛ,

³la kɔ mɛɛndian o poaa masaa tɛɛn, o hiawnin a tɔ̀a naŋɔɔ le vaa masaa-o, la kɛsi ndu o ɲɛ-calaa lemasa fuɲa ndɔ-o coo, o kon la sim la cɔlɔba le yungu masa kalaa.»

⁴Mí siòònde bii vanaa kan taw, má dimulan vellaa-velle aa: «Masaa nda ŋiɔn nɔ́là ndu simullo le, vɛ̀ɛ̀ naa naa n tiw yɛnin ba mì n simul ndu?»

⁵Mí simlacinɔ cɛi lemasaa, simlacinɔ vanaa cɔvaa va o kobio nin-nda, kaasoŋaa kɔlkalua a vanaa manda poaa masaa-a dimul Yehu aa: «Buɛyaa nɔmnda naa n co ni, ɲɛ n dimulnin naa le tosaa-o ndu naa n tosanin ni. N suílìnin vana-vana celen masa le, tosa ɲɛ hɛnan nɔm-ndo.»

⁶Mí Yehu sɛval nda vɛlɛ sɛbɛ diinndɔɔ, sɔɔn va lenin-ndon yɔŋnun mun ni aa: «Te le ya niaa co ni, te la biinin pɛ sɔɛi nii, mɛɛ la kili poaa fula o polale vana niaa bɛndoo nin-nda bolle, mì la hin a ndi siɔdii a telen vaa nuaa o ya lo Yisreɛl nanu.» Nduyɛ, poaa belaŋɔmmɛvaa masaa va vanaa bɛndua va o kobio nin-nda o ba, nda va nda mandaa ni.

⁷Sɛbɛla lan komallo simlacia, má biw poaa belaŋɔmmɛvaa masa kon, ma kili nda bolle kpede. Má vow ndi o kambɛilan nin, má yoo Yehu ndi nɛɛ o va Yisreɛl-la.

⁸Mí kiilanɔɔ pilɛ kɔ downun ndu kona aa: «A hin a bolii poaa masaa.» Mí Yehu dimul nda aa: «La diw ndi kundalan tan tiɔn o dio luɛyaa kobio sondoo háá siɔdii.»

⁹Idiiyo, mí Yehu fula, mó cɔmnun vannda kpow, mó dimi aa: «Niaa kpow, tɛɛmbuu vana-vana co o sɔɛi he nin te, ya yii vana ni bɛndoo dúmbú ni, mí dii ndu. Kɛ nɛ̀ɛ́-nɛ̀ diw yɛ haa kpow?

¹⁰Lelan la sina pɛngu maa sɔɛi-sɔɛi Mɛlɛka dimi pɛ, i del lɛŋ te. Sɔɛi Mɛlɛka ndóò dimi a sondo Elii vana ndɔ baalaa a yungu Akab-o o kɔɔ-e, ndi Mɛlɛka pila cii peelu nuaa ni.»

¹¹Mí Yehu diw vanaa tɔ̀a lo yoomu o yungu Akab-o nin Yisreɛl-la. Mó diw vɛlɛ vanaa baalaa Akab-a, vanayan ndɔn a vanaa ndɔa solia lasálàá, hali vanndo pilɛ bɛɛ o mɛi yoomu le.

¹²O kon kɔɔli, mí Yehu can kɔlan Samari. Ndóò tiiyaa o Cɛi Vanaa-Mandaa-Nsaa bii bɔŋanndo-o,

¹³má bɔŋan nda puapilɛa Ahasia masaa Yuda-a, mó ɲuna nda aa: «Nɛ̀ɛ̀aa niaa co yɛ?» Má mulul ndu aa: «Vanayan Ahasia-on naa n co ni. Poaa masaa a poaa lanɔɔ masaa naa n co kɔlan yilɔɔ ni, poaa Yesabɛl-la pɛɛn.»

¹⁴Mí Yehu deŋi aa: «La biw nda a kiyɛiya!» Má biw nda a kiyɛiya, má diw nda, má viaw nda o soon mandaa mamɛnndo Bɛt-Ekɛd nin. A va n'van belehiɔɔlu a vanaa ŋiɔn. Vanndo pilɛ bɛɛ Yehu mɛi le.

¹⁵Ndóò hiovɔɔ laci, mó bɔŋan nda Yonadab po Rekab-o, o va hunɔɔ ndu laci. Mí Yehu yil ndu, mó ɲuna ndu aa: «Vɛ̀ɛ̀ kɔl nɔmndo co pá sakpo a ya mɛɛ kɔl nuu co sakpo a o nɔmndo yɛ?» Mí Yonadab muli aa: «Oi!» Mí Yehu dimi aa: «Te o co pɛ lende, mɛɛ n yilan.» Má yilan, mí Yehu heelun ndu ikɛi o ɲɛ ndɔ ɲaanan soa nan-ndo nin.

¹⁶Mó dimul ndu aa: «Hun n kɔ, ma ce kaola paŋalaa co ya o kɔl le Mɛlɛka-o.» Má kɔa nda ndu latulu o ɲɛ ndɔ ɲaanan soa nan-ndo nin.

¹⁷Ndáà tiiyaa Samari, mó diw vanaa tɔ̀a lo o yungu Akab-o nin Samari-a kpow, mó cii nda o lepilɔɔ kpede, maa mɛɛ Mɛlɛka ndóò dimul Elii vana-tɛɛngaa-diom Hala-o yɛ.

¹⁸O kon kɔɔli, mí Yehu cuungiaa Samaria kpow nɛɛ pilɛ, mó dimul nda aa: «Akab sooluu piɔmndo Baal ɲɛ-pɔmbɔ, kɛ ya Yehu, i sooluunin ndu hiovɔɔ mɛɛ ndu sooluu ndu yɛ.

¹⁹Lelan la veelu vanaa-tɛɛngaa-diom Baal-la kpow, vanaa ndɔa soolaa a vanaa-solia-lasálàà ndɔa kpow. Vana-vana bɛnda mò lo kɔɔli le. Kani i yeema mì solul Baal sálà bɛndoo. Vana-vana lo pɛ le hunɔɔ, ndu sɔlanin piɔ́mndo.» Nduyɛ, baa Yehu va nda keiyo o mundu ni, haliko mi ndóò diw vanaa co Baal sooloo-a kpow.

²⁰Mí Yehu dimul nda aa: «La yoongu vannda le bɔŋan bɛndoo biyɔɔ le Baal.» Má bii bɔŋanndo.

²¹Mó viam kiilaa o lɛŋnde Israɛl-ten nin kpow. Mí vanaa va Baal sooloo-a kpow a hun, hali vanndo ndu pilɛ lo kɔɔli le, má luɛi o cɛi máán ndáà sooluu Baal nin-ndo nin, má pia cá, kandɔɔ o tumndo háá o bollen.

²²Mí Yehu dimul vana va volɔɔla solia lasálàlan mandaa-o aa: «Soli volɔɔla solia lasálàlan le vanaa co Baal sooloo-a kpow.» Mí langbanɔ kon soli volɔɔla lan kpow.

²³Mí Yehu hun nda Yonadab po Rekab-o, má luɛi o cɛi máán ndáà sooluu Baal nin-ndo nin, mí Yehu dimul vanaa soolaa Baal-la aa: «La mɛɛndian ɲɛkɛndɛi, te vana biilaa Mɛlɛka co niaa tɛɛn nanu le, kani vanaa co Baalla sooloo-a daama bɛnda ni mà va nanu.»

²⁴Mí Yehu kɛsi vanaa cɔwva belaŋɔmaa o dio, mó dimul nda aa: «Vana-vana mal pɛ vanaa ya co niaa haa malɔɔ o ba-a o pilɛ kɔnndan, i dii vana kon o fonda vana o mal-lo.» O kon, mí Yehu nda Yonadab a luɛi le sálàla kɔlɲululan a sálàla loamaalan solio.

²⁵Yehu ciiyo dɔ́ɔ́ sálàla kɔlɲululan a sálàla loamaalan solio, mó dimul vanaa cɔwva a simlacia ndaa aa: «La luɛi mì la diw nda, o pilɛ bɛɛ hialun te dɛ!» Mí vanaa cɔwva diw nda a mɔɔn cɔwvon, má viaw nda o bɛ́ɛ̀. Má luɛi o cɛi máán Baal-lo nin di[10].

²⁶Má soli powta sálàla va o cɛi máán Baal-lo nin-ndan, má loam ndan,

²⁷má sungu pow soolaa nda tɔl o diola Baal-tan-ndo, má komba vɛlɛ cɛi máán Baal kon, má mingi kabinalan tangul o fonda kon, la co vɔ lon háá paalen nden.

²⁸Nuaa Yehu tɛɛmbuu sooluula Baal-tan o lɛŋnde Israɛl-ten nin ni.

²⁹Kɛ a kon kpow, Yehu soli balan o hakila Yeroboam, po Nebat-o va tosaa lan nin te. Nduyɛ, Yeroboam kon ndóò mal Israɛlla o pɔwlan nin ni, má va navaa nda cɔw a sianion-nda sooloo Betɛl a Dan.

³⁰Mí Mɛlɛka dimul Yehu aa: «Le tùú n tosa ɲɛ hɛnan ya-o, má tosal yungu Akab-o mɛɛ hɛnan nuu co yɛ-o, polale nɔmnden le co lo o masalen coo Israɛl háá o lambi hiɔɔlundɔɔ.»

³¹Kɛ a kon kpow, Yehu cɛl le kelaa a kɔl ndɔɔ kpow o tɔŋ Mɛlɛka, Hala Israɛlla-o coo le, o soli balan o pɔwla Yeroboam ndóò mal Israɛlla nin-ndan nin te.

³²O telen kon, mí Mɛlɛka kandu lɛŋnde Israɛl-ten dɔɔniaa. Mí Hasaɛl nɔla Israɛlla o lɛŋnde ndalen kpow nin,

³³kandɔɔ o peo Yurdɛn a ba paalen le can-ndo, a tàndá Kalaad-o kpow, lɛŋii polale Kad len, polale Rubɛn-nden a polale Manase len le va icali nin-nde, keiyo o kobio Aroɛr a ba luaŋ-ndo, kpengii pee pɔmbɔɔ Arnɔn, kɔlan háá Kalaad a Basan.

³⁴Sɔɔn tɔ̀un Yehu-on, ɲɛ-ɲɛ o tosa a yoomuma bɛnduma ndóò nɔ-an kpede, kon co o sɛvaa o sɛbɛ Dɛnnda lemasalan Israɛl nin.

³⁵Yehu vuo, má kumbu ndu Samari o fonda nda kumbu fuɲaa ndɔa mamaa-o. Mí Yoahas po ndɔ koma sul masaa o fonda ndɔɔ.

³⁶Yehu tosa masalen Israɛlla coo Samari vɔsilan bidiin a laŋɔmaa.