Read Kissi 2Masaa 24 Bible Online

2Masaa 24 - Kissi bible

2Masaa 24

¹Tuma Yehoyakim va masaa Yuda-o Nebukanɛsar masaa Babilɔn hun luɛi a cɔwvo o tàndá Yuda-o nin ni. Mí Yehoyakim luɛi ndu o ba bɛngu le vɔsilan tan yáá, kɛ mó can vɛlɛ mó simul Nebukanɛsar.

²O kon mí Mɛlɛka viam kundala vanaa del vannda coo-a, má kɔ del Yehoyakim coo. Kundala Mɛlɛka vem lan-ndan la yɔŋnun ndan ni: Kaldea, Aramiia, Moabua a Amɔnnda. Ndáà kɔɛ le Yuda tɛɛmbuuo maa mɛɛ Mɛlɛka ndóò dimi sɔɛi ken a sondo vanaa ndɔa baalaa yɛ, vanaa-tɛɛngaa-diom Hala-a pɛɛn.

³Mɛlɛka cɛl ni mí ken kpow yɔŋnun. Kani ndóò yeema mì vannda Yuda ndáà faŋan ndu o hɔl le hakila kɛ́-kɛ̀ Manase ndóò tosa,

⁴a le kooma vanaa ndóò diw mí ndóò pei Yerusalɛm a man-ndan. Nduyɛ vanaa kan ndáà tɛɛmbuu isɔɔ le. Mɛlɛka cɛl le haki kon malɔɔ le few.

⁵Dɛnnda tɔ̀la Yehoyakim-ndan, ɲɛ-ɲɛ o tosa, kon co o sɛvaa o sɛbɛ Dɛnnda lemasalan Yuda nin.

⁶Mɛɛ Yehoyakim dem fuɲaa ndɔa ciee-piɔ́m, mí Yehoyakin po ndɔ koma sul masaa o fonda ndɔɔ.

⁷Masaa Esipte fula lɛ o lɛŋnde ndɔle len nin te, kani masaa Babilɔn ndóò cii nin lɛŋii va ndu o ba bɛngu-e kpow hiɔlɔɔ, cɔnɔnndo o pee pɔmbɔɔ Esipte kɔlan háá o peo Efrate.

⁸Yehoyakin ndóò nɔ vɔsilan tɔ́ a laŋɔmaa mó siŋnun masaa. O tosa masalen paangon mún yáá, Yerusalɛm o va icali ni. Nehusa, cua Ɛlnatan-ndo va kala ndɔ ni, Yerusalɛmnɔɔ o va ni.

⁹Mí Yehoyakin tosa ɲɛ hɛnan Mɛlɛka loo mɛɛ fuɲa ndɔ tosa yɛ.

¹⁰A boondii ken, mí vanaa cɔvaa Nebukanɛsar masaa Babilɔn-nda kuel kobio Yerusalɛm a cɔwvo, má tiila kobi kalaa.

¹¹Tuma ndáà tiila ndu kon-ndo, mí ndu Nebukanɛsar masaa Babilɔn pila kɔa lon.

¹²Vɔsi kon o suili vɔsilan laŋɔmaa o masalen ni. Mí Yehoyakin masaa Yuda fula nda kala ndɔ, buɛyaa ndɔa, vanaa ndɔa baalaa a vanaa bɛndua va ndu o ba bɛngu-a, mó kɔ yɔngun masaa Babilɔn. Mí caan kon ndu mal ndu o kaasoo.

¹³Mí Nebukanɛsar cua bolofaa va o Cɛi-Mɛlɛka-o nin a o cɛi lemasaa nin-ndo kpow, mó mulin mó pesipesi ɲɛm-laandun solia lasálàn n'sianin Salomɔn masaa Israɛl ndóò toosiaa, mí ndóò kɛsi o Cɛi-Mɛlɛka-o nin-ndon kpow mɛɛ Mɛlɛka ndóò dimi yɛ.

¹⁴Mó kɔannun a vannda Yerusalɛm kpow o biyɔɔ nin: vanaa bɛndua kpow a vanaa sɔvɛa kpow. Vanaa nda kɔɛ kan o biyɔɔ nin-nda va faw-faw vannda vaalan tɔ́. Mó kɔannun vɛlɛ a sumnda kpow a á vanaa toosiaa lakpooloa kpow. Vanaa bala fondo-fondoa daama o mɛi ni.

¹⁵Mó kɔa a masaa Yehoyakin Babilɔn, mó kɔannun vɛlɛ a kalaa masa kon, a laandaa ndɔa, a vanaa bɛndua va ndu o ba bɛngu-a a á langbaa kɛsun kálàá va o lɛŋnden nin-nda kpede.

¹⁶Mó kɔa a vanaa cɔwva vàála ŋɔmmɛw. Sumnda a vanaa toosiaa lakpooloa nda va vàá pilɛ. O nda kpow tɛɛn vana-vana ndóò tiwba le cɔwvo tosaa ɲɛkɛndɛi. Mí masaa Babilɔn kɔa a nda kpow o biyɔɔ nin Babilɔn.

¹⁷O kon, mí Nebukanɛsar masaa Babilɔn suili Matania vanayɛi Yehoyakin-nde[27] masaa o fonda ndu Yehoyakin-ndo, mó mangala ndu diolan aa Sedekia.

¹⁸Sedekia ndóò nɔ vɔsilan bidiin a ò pilɛ, mó siŋnun masaa, mó tosa masalen vɔsilan tɔ́ a ò pilɛ. Hamutal cua Yeremi fula Libna-o va kala ndɔ ni.

¹⁹Mó tosa ɲɛ hɛnan Mɛlɛka loo mɛɛ Yehoyakim ndóò tosa yɛ.

²⁰Dɛnnda lan kpow la tosalan Yerusalɛmnda a Yudaa le tùú Mɛlɛka ndóò tuulu kɔl a nda-o. Lelan o tow nda levil polon ni. Kɛ mí Sedekia bɛɛ simul masaa Babilɔn.