Read Kissi 2Masaa 11 Bible Online

2Masaa 11 - Kissi bible

2Masaa 11

¹Atali kalaa Ahasia cɔu maa po ndɔ vi, mó can, mó viam vannda le kɔlan poaa yungu lemasaa kpow diwvo.

²Kɛ o telen nda va vannda diw kon-ndo, mí Yehoseba cua masaa Yoram-ndo, ó va yemaa Ahasia-o, cua Yoas po Ahasia-o nda vana va ndu mandaa-o o vionnɔnndo nin, mó soli ndu o poaa masaa nda va diwvo-a tɛɛn, mó kɔ vian ndu o cɛi lɔlaa nin. Nuaa Yoas sɔla vionɔɔ ni mó faŋan Atali o hɔl, o kon Atali dii lɛ ndu le.

³Mí Yoas nda Yehoseba lo o vionnɔnndo nin o Cɛi-Mɛlɛka-o nin háá vɔsilan tan ŋɔmpum. O telen kon yɛ, Atali va masalen tosaa o lɛŋnde len coo ni.

⁴O vɔsi ŋɔmmɛwndɔɔ nin, mí Yehoyada vana-solia-lasálàá veelu simlacia vanaa cɔvaa Kariia[11] a vanaa cɔvaa cumulaa va o Cɛi-Mɛlɛka-o nin-nda, mó luɛi a nda o Cɛi-Mɛlɛka-o nin, mó yii kpemaa a mɛnanndo a nda o Cɛi-Mɛlɛka kon nin, o kon mó cɔm nda po masaa.

⁵Mó dimul nda aa: «La tuei-yɔ ɲɛ niaa tosanin-ndo: Kunda vanaa bɛnda le baalaa kandɔɔ o paale pɛngiaalen coo-a co baalaa kandɔɔ, nda bɛnda le bɛ́ɛ̀ lemasaa cumullo ni,

⁶kundaa pilɔɔ cumul dio luɛyaa Sur ni, kunda mɛɛlaa cumul dio makɔ̀ɔ́ vanaa cɔvaa cumulaa ni. Kundala yàála lan la vanin singafilianndo o polalen le bɛ́ɛ̀ lemasaa cumullo.

⁷Mì kundala tiɔnnda nɔnin baala o paale pɛngiaalen coo le lan la kɔ cumul Cɛi-Mɛlɛka-o, nɛɛ masaa co-a,

⁸mì la balu ndu sɔ́, mì vana-vana nɔ ɲɛm cɔwvon o ba. Vana-vana tɔɔndan pɛ le niaa sɔɔnguuo ikɛi, ndu sɔlanin piɔ́mndo. Masaa va pɛ fulaa, la fula niaa ndaa, o va pɛ luɛyɔɔ, la luɛi niaa ndaa.»

⁹Mí simlacia va kundala vanaa cɔvaa kɛmɛ-kɛmɛa bollen-nda tosa ɲɛ-ɲɛ Yehoyada vana-solia-lasálàá ndóò dimul nda. Mí vana-vana cua vanaa ndɔa cɔwva, áà bɛnda le baalaa o paale pɛngiaalen coo-a a áà bɛnda le baalaa malɔɔ o paale len coo-a, má kɔa kpow o Yehoyada vana-solia-lasálàá lo.

¹⁰Mí Yehoyada vana-solia-lasálàá piɔw simlacia kundala vanaa cɔvaa kɛmɛ-kɛmɛa báltan a kɔ̀ɔ̀la cɔwlan, lá va paandu le masaa David mí láà va lamandaalan o Cɛi-Mɛlɛka-o nin-ndan.

¹¹Mí vanaa cɔvaa kándà masaa-a sim masaa balɔɔ sɔ́ a ɲɛm cɔvun ndan o laba, má sim o cɛiyo kandɔɔ o kpengii ba kɛndɛi coo kɔlan tiiyaa háá o kpengii ba mɛlle coo, o fonda-loamaa-lasálàá a o cɛiyo holnɔnndo le masaa kandaa.

¹²O kon mí Yehoyada vana-solia-lasálàá veelu Yoas po masaa, mó vow ndu tɔɔmasele lemasaa, mó yɔngu ndu sɛbɛ kpemaa. Má pɔla ndu, má siinguu ndu masaa, má tiam balan, má va dimio aa: «Màá masaa viow yoomu!»

¹³Atali tueyɔɔ vanaa cɔvaa kándà masaa-a a vanaa tɔ̀a diom, mó hun nɛɛ vannda va o Cɛi-Mɛlɛka-o-a.

¹⁴Ndóò mɛɛndianndo, mó ca masaa isisi o sungbulen ikɛi nɛɛ masaa dema lasisi-a, simlacia a vanaa hɔŋaa labulua va ndu ikɛi kpɛɛlun. Mí vanaa va lon-nda kpow a dɔawnun ɲaale, mí vanaa hɔŋaa labulua va bululan hɔŋndo. Mí Atali sɛɛsian volɔɔlan lekɔɔ, mó dimi aa: «A yii ya dúmbú! A yii ya dúmbú fɔ́!»

¹⁵O kon mí Yehoyada vana-solia-lasálàá dimul simlacia vanaa cɔvaa kundala kɛmɛ-kɛmɛa aa: «La faŋa Atali o polan tɛɛn, mí la kɔɛ a ndu. Vana-vana kɔɛ pɛ ndu kɔɔli, vana kon sɔla piɔ́mndo.» Kani mí vana-solia-lasálàá ndóò dimi aa: «O bɛnda ma dii ndu Atali o Cɛi-Mɛlɛka-o nin te.»

¹⁶Mí vanaa cɔwva kɔa a ndu a kpengii bɛ́ɛ̀ lemasaa. Ndáà tiiyaa o Dio-soa, má dii ndu lon.

¹⁷Mí Yehoyada yii kpemaa Mɛlɛka, masaa a vannda tɛɛn haliko mi vanaa kan ndáà lo Mɛlɛka o ibuŋ. Mó yii vɛlɛ kpemaa masaa a vannda tɛɛn.

¹⁸Mí vanaa va o lɛŋnde len nin-nda kpow a kɔ luɛi o máán Baal-lo nin, má tɛɛmbuu ndu, má pesipesi fondala-loamaa-lasálàlan a piɔmaa va lon-nda kpow. Má bii Matan vana-solia-lasálà Baal-lo, má dii ndu o fondala-loamaa-lasálàlan hɔl-ndɔ. O kon kɔɔli, mí Yehoyada kɛsi kundala kpalilla o Cɛi-Mɛlɛka-o.

¹⁹Mí Yehoyada cuungiaa vɛlɛ simlacia kundala vanaa cɔvaa kɛmɛ-kɛmɛa, vanaa cɔvaa Kariia, vanaa cɔvaa cumulaa a vannda kpow nɛɛ pilɛ, má kɔ soli masaa o Cɛi-Mɛlɛka-o nin, má kei a ndu o dio makɔ̀ɔ́ vanaa cɔvaa cumulaa, má kɔa a ndu o cɛi lemasaa nin, mó kɔ cal o kpɛŋɛ lemasaa coo.

²⁰Mí vanaa va o lɛŋnde len nin-nda kpow a va kponyoo a kɔlkɛndɔɔ, mí kobio sɔla nila ɲululan. Atali yɛ, a mɔɛi cɔwve nda dii ndu o cɛi lemasaa nin ni.