Read Kissi 2Masaa 2 Bible Online

2Masaa 2 - Kissi bible

2Masaa 2

¹Mɛɛ Mɛlɛka heelu Elii o halataala o felenfelenndo nin yɛ yɔŋnun hoo ni: Elii nda Elise cɔnɔnndo Kilkal, má va kɔlan latulu,

²mí Elii dimul Elise aa: «Lo nanu, kani Mɛlɛka vem ya háá Betɛl.» Kɛ mí Elise mulul ndu aa: «Te Mɛlɛka co yoomu, mí nɔm bɛɛ va yoomu, i faŋannin nɔm kɔɔli le.» Má kɔa Betɛl nda ndu latulu.

³Mí vanaa-tɛɛngaa-diom Hala va Betɛl-la fula Elise bɔŋa, má ɲuna ndu aa: «A sina pá maa Mɛlɛka co hau vana nɔm bɛndoo faŋa nɔm ikɛi mò heelu ndu o halataala?» Mó muli aa: «Oi, ya bɛɛ i sina nihau, niaa meinun tuŋ!»

⁴Mí Elii dimul vɛlɛ Elise aa: «Elise, lo nanu, kani Mɛlɛka vem ya Yeriko.» Kɛ mí Elise mulul ndu aa: «Te Mɛlɛka co yoomu, mí nɔm bɛɛ va yoomu, i faŋannin nɔm kɔɔli le few!» Má kɔa Yeriko nda ndu latulu.

⁵Mí vanaa-tɛɛngaa-diom Hala-a va Yeriko-a sɔɔnguu Elise ikɛi, má ɲuna ndu aa: «A sina pá maa Mɛlɛka co hau vana nɔm bɛndoo faŋa nɔm ikɛi mò heelu ndu o halataala?» Mó muli aa: «Oi, ya bɛɛ i sina nihau, niaa meinun tuŋ!»

⁶Mí Elii dimul vɛlɛ Elise aa: «Lo nanu, kani Mɛlɛka vem ya Yurdɛn o peelo.» Mó mulul ndu aa: «Te Mɛlɛka co yoomu, mí nɔm bɛɛ va yoomu, i faŋannin nɔm kɔɔli le few!» O kon má hiaw laci a kɔlan nda ndu.

⁷Mí vanaa-tɛɛngaa-diom Hala-a fula kundaa n'van beleŋuɛɛnu, má kɔa nda kɔɔli. Elii nda Elise simndan o peo Yurdɛn kɔngɔ, mí vanaa kan nda sim tiŋ kɔɔli-kɔɔli.

⁸O kon, mí Elii cua doma ndɔ bɛndoo, mó simbul ndu, mó lɔaa mɛnndan a ndu, mí ma sɛyan baa a baa, o kon má taŋ latulu nda ŋiɔn a vesɛi sɛ́ɛ́n.

⁹Mɛɛ nda taŋ, mí Elii dimul Elise aa: «Dimul-la ɲɛ n yeema mì tosal nɔm-ndo lɔ́ɔ́ pá Mɛlɛka faŋa ya nɔm ikɛi.» Mí Elise mulul ndu aa: «I yeema mì kɔl co nɔm nin-ndo vangalan lediin, mò tol-la coo.»

¹⁰Mí Elii dimi aa: «Ɲɛ n ɲuna-o kendu sɔla. Taa ce ya pɛ telen ya vanin faŋanndo nɔm ikɛi le helɔɔ coo-o, mɛɛ piɛile nɔmnden le mulinnin, kɛ taa ci ya o helɔɔ le, mɛɛ a sɔlanin ɲɛ n ɲuna-o le.»

¹¹A lo kɔlan a sɔɛi lende, mí yinnden le fula, vanáà ca len ko aa ɲɛ ɲaanan soa nan-ndo ni. Mí soa leyinnda fula, má sɛi Elii nda Elise, mí Elii helnun coocoo o hoeyii felenfelennde nin.

¹²Elise cɔu lende, mó deŋi coocoo aa: «Fuɲa nuu! Fuɲa nuu! Ɲɛla ɲaanannda cɔlua nan-ndan a vanaa ɲaanun o soa Israɛl coo-a!» O kon, o ci lɛ Elii le. Mó saa volɔɔlan ndu pila lekɔɔ, mó sɛɛsa lan bungan mún miun.

¹³O kon kɔɔli, mó cua doma bɛndu Elii ndóò mal-lo. Mó muungu, mó kɔ sim o peo Yurdɛn kɔngɔ.

¹⁴Mó bii doma kon, mó lɔaa mɛnndan a ndu, mó deŋi aa: «Kuɛɛ nɛ Mɛlɛka, Hala Elii-o co yɛ? Kuɛɛ nɛ o co yɛ kpeekpei?» Lende ndu bɛɛ lɔɔ mɛnndan ni, mí ma sɛyan tɛɛn o ba kɛndɔɔ a o ba mɛllo coo, mó taŋ.

¹⁵Mɛɛ vanaa-tɛɛngaa-diom Hala-a va Yeriko-a ce Elise kɔɔli-kɔɔli, má dimi aa: «Kɔl Elii-o tol Elise coo!» Má kɔa ndu bɔŋaa, má tundun ndu o labɛngunin háá lɛŋ.

¹⁶Má dimul ndu aa: «Tofa vɔ, n nɔ vanpiaandua dialun fulaa beleŋuɛɛnu. N co nda vomɔɔ mà kɔ nuwviaa vana nɔm bɛndoo. Bɔɔle kɔl Mɛlɛka-o cua ndu ni mó kɔ mal ndu o pembei pum coo, te kon te o bóllo pum nin.» Mó mulul nda aa: «La viam vana le!»

¹⁷Kɛ a lo ndu baŋnɔnndo kɔɔli háá mó dimul nda aa: «Mɛɛ la viom nda.» Má viam langbaa beleŋuɛɛnua kan, má kɔ nuwviaa Elii palɛi ndii yáá, a seelun ndu le.

¹⁸Ndáà muungoo Elise o ibuŋ, ó va vɔ Yeriko, mó dimul nda aa: «Vɛ̀ɛ̀ mí yáà dimul niaa aa la kɔa le le?»

¹⁹Mí vanaa va o kobio Yeriko nin-nda dimul Elise aa: «Vana bɛndoo, mɛɛ nɔm pila co cɔu nuaa yɛ koni, kobi naa ho naŋ o calle, kɛ nduyɛ, n nɔ mɛmma kolaama kɛndɛ le, lɛŋnden le niŋ vɛlɛ ɲɛ-ɲɛ le.»

²⁰Mí Elise dimi aa: «La cuu ya taala sɛnɛiyo, mì la vow hɛlle lenin.» Má yoo ndu ndu.

²¹Mí Elise kɔa o soon kólaa, mó kɔ saŋ hɛlle o mɛnndan nin, mó dimi aa: «Diom Mɛlɛka dimi-o co hoo ni aa i cii mɛnndan man dindi, ma dii lɛnin ɲɛ yoomaa le, ma tosa lɛnin mi tɔlɔɔ kɛɛ naŋɔɔ o lɛŋnden nden coo le.»

²²O kon mí mɛnndan ma diandu few mɛɛ Elise ndóò dimi yɛ, nduyɛ ma co vɔ lende háá paalen nden.

²³Mí Elise faŋan Yeriko, mó kɔa Betɛl. O lo nɛi-tɛɛn, mí poambɔa can ciee má va ndu mamɔɔ aa: «Tembele kpalaku, hél ciee! Tembele kpalaku, hél ciee!»

²⁴Mó mulin, mó tofa nda, mó dɔaw nda danga o diola Mɛlɛka lan. O kon, mí kɔ́lɔ́vúlua fula o bundɔɔ nin nda ŋiɔn, má sɛɛsiaa n'van belehiɔɔlu a vanaa ŋiɔn o poambɔa kan tɛɛn.

²⁵Elise cɔnɔnndo lon, mó kɔa o pembei Karmɛl coo, cɔnɔnndo lon mó muungu Samari.