Read Kissi 2Masaa 20 Bible Online

2Masaa 20 - Kissi bible

2Masaa 20

¹O telen kon, mí Esekia del a nàà piɔ́mndo. Mí vana-tɛɛngaa-diom Hala-o Esai, po Amɔt-o hun o ndu lo, mó dimul aa: «Mɛlɛka dimi aa nɔm congun yungu nɔmndo, kani a singunin a naa ho le, vuo n co ni.»

²Mí Esekia muli hɔlla o cìì cɛiyo, mó piɛi Mɛlɛka aa:

³«Éé Mɛlɛka! Loonun a kela sandaa ya kela nɔm o hɔl-lo, loonun a dɛnnda kɛndɛla ya tosa nɔm o hɔl-tan.» Mí Esekia caŋ fúkpàà-fùkpàà.

⁴Esai ndóò fula vɔ bɛɛ o bɛ́ɛ̀ bɛndu co tɛɛn-ndo[21] le, mí Mɛlɛka soaa o ndu lo, mó dimul ndu aa:

⁵«Muungu ma kɔ dimul Esekia, o co simlacinɔ vanaa nia-o aa: ‹Diom Mɛlɛka, Hala David fuɲa nɔm mama dimi-o co hoo ni aa: I tuei piɛile nɔmnden, i ce mɛmɛma nɔmndan. I co nɔm singi, o kon o paale yàándɔlen, a hel o Cɛi-Mɛlɛka-o nin.

⁶I cɔɔlunin vɔsilan tɔ́ a laŋuɛɛnu o yoomu nɔmndo coo. I baŋanin vɛlɛ nɔm masaa Asiri o ba a kobio ho latulu, i kandanin kobio ho le ya pila a le David vana ni baala.›»

⁷Mí Esai dimi aa: «La cua dɛɛ nda toŋ a vooson-ndo.» O kon, má cua dɛɛ kon, má sui Esekia ndu o pawve coo, mó siangu.

⁸Nduyɛ mí Esekia ndóò ɲuna Esai aa: «Cɔm ya tɔɔmasele ya sinanin maa Mɛlɛka co ya singi, i vinin paale yàándɔlen o Cɛi-Hala-o nin-too?»

⁹Mí Esai mulul ndu aa: «Mɛlɛka yɔngunin nɔm tɔɔmaseloo, haliko ma sina maa o co sɔɛi o dimi-e peelu. Tɔɔmasele kon vanin hoo ni: Vɛ̀ɛ̀ a yeema mi vundulen le hiow laci le helɔɔlan tɔ́, baa le muungu kɔɔli le helɔɔlan tɔ́?[22]»

¹⁰Mí Esekia muli aa: «O kindu taw le vundulen hiovɔɔ laci le helɔɔlan tɔ́ le. Lelan, le muungu a makɔɔ le helɔɔlan tɔ́.»

¹¹O kon mí Esai piɛi Mɛlɛka, mí ndu Mɛlɛka mingi vunduma lepala-an a makɔɔ le helɔɔlan tɔ́, o helɔɔla Ahas lan coo, nɛɛ léè tol-la.

¹²O telen pilɛ kon, mí Berodak-Baladan, po Baladan-ndo, ó va masaa Babilɔn-ndo viam kiilaa o Esekia lo a sɛbɔɔ a á yɔŋɔɔ o ba, kani mí ndóò tuɛi maa Esekia ve kɛndia le.

¹³Mí Esekia mɛmin mialaa kan, mó luɛi a nda o cɛi ndáà manda kon ɲɛm báà kalan-ndo nin: volion a sianion, ɲɛm cun kɛndɔn a cuɛima sɔvɛan. Mó cɔm vɛlɛ nda cɛi mandaa ɲɛm cɔwvo a ɲɛm va o cɛi mandaa bolofaa nin-ndon kpow, Esekia vin nda ɲɛ-ɲɛ o ndu lo cɛinin a o masale ndɔle tɔ̀len nin te.

¹⁴O kon kɔɔli, mí Esai vana-tɛɛngaa-diom Hala-o hun o Esekia lo, mó ɲuna ndu aa: «Kuɛɛ nɛ vannda ha fula yɛ, yɛɛ nda dimul-lɛ nɔm?» Mí Esekia muli aa: «A fula levil, Babilɔn dí.»

¹⁵Mí Esai ɲuna ndu vɛlɛ aa: «Yɛɛ nda ce yɛ o nɔm ndo cɛinin?» Mí Esekia muli aa: «Ɲɛm co o ya lo cɛinin-ndon kpow, a cii cɔ. Ɲɛ-ɲɛ lo lɛ o cɛi bolofaa nuu nin, mí kɛɛ nda ndu cɔm te.»

¹⁶O kon mí Esai dimul Esekia aa: «Tuei-yɔ diom Mɛlɛka dimi-o:

¹⁷‹Telen pum co tiiya, vannda kɔannunnin Babilɔn a ɲɛm co o cɛi nɔm lemasaa nin-ndon kpow, n fuɲaa nɔmaa mamaa cuungiaa kandɔɔ paandu, mí n va n'kɛsiaa háá hau-von kpow, ɲɛ-ɲɛ lonin te.› Diom Mɛlɛka soo-o co kon ni.

¹⁸‹A biinin vɛlɛ poaa nɔmaa n velu-a, a n solin o ipulu kɛsɛ-kɛsɛ-a, mà tɛɛndiaa nda bosilan le nda kɛsio cumullo o cɛi lemasaa nin Babilɔn.›»

¹⁹Mí Esekia mulul Esai aa: «Diom Mɛlɛka n tɛɛngul-la hoo-o naŋ.» Kani o va diminndo o kɔl aa: «Te i co vɔ pɛ yoomu, kɔlɲuloo a nila ɲululan la co va!»

²⁰Dɛnnda tɔ̀la Esekia lan kpow, cɔwla o tosa lan kpow, a mɛɛ ndóò cɔw vɛlɛ dala mamɛnndo, mó toaw soondo le mɛnndan yɔɔ o kobio Yerusalɛm nin yɛ, kon co o sɛvaa o sɛbɛ Dɛnnda lemasalan Yuda nin.

²¹Mí Esekia diam fuɲaa ndɔa ciee-piɔ́m, mí Manase po ndɔ koma sul masaa o fonda ndɔɔ.