Read Kissi 2Masaa 17 Bible Online

2Masaa 17 - Kissi bible

2Masaa 17

¹Vɔsi Ahas suili vɔsilan tɔ́ a latiɔn o masalen coo Yuda-o, mí Osee po Ela-o siŋnun masaa Israɛl. Samari o va icali ni. Mó tosa masalen vɔsilan laŋɔmahiɔɔlu.

²Mó tosa ɲɛ hɛnan Mɛlɛka loo, kɛ o ve maa masaa tasea Israɛlaa tosa masalen ndu laci-a le.

³Mí Salmanasar, masaa Asiri hun del ndu coo a cɔwvo, mí Osee luɛi ndu o ba bɛngu, mó va muloo malɔɔ ndu o ba.

⁴Kɛ telen pum, mí masaa Asiri ciiku maa Osee yii ndu dúmbú, kani mí Osee yaa kiilaa o So lo, masaa Esipte pɛɛn, mó kɛɛ le muloo malɔɔ Salmanasar, masaa Asiri o ba mɛɛ ndóò dema ndu malɔɔ ndu o ba yɛ. Le hee, mí masaa Asiri bii Osee, mó mal ndu o kaasoo.

⁵O kon, mí ndu masaa Asiri kon hun del lɛŋnde Israɛl-ten coo a cɔwvo, mó kɔ tiila Samari háá le vɔsilan tan yáá.

⁶O vɔsi ŋɔmahiɔɔlundɔɔ nin o masale Osee len bɛngu, mí masaa Asiri bii Samari, mó kɔa a Israɛlaa va lon-nda o biyɔɔ nin o lɛŋnde ndɔlen nin. Mó kɔ kɛsi nda o tàndá nɔ diolan aa Halah-o nin, o peo Habɔr kɔngɔ, o lɛŋnde Kosan-nden nin a o kobila Mɛdea nin.

⁷Dɛnnda lan la tosan fúú le, kani hakio Israɛlla ndáà cua a Mɛlɛka Hala ndaa ni, Hala soli nda o lɛŋnde Esipte len nin Faraɔnnɔɔ, o co masaa Esipte-o o ba-o pɛɛn. Kani halaa celen ndáà mulin sooloo ni.

⁸Má luei balan o naamula vanaa Mɛlɛka ndóò hɛlu lɛŋnden o ba mó ke Israɛlla len-nda nin. Lende masaa Israɛlla ndáà tosá ni.

⁹Mí Israɛlla tosa dɛnnda bɛnda a Mɛlɛka Hala ndaa le lan o vionnɔnndo nin. Má cɔaw tombon o kobila ndalan kpow nin, kandɔɔ o cɛila kpalilla, kɔlan tiiyaa háá o kobila mayoomulan kpow.

¹⁰Má tɔal powta soolaalan a sungbuma soolan o pembon kpow coo a o yɔmii puiyɛi kpow bɛngu.

¹¹Lon nda va cuɛima cun kɛndɛan lomɔɔ o tombon ni, mɛɛ vanaa-mangalaa-isɔaa Mɛlɛka ndóò tow nda laci-a va tosaa yɛ. Má tɛɛmbuu Mɛlɛka kɔllo a dɛnnda vɔɔnnda lan.

¹²Má sooluu piɔmaa Mɛlɛka ndóò kuuna nda sooloo-a.

¹³Mí Mɛlɛka yondal Israɛlla a Yudaa a sondola vanaa-tɛɛngaa-diom Hala-a ndɔa a vanaa ca sɔɔn lacion-nda, mó dimul nda aa: «La mangalan a dɛnnda niaala vɔɔnndan, mì la bii tɔŋnda nilan a silala nilan, mì la kela o tɔŋ ya sɛval fuɲaa nia mamaa-o coo, tɔŋ ya yɔngu niaa fulaa vanaa nia baalaa o ba-o, vanaa-tɛɛngaa-diom Hala-a pɛɛn.»

¹⁴Kɛ a yeŋ lani le, má kindi nilan, mɛɛ fuɲaa ndaa mamaa ndáà tosa má kɛɛ le Mɛlɛka Hala ndaa laalanndo yɛ.

¹⁵A yondal Mɛlɛka ndóò yondal nda kon-ndo kpede, má kɛɛ silala ndɔlan a kpema ndóò yiilu fuɲaa ndaa mamaa-o. Má mulin halaa fondoa sooloo. Lelan mí nda pila siŋnun vanaa fondoa, má del vanaa-mangalaa-isɔaa va icali nda ikɛi-ya kɔɔli o kelala ndalan nin, vanaa Mɛlɛka ndóò kuuna nda le delɔɔ kɔɔli-a pɛɛn.

¹⁶Má mulul silala Mɛlɛka Hala ndaa kɔɔ, má cɔaw navaa téndéa a ciliŋun teengian, má cɔaw yɔm soolaa. Má baŋ vulan ɲɛm pangelen co o halataala-on o labɛngunin, má sooluu vɛlɛ Baal.

¹⁷Má loam poaa ndaa a cuavaa ndaa laandua o yin le nda sálàlan solio. Má luɛi dɛnnda mangalaalan a dɛnnda lekueilan tosaa, má vɔngulun o dɛnnda vɔw Mɛlɛka o hɔl-tan tosaa nin, má tɛɛmbuu ndu kɔllo.

¹⁸O kon, mí Mɛlɛka tuulu kɔl taw-taw a Israɛlla, mó faŋa nda ndu pila o hɔl few. Fɔ polale Yuda len daama mí le lo.

¹⁹Kɛ hali vanaa fula kan o polale Yuda len nin-nda, a bii tɔŋnda Mɛlɛka lan te, Hala ndaa pɛɛn. Maa Israɛlla koni nda bɛɛ kela ni.

²⁰Mí Mɛlɛka kɛɛ cuavaa Israɛlla kpow, mó tuisi nda siɛmbulan, mó mal nda vanaa del vannda coo-a o ba. O mɛɛlulan mó toaw nda, má faŋan ndu o hɔl few-few.

²¹Kani mí Israɛlla soli bollen o masale cuavaa-imamaa David-a bɛngu, má siinguu Yeroboam po Nebat-o masaa, mí ndu masa nda kon faŋa nda o nɛi Mɛlɛka-o coo, mó luei nda pelon o haki vɔɔn-vɔɔndo nin.

²²Má luɛi niko hakila Yeroboam ndóò tosa lan kpow tosaa, a kpakpala o kɛ́-kɛ̀ le,

²³háá mí Mɛlɛka toaw nda, má faŋan ndu o hɔl, mɛɛ ndóò dimi ndi a sondo vanaa ndɔa baalaa yɛ, vanaa-tɛɛngaa-diom Hala-a pɛɛn. Má kɔa a Israɛlla levil polon o cɛlen nin, o lɛŋnde Asiri len nin. Má kɔ va lon háá paalen nden.

²⁴Mí masaa Asiri hun a vannda pum fulaa Babilɔn, Kuta, Ava, Hamat a Sefarvaim, mó kɛsi nda o fonda Israɛlla o kobila va o tàndá Samari-o nin-ndan nin. Mí vanaa kan hialu tàndá Samari-o, má cal o kobila va lon-ndan nin.

²⁵Ndáà kandɔɔ calle lon, a ve Mɛlɛka vo le, mí Mɛlɛka solul nda yàlàá, mí yàlàá kan kɔ diw nda.

²⁶Má dimul masaa Asiri aa: «Vanaa-mangalaa-isɔaa n hin haa má kɛsi nda o kobila co o tàndá Samari-o nin-ndan-nda, a sínà mɛɛ vana biilu hala co o lɛŋnden nden nin-ndo le. O solul nda yàlàá, yàlà kon co nda diwvo pila. Kani a sina tanala hala naa n nɔ o lɛŋnden nden nin-ndo lan te.»

²⁷O kon, mí masaa Asiri dimi aa: «La mingi vana-solia-lasálàá pilɛ o a niaa hin fulaa lon-nda tɛɛn, mó kɔ va lon le nda dina hala co o lɛŋnde len nin-ndo pɛɛkoo.»

²⁸Mí vana-solia-lasálàá pilɛ o vanaa-solia-lasálàá ndáà bii Samari má kɔa a nda-a tɛɛn kɔa, mó kɔ va icali Betɛl le nda cɔmndo mɛɛ ndáà bɛnda le siòòŋii Mɛlɛka-e nɔu yɛ.

²⁹Kɛ mí vanaa-mangalaa-isɔaa kan a cɔaw piɔmaa ndaa o kobila yɛ́-yɛ́la nda va icali nin-ndan nin, má kɛsi nda o tongola máánndan nin o tombun Samaria ndáà soli-on.

³⁰Mí vannda Babilɔn toosiaa piɔmndo Sukɔt-Benɔt, mí vannda Kut toosiaa piɔmndo Nɛrkal, mí vannda Hamat bɛɛ nda toosiaa piɔmndo Asima.

³¹Mí vannda Ava toosiaa piɔmnda Nibhas a Tartak, mí vannda Sefarvaim a soli poaa ndaa sálàá o Adramelɛk a Anamelɛk lo, halaa Sefarvaim pɛɛn, má loam poaa ndaa kan o yin.

³²Mɛɛ ndáà va vɛlɛ Mɛlɛka biiloo yɛ, má hɛli vanaa-solia-lasálàá nɛɛ-nɛɛ ka le sálàlan solio o tombon. Mí vanaa-solia-lasálàà kan va baala kon tosaa le nda o máánnda va o tombun ndan-ndan nin.

³³A va Mɛlɛka biiloo, ma va vɛlɛ halaa ndaa sooloo maa mɛɛ naamula vanaa-mangalaa-isɔɔa nda fula tɛɛn-nda lan la va yɛ.

³⁴Háá paalen nden, a connun-ndɔ o naamula ndala paandulan nin tuŋ. A nɔ siòòŋii Mɛlɛka le, a co kela o silala ndalan coo kpeekpei le, a co vɛlɛ kela o tɔŋndan a o silala Mɛlɛka yɔngu cuavaa Yakɔb-a lan coo le, Yakɔb ndóò ke diolan aa Israɛl-lo[18] pɛɛn.

³⁵Nduyɛ, mí Mɛlɛka ndóò yii kpemaa a poaa Yakɔb-a, mí ndóò dimul nda aa: «La sóólùù halaa celennda le, la baŋ vulan nda o labɛngunin te, la biilu nda le, la solul vɛlɛ nda sálà le.

³⁶Kɛ la ke ya Mɛlɛka bɛɛlen, ya soli niaa o lɛŋnde Esipte len nin a kpaaya bɛndoo-o pɛɛn. Ya o labɛngunin niaa bɛnda le vulan baŋɔɔ ni, ya niaa bɛnda le sálàlan solullo ni.

³⁷La bii silalan, tɔŋndan a pɛɛkula ya sɛval niaa lan, mí la kela lecoo, la bɛnda mì la sooluu halaa celennda le.

³⁸La pɔɛ́ɛ́nùn kpema ya yii a niaa-o le, la sóólùù halaa celennda le few.

³⁹Ya Mɛlɛka Hala niaa daama niaa bɛnda le biiloo ni. O kon i baŋanin niaa yaamɔaa niaa kpow o ba.»

⁴⁰Kɛ mí vanaa kan a kɛɛ le sɔɛi ken biyɔɔ, má va hiovɔɔ laci a kelaa o naamula ndala paandulan coo.

⁴¹Mí vanaa-mangalaa-isɔaa kan a va Mɛlɛka biiloo a piɔmaa ndaa sooloo. Háá paalen nden, ɲɛ pilɛ fuɲaa ndaa va tosaa-o koni poaa ndaa a poaa ndaa imamaa co vɔ tosaa ni.