Read Kissi 2Masaa 13 Bible Online

2Masaa 13 - Kissi bible

2Masaa 13

¹O vɔsi Yoas po Ahasia-o suili vɔsilan bidiin a layàá o masalen coo Yuda-o, mí Yoahas po Yehu-o siŋnun masaa Israɛl. O kobio Samari nin o va icali ni. Mó tosa masalen vɔsilan tɔ́ a laŋɔmmɛw.

²Mó tosa ɲɛ hɛnan Mɛlɛka loo, mó luei Israɛlla pelon o hakilan nin mɛɛ Yeroboam po Nebat-o tosa yɛ, yɛlɛma bɛɛ o yɛlɛma le.

³Le hee, mí Mɛlɛka fula kɔllo a Israɛlla, mó mal nda Hasaɛl masa va Aram-ndo, a Bɛn-Hadad po Hasaɛl kon o ba. O telennda masaa ŋiɔŋaa kan va masalen tosaa lan kpow bɛngu, Israɛlla va nda o ba bɛngu.

⁴O kon, mí Yoahas tɛɛlun Mɛlɛka, mí Mɛlɛka tuɛi ndu diom. Kani o va dɛnɛ palaa masaa Aram va Israɛlla tuisio coo-o cɔu.

⁵Mí Mɛlɛka yɔngu Israɛlla vana baŋaa. Má fula o ba Aramiia bɛngu, má muungu o cɛila-kolala-toandaala ndalan nin maa o tasendɔ.

⁶Kɛ Israɛlla mel hakila yungu Yeroboam-ndo luei Israɛlla pelon nin-ndan tosaa le, má muungun vɛlɛ lenin. O nɛila lan coo tuŋ nda va kelaa ni. Hali yɔm soolaa, mó lo isisi Samari lon.

⁷Vanaa cɔvaa Mɛlɛka ndóò mel Yoahas daama-a va haa ni: vanaa ɲaanun o soa coo-a n'van beleŋuɛɛnu, ɲɛla ɲaanannda soa nan-ndan tɔ́ a vanaa tosa cɔwvo a n'pelu-a vaalan tɔ́. Kani mí masaa Aram ndóò diw nda taw, mó mingi nda maa cundu vannda kei nɛw a n'pelu-o.

⁸Sɔɔn tɔ̀un Yoahas-on kpow, ɲɛ-ɲɛ o tosa a dialun ndɔn fulan, kon kpow co o sɛvaa o sɛbɛ Dɛnnda lemasalan Israɛl nin.

⁹Mí Yoahas diam fuɲaa ndɔa ciee-piɔ́m, má kumbu ndu Samari. O kon mí Yoas po ndɔ koma sul masaa o fonda ndɔɔ.

¹⁰Vɔsi Yoas suili vɔsilan beleyaa a laŋɔmmɛw o masalen coo Yuda-o, mí Yoas po Yoahas-o siŋnun masaa Israɛlla coo. O kobio Samari nin o va icali ni. Mó tosa masalen vɔsilan tɔ́ a laŋɔmpum.

¹¹Mó tosa ɲɛ hɛnan Mɛlɛka loo. Hakila kɛ́-kɛ̀ Yeroboam po Nebat-o ndóò luei Israɛlla balan nin, lan tuŋ ndu bɛɛ va tosaa ni.

¹²Dɛnnda tɔ̀la Yoas lan, ɲɛ-ɲɛ o tosa, dialun ndɔn fulan a cɔw kei ndu tɛɛn nda Amasia, masaa Yuda-o kpow, sɔɔn mun co n'sɛvaa o sɛbɛ Dɛnnda lemasalan Israɛl nin.

¹³Mí Yoas diam fuɲaa ndɔa ciee-piɔ́m, má kumbu ndu Samari o sɛi masaa Israɛl nin. O kon, mí Yeroboam koma sul masaa o fonda ndɔɔ.

¹⁴Nàà piɔ́mndo biyɔɔ Elise, mí Yoas masaa Israɛl komal ndu, mó tundun ndu coo, mó caŋ. Mó va dimio aa: «Pua nuu ndee! Pua nuu ndee! Maa ɲɛla ɲaanannda Israɛlla, la soa nan-ndan a vanaa ndɔa ɲaanun o soa coo-a n co ni, Pua!»

¹⁵Mí Elise dimul ndu aa: «Kɔ nuwviaa kpaasiaa a kɔɔn.» Mó kɔ hun a ɲɛm mun.

¹⁶Mí Elise dimul ndu masaa Israɛl aa: «Bii kpaasiaa o ba, ma kindu.» Mó bii, mó kindu, mí Elise handu balan o bala ndu masaa coo.

¹⁷Mó dimul ndu aa: «Kumbi dio-pɔmbɔɔ a ba paalen le can-ndo.» Mó kumbi. Mí Elise dimul ndu aa: «Vuu kɔɛi.» Mó vuu. Mí Elise dimi aa: «Kɔɛi he co tɔɔmaseloo ni maa Mɛlɛka co niaa hunɔɔ mala mì la nɔla yaamɔaa niaa, Aramiia pɛɛn. A nɔlanin Aramiia Afɛk, ma cii nda diw kpow.»

¹⁸Mí Elise dimul ndu vɛlɛ aa: «Cua kɔɔn celen.» Mó cua. Mí Elise dimul ndu masaa Israɛl aa: «Lɔ́ɔ́ mun lɛŋ.» Mó lɔaa mun lɛŋ leyáá, mó pɛngi.

¹⁹Mí vana-tɛɛngaa-diom Hala-o tambu kɔllo a ndu, mó dimul ndu aa: «Nɔm óò bɛnda mì nɔm óò lɔɔ bɛmbɛ leŋuɛɛnu, te kon te leŋɔmpum. O kon, a va Aramiia nɔla mì nɔm óò cii nda kpede. Kɛ nin, leyàá kpé n co nda hunɔɔ nɔla ni.»

²⁰Mí Elise vu, má kumbu ndu. Vɔsi oo vɔsi, vanaa del vannda coo fulaa o lɛŋnde Moab len nin-nda va hunɔɔ vannda delɔɔ coo o lɛŋnde Israɛl-ten nin.

²¹Paale pilɛ niko, a va vana vílɛ́iyo pum kumbɔɔ, kpafii má ca kunda vanaa del kan vannda coo-a hunɔɔ, má viaw vana vílɛ́i kon o sɛi Elise-o nin a kiltan. Mí dialun vana kon kɔ pilan paala Elise lan, mí vana kon muungu yoomu. Mó can ɲaali, mó sim o pelun ndɔn coo.

²²O telen Yoahas va o masalen-ndo kpow bɛngu, Hasaɛl, masaa Aram va Israɛlla mɔnɛi lueiyo.

²³Kɛ mí Mɛlɛka tosal Israɛlla kɛndɛi, mó tuinun nda iɲíí, mó mulul nda hɔlla le kpema ndóò yiilu Abraham, Isaak a Yakɔb-o. O cɛl le nda tɛɛmbuuo le, nduyɛ háá paalen nden, o kɛɛ nda mò faŋal nda hɔlla le.

²⁴Hasaɛl masaa Aram vuo, mí Bɛn-Hadad po ndɔ koma sul masaa o fonda ndɔɔ.

²⁵Mí Yoas po Yoahas-o hialu Bɛn-Hadad po Hasaɛl-lo kobila Hasaɛl ndóò hɛlu Yoahas fuɲa ndɔ o ba a cɔwvo lan o ba. Mí Yoas nɔla Bɛn-Hadad a cɔwvo háá bɛmbɔɔ leyàá, mó mingin kobila Aramiia ndáà puu Israɛlla o ba lan o ba.