Read Kissi 2Masaa 12 Bible Online

2Masaa 12 - Kissi bible

2Masaa 12

¹Yoas ndóò nɔ vɔsilan tan ŋɔmmɛw, mó siŋnun masaa.

²O vɔsi ŋɔmmɛwndɔɔ nin o masale Yehu len bɛngu o lɛŋnde Israɛl-ten coo, mí Yoas siŋnun masaa o tàndá Yuda-o coo, mó tosa masalen Yerusalɛm vɔsilan belehiɔɔlu. Sibia kala ndɔ ndóò nɔ diolan ni, fulaa Bɛɛr-Seba.

³Mí Yoas tosa ɲɛ bɛnda Mɛlɛka o hɔl-lo o ceen ndɔɔ nin kpow, le sila kɛndɛ Yehoyada vana-solia-lasálàá va ndu-o.

⁴Kɛ nduyɛ, tombon mún feŋan o lɛŋnden nin te, vannda va kɔlan sálàla n'cɔlulan solio a ansan lomɔɔ tuŋ o tombon.

⁵Paale pilɛ, mí Yoas dimul vanaa-solia-lasálàá aa: «La cua volin vannda co hunɔɔ o Cɛi-Mɛlɛka-o nin-ndon kpow le baala Mɛlɛka-o. Volin lacuungian a ɲɛm kean vannda pila co hunɔɔ-on.

⁶O bɛnda mì vanaa-solia-lasálàá biw volin mun, vanaa nda siinian-nda o laba, mà luei mun o baalala toosiaa Cɛi-Hala-o nin. Fondala kɛ́-kɛ̀ o tambu, la mingi ndu toosiaa a mun.»

⁷Kɛ háá o vɔsi bidiin a o yàándɔɔ o masale Yoas len nin, vanaa-solia-lasálàá ndáà toosiaa vɔ ɲɛ-ɲɛ o Cɛi-Hala-o nin te.

⁸Mí masaa Yoas veelu Yehoyada vana-solia-lasálàá a vanaa-solia-lasálàà tɔ̀a, mó ɲuna nda aa: «Le yɛɛ niaa kɛɛ yɛ fondala tambu o Cɛi-Hala-o nin-ndan mingi toosiaa? Mɛɛ la bii lɛ volin kɛ́-kɛ̀ vanaa niaa siinian-nda o laba le. Mun co nin va le baalala toosiaa Cɛi-Hala-o lan ni.»

⁹Mí vanaa-solia-lasálàá cɛlan maa a bii lɛnin n'voli vannda o laba le, o ve lɛnin vɛlɛ nda le vanin Cɛi-Hala-o mingio toosiaa le.

¹⁰O kon mí Yehoyada vana-solia-lasálàá cua kesoo, mó buli ndu tɛɛngei o kumboo coo, mó kɛsi ndu o fonda-loamaa-lasálàá ikɛi o ba kɛndɔɔ coo, nɛɛ vannda ndáà kei le luɛyɔɔ o Cɛi-Hala-o nin-nda. Mó dimul vanaa-solia-lasálàá va dio luɛyaa cumullo-a le volin vannda va hunɔɔ o Cɛi-Hala-o nin-ndon vowvo lenin.

¹¹Te ndáà ce pɛ maa volion n co nin calan o kesoo nin, vana sɛvaa masaa ndóò kɔɛ nda bolle vanaa-solia-lasálàá latulu, ndáà kɔ tuu mun.

¹²Te ndáà cii pɛ volion tuu lende, ndáà sɔɔ mun vanaa va baalala toosiaa Cɛi-Hala-o bollen-nda o ba. Mún ndáà cua nin ni mì ndáà sala vanaa va baalaa le Cɛi-Hala-o mingio toosiaa-a ni: vanaa cuaa layindɔa a vanaa tangulaa tɔ̀a,

¹³vanaa cɔavaa a vanaa sialaa lapowva pɛɛn. Mún koni ndáà cua vɛlɛ ni, mì ndáà pendu yɔmii tangulɛi, powta sialaalan a ɲɛ-ɲɛ ndóò bɛnda le piondɔɔ le Cɛi-Hala-o mingio toosiaa.

¹⁴Kɛ nduyɛ, volin ndáà hun mun o Cɛi-Hala-o nin-ndon, o co a mún te ndáà toosiaa ɲɛlan ndan te: kpángàla n'volilan, mɔɔn, taalala kólaalan, bulula hɔŋaalan, te kon te ɲɛ-ɲɛ celen nda cɔaw a sianion a á volin humbon.

¹⁵Vanaa va baalaa le Cɛi-Hala-o mingio toosiaa-a kínɛí ndáà ke mun ni kpow, haliko mi ndáà luei mun o baala toosiaa Cɛi-Hala-o nin.

¹⁶Hɔlte ve bɛɛ vanaa ndáà yɔngu volion le vanaa baalaa salaa-a kɔɔli le, kani a kɔl sandaa nda va dɛnɛ kon tosaa ni.

¹⁷Volin vannda va hunɔɔ le sálàla kɔlɲululan a sálàla va le hakio sɔlaa malɔɔ lan solio-on yɛ, ndáà luei mun o kesu Cɛi-Hala-o nin te, le vanaa-solia-lasálàá mun va ni.

¹⁸Tuma Hasaɛl va masaa Aram-ndo, mó kɔ del kobio Kat coo a cɔwvo, mó bii ndu. Mí kɔllo kɔa ndu vɛlɛ le Yerusalɛm kuello a cɔwvo.

¹⁹Fɔ́ɔ́fɔ̀, mí Yoas masaa Yuda cua ɲɛm va le Mɛlɛka-on kpow, ɲɛm fuɲaa ndɔa mamaa, masaa Yosafat, Yoram a Ahasia ndáà soli sálà o Cɛi-Hala-o nin-ndon, handɔɔ niko o ɲɛm ndu pila ndóò kɛsi le Mɛlɛka-on coo, mó cua sianin va o cɛi mandaa bolofaa nin o Cɛi-Hala-o a o cɛi lemasaa nin-ndon, mó dii mun nɛɛ pilɛ, mó yɔngu Hasaɛl va masaa Aram-ndo mun kpede. O kon, mí Hasaɛl kɔannun, o del lɛ Yerusalɛm coo mɛɛ ndóò kɔngɔlan yɛ le.

²⁰Sɔɔn tɔ̀un Yoas-on kpow n co n'sɛvaa o sɛbɛ Dɛnnda lemasalan Yuda nin.

²¹Mí simlacia va ndu o ba bɛngu-a yii ndu dúmbú, má dii ndu Bɛt-Millo o tolɔɔ le kɔlan Silla.

²²Vanaa dii ndu-a yɔŋnun Yosabad po Simeat-o nda Yehosabad po Somɛr-o ni. Ndáà diyɔɔ ndu, má kumbu ndu fuɲaa ndɔa mamaa ikɛi o Kobi David-o nin. O kon mí Amasia po ndɔ koma sul masaa o fonda ndɔɔ.