Read Kissi 2Masaa 16 Bible Online

2Masaa 16 - Kissi bible

2Masaa 16

¹O vɔsi Peka po Remalia-o suili vɔsilan tɔ́ a laŋɔmmɛw o masalen coo Israɛl-lo, mí Ahas po Yotam-ndo siŋnun masaa Yuda.

²Ndóò nɔ vɔsilan bidiin mó siŋnun masaa. Yerusalɛm o va icali ni. O tosa ɲɛ bɛnda Mɛlɛka Hala ndɔɔ o hɔl-lo maa David fuɲa ndɔ mama le.

³Mɛɛ masaa Israɛl kela yɛ koni ndu bɛɛ kela ni. Mó soli po ndɔɔ sálà, mó loam ndu o yin mɛɛ naamula nɔɔlɛila vanaa-mangalaa-isɔɔa Mɛlɛka ndóò tow Israɛlla laci-a la va yɛ.

⁴Mó va sálàlan solio o tombon, o pembon coo a o yɔmii puiyɛi kpow bɛngu[16].

⁵O kon, mí Resin masaa Aram nda Peka masaa Israɛl, po Remalia-o a hinul Ahas a cɔwvo Yerusalɛm, má hun tiila ndu, kɛ a tiw ndu ba le.

⁶A boondii pilɛi ken, mí Resin masaa Aram mingi kobio Eilat o ba Aramiia bɛngu, mó soli Yudaa va o kobi kon nin-nda, mí Edɔmnda hun cal Eilat lon, a co vɔ icali lon háá paalen nden.

⁷Mí Ahas viam kiilaa o Tiklat-Pilesɛr masaa Asiri lo, mó dimul ndu aa: «Buɛi nɔmndo a po nɔmndo ya co ni. Lelan, hun ma baŋa ya, ma soli ya masaa Aram a masaa Israɛl o ba, kani à hun del-la coo a cɔwvo.»

⁸O kon, mí Ahas cua volion, sianin va o Cɛi-Mɛlɛka-o nin-ndon a bolofaa va o cɛi lemasaa nin-ndo, mó kɔ ke masaa Asiri mun.

⁹Mí masaa Asiri cɛl ndu diom, mó kɔ del kobio Damas coo a cɔwvo, mó bii ndu, mó kɔa a vanaa va lon-nda o biyɔɔ nin Kir, mó dii Resin.

¹⁰Mí masaa Ahas kɔa Damas o Tiklat-Pilesɛr masaa Asiri lo. Mɛɛ Ahas ce fonda-loamaa-lasálà va Damas lon-ndo, mó yɔŋ Uri vana-solia-lasálàá tuula fonda-loamaa-lasálà kon a mɛɛ ɲɛm baalan va lon-ndon kpede n va yɛ.

¹¹Mí Uri vana-solia-lasálàá cɔaw fonda-loamaa-lasálàá mɛɛ fonda-loamaa-lasálà masaa Ahas komal Damas, mó yɔŋ ndu tuula ndɔɔ-o va kpafii yɛ. Lɔ́ɔ́ pá mí masaa Ahas can Damas mó muungu, mí Uri cii ndu cɔvɔɔ.

¹²Masaa Ahas fulaa Damas mó hun, mó ca fonda-loamaa-lasálàá ho, mó sɔɔnguu ikɛi, mó hel lecoo,

¹³mí ndu pila soli sálà loamaa, sálàla kpeyanndan, a sálà mamɔiyo, mó mulin mó taaliaa kooma cɔlua sálàla kɔlɲulua lecoo.

¹⁴Mó faŋa fonda-loamaa-lasálà n'daɲa va o Cɛi-Mɛlɛka-o hɔl-ndɔ-o o fonda ndɔɔ, ó va o fonda-loamaa-lasálà sɛnɛiyo a Cɛi-Mɛlɛka-o tɛɛn-ndo pɛɛn, mó kɛsi ndu o fonda-loamaa-lasálà sɛnɛiyo ikɛi, a ba luaŋ-ndo.

¹⁵Mí masaa Ahas dimul Uri vana-solia-lasálà aa: «Kandɔɔ nihau, o fonda-loamaa-lasálà bɛndoo ho coo n co va sálàla loamaalan solio idii oo idii ni, lecoo koni n co va sálàla paale delaa, sálàla loamaala masaa, sálàla kpeyannda masaa, sálàla loamaalan a sálàla kpeyanndan le vanaa co o lɛŋnden nden nin-nda kpow solio ni. Ma va kooma cɔlua nda vanin hunɔɔ le sálàla ndala loamaalan a le sálàla ndala tɔ̀lan solio-an cuuŋuuo lecoo. Le fonda-loamaa-lasálà n'daɲaa ndu, ya pila nɔnin balan lecoo ni.»

¹⁶Mí Uri vana-solia-lasálàá tosa mɛɛ masaa Ahas ndóò dimul ndu yɛ kpafii.

¹⁷O kon, mí masaa Ahas kilikili pɛngɛn bɔɔpɔɔn n'daɲan va o ɲɛla ɲaanannda cɔlua nan-ndan-ndon, la va o Cɛi-Mɛlɛka-o nin-ndan, mó faŋa fɛngɛla va lecoo lan. Mó tuisi Fɛngɛ bɛndu tiilan va o cɔavaa a tuula navaa tovaa tɔ́ a à ŋiɔnda-o, mó kɛsi ndu lɛŋ o powta nda diŋila lan coo.

¹⁸O kon kɔɔli, le masaa Asiri hɛnanndo, mí Ahas mangala falii paale pɛngiɛi ndáà cɔw o Cɛi-Mɛlɛka-o nin-nde a fonda luɛyaa masaa ndóò kei o bɛ́ɛ̀-o[17].

¹⁹Dɛnnda tɔ̀la Ahas lan, ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Yuda nin.

²⁰Mí Ahas diam fuɲaa ndɔa ciee-piɔ́m, má kumbu ndu o sɛi fuɲaa ndɔa nin, o Kobi David fuɲa ndɔ mamaa-o nin. O kon, mí Esekia po ndɔ koma sul masaa o fonda ndɔɔ.