Read Kissi 2Masaa 22 Bible Online

2Masaa 22 - Kissi bible

2Masaa 22

¹Yosia ndóò nɔ vɔsilan tan ŋɔmaa mó siŋnun masaa, mó tosa masalen vɔsilan beleyaa a ò pilɛ, Yerusalɛm o va icali ni. Yedida, cua Adaya fula Bɔskat-o va kala ndɔ ni.

²Mó tosa ɲɛ bɛnda Mɛlɛka o hɔl-lo. Nɛila kɛ́-kɛ̀ David fuɲa ndɔ mama kela coo, mí ndu bɛɛ kela lecoo kpafii, o feŋan ó o kɛ́-kɛ̀ coo le.

³Vɔsi masaa Yosia suili vɔsilan tɔ́ a laŋɔmaa o masalen coo-o, paale pilɛ, mí ndu masaa viam Safan vana sɛvaa, ó va po Asalia-o a po imama Mesulam-ndo-o o Cɛi-Mɛlɛka-o nin, mó dimul ndu aa:

⁴«Kɔ o Hilkiya bolle vanaa-solia-lasálàá lo, mó cɔm volin vannda yɔngu o Cɛi-Mɛlɛka-o nin-ndon, n kpalilaa cumulaa ladioa biw vannda o laba-on pɛɛn.

⁵Ma cua volin mun, ma yɔngu simlacia co baalaa hɔlten o Cɛi-Mɛlɛka-o nin-nda, mí nda nda sala vanaa cuaa layindɔa, vanaa cɔavaa lacɛiya a vanaa co baalala celen o cɛi kon nin le fondala tambu lan mingio toosiaa-a,

⁶le vanaa cuaa layindɔa, le vanaa cɔavaa a le vanaa baalaa tɔ̀a kpow salaa, le yɔmnde a powta sialaala bɛnda le cɛiyo mingio toosiaa lan piondɔɔ.

⁷Kɛ vana ɲunanin nda le kona dɔwnɔn le volin co nda yɔngɔn-ndon te, kani a kɔl sandaa nda co va baalaa a mun ni.»

⁸Mí Hilkiya bolle vanaa-solia-lasálàá dimul Safan vana sɛvaa aa: «I saalun sɛbɛ tɔŋndo o Cɛi-Mɛlɛka-o nin.» Mí Hilkiya yɔngu Safan sɛbɛ kalaa, mó tofa ɲɛ va o sɛvaa lenin-ndo.

⁹O kon mí Safan vana sɛvaa kɔ downun masaa kona, mó dimul ndu aa: «Buɛyaa nɔmnda cii volin co o cɛi lemasaa nin-ndon cɔm, má yɔngu vanaa co bolle baalaa o Cɛi-Mɛlɛka-o nin-nda mun.»

¹⁰Mó dimul vɛlɛ masaa aa: «Mí Hilkiya bolle vanaa-solia-lasálàá yɔngu ya sɛbɔɔ pum.» Mí Safan dimi ɲɛ va o sɛvaa o sɛbɛ kalaa nin-ndo masaa o hɔl.

¹¹Masaa tueyɔɔ sɔɔn va o sɛbɛ tɔŋ kon nin-ndon, mó sɛɛsian volɔɔlan lekɔɔ.

¹²Mó veelu Hilkiya bolle vanaa-solia-lasálàá, Ahikam po Safan-ndo, Akbɔr po Mikaya-o, Safan vana sɛvaa a Asaya vana baala masaa, mó dimul nda aa:

¹³«La kɔ ɲuna Mɛlɛka isɔɔ le ya pila, le vannda Yuda a le lɛŋnde tɔ̀len kpow a sɔɔn co o sɛbɛ nda saalun hoo-o nin-ndon o kɔɔ-on, kani kɔltuw Mɛlɛka-o co o bɔɔ. O tuulu kɔl a naa le tùú fuɲaa naa kɛɛ le sɔɔn co o sɛbɛ kon nin-ndon biyɔɔ, má kɛɛ le kela lecoo-o.»

¹⁴Mí Hilkiya, Ahikam, Akbɔr, Safan a Asaya a kɔa o Hulda vanalanɔ-tɛɛngaa-diom Hala-o lo. Lanɔɔ Salum po Tikva-o, po imama Harhas va vana mandaa volɔɔla ifalenndan-ndo Hulda kon va ni. Yerusalɛm o kobi sɛnɛiyo nin o va icali ni.

¹⁵Mí Hulda dimul vanaa kan aa: «Diom Mɛlɛka Hala Israɛlla dimi-o co hoo ni aa: La kɔ dimul vana vem niaa o ya lo-o aa:

¹⁶‹Mɛlɛka dimi aa: I co kobio ho a vanaa co lenin-nda dɛnɛ palaa tuisi coo, maa mɛɛ o co o sɛvaa o sɛbɛ masaa Yuda dimi hoo-o nin yɛ.

¹⁷Le tùú vannda ha mulul-la kɔɔ, má va halaa celen sálàla cuɛima cun kɛndɛlan solullo-o, le tùú nda co ya kɔllo tɛɛmbuuo a ɲɛm nda cɔw a laba-on-ndo ya tuulu kɔl a kobio ho ni. Nduyɛ kɔltuw nuu ɲululnin te.

¹⁸Kɛ la dimúl masaa Yuda, ó vem niaa le Mɛlɛka isɔɔ ɲuna-o aa: Diom Mɛlɛka Hala Israɛlla dimi le sɔɔn n tuei fulaa o sɛbɔɔ nin-ndon-ndo co hoo ni:

¹⁹Le tùú sɔɔn mun pilan kɔl nɔmndo-o, le tùú n tuisin ya o hɔl lɔ́ɔ́ n tuei sɔɛi ya dimi a kobio ho a á vanaa co lenin-nda o kɔɔ-e-o, vanaa kan pɛɛn a dɛnɛ palaa a dangaa toalnin coo-a, le tùú n sɛɛsian volɔɔlan lekɔɔ, ma del a caŋndo ya o hɔl-lo, ya bɛɛ i tuei nɔm diom. Ya Mɛlɛka dimi lende ni.

²⁰Lelan ya co cɛlɔɔ ni ma dem fuɲaa nɔmaa mamaa a kɔlɲuloo, mà kumbu nɔm o sɛi nɔmndo nin. O kon, hɔlta nɔmndan la ci lɛnin dɛnɛ palaa ya tuisinin kobi kalaa coo-o le.›» Mí kiilaa nda vem-nda kɔ downun masaa kona a sɔɔn mun o kɔɔ.