Read Kissi 2Masaa 25 Bible Online

2Masaa 25 - Kissi bible

2Masaa 25

¹O vɔsi Sedekia suili vɔsilan laŋɔmahiɔɔlu o masalen-ndo, o paale tɔ́ndɔlen coo o paangii diinndɔɛi nin, mí Nebukanɛsar masaa Babilɔn a vanaa ndɔa cɔwva kpow a hinul Yerusalɛm a cɔwvo, má kila dɔ́ɔ́ngɔ́ɔ̀ ciee-lekɔɔ, má yaŋ yaŋɔɔ cɔwvo o kobio balɔɔ sɔ́.

²Má tiila kobio Yerusalɛm lende háá o vɔsi tɔ́ a ò pilɛndɔɔ nin o masale Sedekia len bɛngu.

³O paale ŋɔmahiɔɔlundɔlen coo o paangii hiɔɔlundɔɛi[28] nin, mɛɛ yima bɛnduan máà luɛi o kobio nin yɛ, ɲɛdiaa ve lɛ le vanaa va lenin-nda le,

⁴mí Babilɔnnda buli soondo o kpaki kobio. A balɔɔ Babilɔnnda ndáà balu kon kobio sɔ́-o kpow, ɲumndan tolɔɔ, mí vanaa cɔwva Yuda kpow a ɲaanun. Má kei o nɛi va o dio va o kpakila tiɔnndan tɛɛn-ndo-o, o nakɔ masaa ikɛi. Mí masaa Sedekia ndu kei a nɛi óò kɔɛ a ba bóllo Yurdɛn-ndo, mí ndu bɛɛ ɲaanun.

⁵Kɛ mí vanaa cɔvaa Babilɔnnda ɲaanun ndu kɔɔli, má kɔ bendal ndu o dɛɛlaa Yeriko nin. O kon, mí vanaa ndɔa cɔwva kpow a mɛi ndu, má sɔɔndian.

⁶Mí Babilɔnnda bii masa kalaa, má kɔa a ndu o masaa Babilɔn-ndo, nɛɛ o va Ribla-a. Lon Babilɔnnda kelu yamɛi ndɔɛi ni.

⁷Má kili poaa Sedekia kon bololan ndu pila o hɔl, má pesipesi ndu pila hɔltan, má baa ndu yɔlɔn n'daɲan, má kɔa a ndu Babilɔn.

⁸Vɔsi Nebukanɛsar suili vɔsilan tɔ́ a laŋɔmahiɔɔlu o masalen-ndo, o paale ŋɔmmɛwndɔlen coo o paangii ŋuɛɛnundɔɛi nin, mí Nebusaradan luɛi Yerusalɛm. Vana bɛndoo pum Nebusaradan kon va masaa Babilɔn o ba bɛngu ni, ndu va bolle vanaa va masaa kandaa-a ni.

⁹Mɛɛ luɛi Yerusalɛm, mó loam Cɛi-Mɛlɛka-o, cɛi lemasaa a Yerusalɛm tɔ̀u kpow, kɛ taama-taama, cɛila sɔvɛla va lon-ndan.

¹⁰Mí vanaa cɔvaa Babilɔnnda kpow, a va simlacia vanaa kándà masaa-a ikɛi-ya koombiaa kpaki bɛndu va Yerusalɛm balɔɔ sɔ́-o.

¹¹Mí Nebusaradan, bolle vanaa kándà masaa-a ndu kɔa a vanaa tɔ̀a ndáà lo o kobio nin-nda, vanaa ndáà kɔɛ a ba nda má kɔ yɔngun masaa Babilɔn-nda pɛɛn, handɔɔ niko vanaa tɔ̀a coo.

¹²Kɛ nduyɛ, mí Nebusaradan, bolle vanaa kándà masaa-a cɛl, mó mɛi vanaa bala fondoa pum le rɛsɛnndon tɔlɔɔ a ciɛɔn vàá.

¹³Mí Babilɔŋaa kan a pesipesi sungbuma n'daɲama va o Cɛi-Mɛlɛka-o nin-ndan, ɲɛla ɲaanannda soa nan-ndan a fɛngɛ bɛndu n'daɲa va o Cɛi-Mɛlɛka-o nin-ndo, má cua daɲan mun, má kɔannun a mun Babilɔn.

¹⁴Má cua vɛlɛ bombola kɔandaa lapultan, peelelan, mɔɔn pɔmbɔn, taalala kólaalan a ɲɛm-laandun celeŋun ndáà toosiaa a daɲan le baala lekaando tosaa a mun-ndon kpow.

¹⁵Mí Nebusaradan, bolle vanaa kándà masaa-a cua vɛlɛ bombo vovaa ladɛngullo, taalala va le fuusaa lan, ɲɛm ndáà toosiaa a sianion-ndon a ɲɛm ndáà toosiaa a volin humbon-ndon kpow.

¹⁶Le sungbuma miɔnndan, fɛngɛ bɛndu mamɛnndo a ɲɛla ɲaanannda masaa Salomɔn ndóò cɔw a daɲan le Cɛi-Mɛlɛka-o lan yɛ, vana sína lusul ɲɛm mun kpow le.

¹⁷Sungbulen lepilɛ le va helɔɔ dunndo tɔ́ a leŋɔmaa, kpufɛla n'daɲalan la va o sungbuma miɔmma man le kɛ́-kɛ̀ bollen. O pilɛ va helɔɔ dunndo leyàá, má kɛmikɛmiaa lan a kpangbàà nda lɔ a daɲan-ndo a á tuuliaala n'krenadela nda tosa a daɲan-ndan. Sungbuma miɔmma man, simnda pilɛlan kpé máà nɔ ni, kɛɛmiaala pilɛlan koni máà nɔ vɛlɛ ni.

¹⁸Mí Nebusaradan, bolle vanaa kándà masaa-a bii vɛlɛ Seraya va bolle vana-solia-lasálàá-o, Sofoni va vana-solia-lasálà diinndɔɔ-o a vanaa yaa va dioo cumullo-a.

¹⁹Mó bii vɛlɛ vana baala masaa, ó va bolle vanaa cɔwva-o, mó bii vanaa ŋuɛɛnu o vanaa ndáà lo vɔ o kobio nin-nda tɛɛn, o vanayan masaa nin ndáà fula ni. Mó bii vana va vanaa cɔwva sɛvaa mó va bolle ndalen-ndo. Mó bii vɛlɛ n'van belaŋɔmpum o Yudaa tɛɛn, nda kpow Yerusalɛm nda va ni.

²⁰Mí Nebusaradan, bolle vanaa kándà masaa-a cua nda, mó kɔa a nda o masaa Babilɔn-ndo nɛɛ o va Ribla-a.

²¹Mí ndu kɔ diw nda o lɛŋnde len nin Ribla lon. Nuaa nda kɔɛ a vannda Yuda o biyɔɔ nin ni, má kɔa lɛŋnde ndalen levil polon.

²²Vanaa Nebukanɛsar masaa Babilɔn cɛl-lɛ le lou lon-nda, mó handu Kedalia po Ahikam-ndo, po imama Safan-ndo masa ibungaa nda coo.

²³Lɔ́ɔ́ simlacia vanaa cɔwva a vanaa ndaa cɔwva kpow a tuei maa masaa Babilɔn suili Kedalia masa ibungaa-o, má kɔa o ndu lo nɛɛ o va Mispa-a. Vanaa kɔɛ kan o ndu lo-a yɔŋnun haa ni: Ismaɛl po Netania-o, Yohanan po Karea-o, Seraya po Tanhumɛt fula Netofa-o-o a Yaasaniahu po langbanɔ fula Maaka-o nda vanaa ndaa cɔwva kpow.

²⁴Mí Kedalia mɛnalan nda a vanaa ndaa cɔwva kpow, mó dimul nda aa: «Siòòŋii bii niaa a Babilɔnnda le, la lo icali o lɛŋnden nin, mì la tosal masaa Babilɔn baala. Ken bɛnda a niaa ni.»

²⁵Kɛ o paangii ŋɔmmɛwndɔɛi nin, mí Ismaɛl po Netania-o, po imama Elisama-o, fulaa o yungu lemasaa nin, hun a vanaa ndɔa cɔwva n'van tɔ́ kɔɔli, má hun dii Kedalia, má diw vɛlɛ Yuifia a Babilɔŋaa va Kedalia ikɛi Mispa-a.

²⁶O kon, mí vannda kpow a ɲaanun, kandɔɔ a cuaambɔa kɔ bii kaasonnda, simlacia vanaa cɔwva, má kɔannun Esipte, kani siòònde va nda a Babilɔnnda.

²⁷O vɔsi beleyaa a o ŋɔmmɛwndɔɔ nin, o kɔla nda kɔɛ a Yehoyakin va masaa Yuda-o o biyɔɔ nin-ndan kɔɔli, mí Evil-Merodak siŋnun masaa Babilɔn. Paangii tɔ́ a idiinndɔɛi o vɔsi kon nin, paangei va malɔ bidiin a leŋɔmmɛw, mí ndu Evil-Merodak tuinun Yehoyakin va masaa Yuda-o iɲíí, mó soli ndu o kaasoo.

²⁸Mó dimul ndu sɔɔn kɛndɔn, mó ke ndu fonda bɛndoo hiovɔɔ masaa va ndu ikɛi o masalen coo Babilɔn-nda coo.

²⁹Mó soli ndu volɔɔla kaasolan lekɔɔ. Yehoyakin vi lende, nda masaa va ɲɛdiaa dioo latulu ni.

³⁰Háá mí palɛi ndɔɛi cuu o ceendo coo, masaa ndóò nɔ ndu Yehoyakin hɔlten coo lɔ́ɔ́-lɔ́ɔ̀ le dɛnnda ndɔlan kpow toosiaa.