Read Kissi 2Masaa 14 Bible Online

2Masaa 14 - Kissi bible

2Masaa 14

¹O vɔsi diinndɔɔ nin o masale Yoas po Yoahas-o len bɛngu, masaa Israɛl pɛɛn, mí Amasia po Yoas va masaa Yuda-o siŋnun masaa.

²Ndóò nɔ vɔsilan bidiin a laŋuɛɛnu mó siŋnun masaa, mó tosa masalen Yerusalɛm vɔsilan bidiin a laŋɔmahiɔɔlu. Yerusalɛmnɔɔ kala ndɔ va ni, diola ndɔlan aa Yoadan.

³Mó tosa ɲɛ bɛnda Mɛlɛka o hɔl-lo, kɛ o tiiya maa David fuɲa ndɔ mama le, maa Yoas fuɲa ndɔ kpafii o tosa ɲɛ hɛnan Mɛlɛka-o ni.

⁴Kɛ nduyɛ, tombon feŋan o lɛŋnden nin te, vannda va kɔlan sálàla n'cɔlulan solio a ansan lomɔɔ tuŋ o tombon.

⁵Masalen simndan ndu o ba yili, mó diw vanaa ndɔa baalaa dii fuɲa ndɔ-a, masaa Yoas pɛɛn.

⁶Kɛ nduyɛ, maa mɛɛ o co o sɛvaa o sɛbɛ tɔŋ Moise-o nin yɛ, o diw poaa vanaa dii fuɲa ndɔ-a le, kani o tɔŋ kon nin, mí Mɛlɛka dimi aa: «Kala-ncuawva bɛnda mà sɔla piɔ́mndo le dɛnɛ vɔɔn hɔ́aa ndaa tosa-o le. Cuawva bɛɛ a bɛnda mà sɔla piɔ́mndo le dɛnɛ vɔɔn vanaa velu nda-a tosa-o le. Vana-vana sɔlanin piɔ́mndo le haki ndɔ o tosa-o[12].»

⁷Ndu Amasia kon koni dii vanaa cɔvaa Edɔmnda vaalan tɔ́ o Ból Ihɛllo nin ni. A lo cɔwvo, mó bii kobio Sela, mó mingi kobi kon diolan aa Yɔkteɛl, diola lan o nɔ vɔ háá paalen nden ni.

⁸O kon mí Amasia vim Yoas po Yoahas-o, po imama Yehu-o, ó va masaa Israɛl-lo kiilaa, mó dimul ndu aa: «Hun mì n cɔlɔba naa nɔm.»

⁹Mí Yoas va kon masaa Israɛl-lo mingul Amasia va masaa Yuda-o mulio o taloo nin aa: «Yɔm n'yɔɔ pum cɛn sindɛ o pembei Liban coo ni, mó komal yɔm sɛɛdreo Liban, mó dimul ndu aa: ‹Ke ya cua nɔm laandoo mò siŋnun lanɔɔ po nuu.› Kɛ mí visi yondo pum Liban kei o yɔm n'yɔɔ kon coo, mó ciimiaa ndu.

¹⁰Le tùú n nɔla Edɔmnda-o n heelu hɔlla nuaa ni nɛ? Cal o nɔm ndo ma kuundian mɛɛ n yeema yɛ. Le yɛɛ n yeema yɛ le dɛnɛ palaa tuisio nɔm pila a vanaa cɔwva Yuda coo?»

¹¹Kɛ Amasia yeŋ ndu lani le. Le hee, mí Yoas masaa Israɛl kuel ndu, má kɔ saan a cɔwvo, Bɛt-Siemɛs o tàndá Yuda-o nin nda ndu Amasia masaa Yuda kon.

¹²Mí Israɛlla nɔla Yudaa, mí vana-vana ɲaanun o ndu lo.

¹³Mí Yoas masaa Israɛl bii Amasia masaa Yuda, ó va po Yoas-o a po imama Ahasia-o-o o kobio Bɛt-Siemɛs nin. Mí Yoas kɔa vɛlɛ Yerusalɛm, mó buli soondo o kpakio Yerusalɛm nin, soon kon va tongei dunndo kɛmɛ lehiɔɔlu, kandɔɔ o Dio-Efraim-ndo, kɔlan háá o dio luɛyaa o sɔngilen nin.

¹⁴Mó luɛi mó cua sianion, volion a ɲɛm va o Cɛi-Hala-o nin-ndon a ɲɛm va o cɛi mandaa bolofaa va o masaa lo cɛinin-ndo nin-ndon kpow, mó bii vɛlɛ vannda, mó kɔannun a nda Samari.

¹⁵Dɛnnda tɔ̀la Yoas lan kpow, ɲɛ-ɲɛ o tosa, dialun ndɔn fulan a cɔw kei nda tɛɛn nda Amasia masaa Yuda-o, sɔɔn mun co n'sɛvan o sɛbɛ Dɛnnda lemasalan Israɛl nin.

¹⁶Mí Yoas diam fuɲaa ndɔa ciee-piɔ́m, má kumbu ndu Samari o sɛila masaa Israɛl nin. O kon, mí Yeroboam po ndɔ koma sul masaa o fonda ndɔɔ.

¹⁷O piɔ́m Yoas po Yoahas-o kɔɔli, ó va masaa Israɛl-lo pɛɛn, mí Amasia masaa Yuda, po Yoas-o koma viaw yoomu vɔsilan tɔ́ a laŋuɛɛnu.

¹⁸Dɛnnda tɔ̀la Amasia lan kpow, la co lasɛvaa o sɛbɛ Dɛnnda lemasalan Yuda nin.

¹⁹Mí vannda yii ndu dúmbú Yerusalɛm, mó ɲaanun, mó kɔannun Lakis. Kɛ má kuel ndu lon, má kɔ dii ndu.

²⁰Má cua ndu o vílɛ́iyo o soa coo, má muungu a ndu Yerusalɛm, o Kobi David-o nin, má kumbu ndu o sɛi fuɲaa ndɔa nin.

²¹O kon, mí vannda Yuda kpow a cua Asaria[13], má suilu ndu masaa o fonda Amasia fuɲa ndɔ-o, ndóò nɔ vɔsilan tɔ́ a laŋɔmpum.

²²Masaa Amasia vuo, mí Asaria mingi kobio Eilat[14] tangul, mó mingi ndu o masalen Yuda bɛngu.

²³O vɔsi tɔ́ a o ŋuɛɛnundɔɔ nin o masale Amasia, po Yoas-o len bɛngu o tàndá Yuda-o coo, mí Yeroboam po Yoas va masaa Israɛl-lo sul masaa o lɛŋnde Israɛl-ten coo. Samari o va icali ni, mó tosa masalen vɔsilan belehiɔɔlu a ò pilɛ.

²⁴Mó tosa ɲɛ hɛnan Mɛlɛka loo, o mel hakila Yeroboam po Nebat-o luei Israɛlla balan nin-ndan te.

²⁵Mó mingin lɛŋii va paandu le Israɛlla-e kpow o ba, cɔnɔnndo Hamat kɔlan háá o mɛmma hɛlii bɛnduan, maa mɛɛ diom Mɛlɛka Hala Israɛlla ndóò dimin a sondo vana ndɔ baalaa Yonas-o yɛ, Yonas vana-tɛɛngaa-diom Hala-o pɛɛn, po Amitai fula Kat-Hefɛr-o.

²⁶Kani mí Mɛlɛka ca mɔnɛi Israɛlla va nin-nde a sanga bɛndu va nda kpow coo-o. Cɛ ve lɛ le, hɔ́ɔ́ ve lɛ le, vana-vana ve le nda malaa le.

²⁷Nduyɛ, Mɛlɛka ndóò dimi le Israɛlla cii o ceendo coo le. Le hee, mó hɛli Yeroboam po Yoas-o le nda baŋaa.

²⁸Dɛnnda tɔ̀la Yeroboam-ndan kpow, ɲɛ-ɲɛ o tosa, dialun ndɔn fulan o cɔwlan nin a mɛɛ o looku Damas a Hamat hiɔlɔɔ mó mingi lan o masalen Israɛl bɛngu yɛ, kon kpow co o sɛvaa o sɛbɛ Dɛnnda lemasalan Israɛl nin.

²⁹Mí Yeroboam diam fuɲaa ndɔa ciee-piɔ́m, má kumbu ndu o sɛila masaa Israɛl nin. O kon, mí Sakari po ndɔ koma sul masaa o fonda ndɔɔ.