Read Kissi 2Masaa 3 Bible Online

2Masaa 3 - Kissi bible

2Masaa 3

¹O vɔsi tɔ́ a o ŋɔmaandɔɔ o masale Yosafat masaa Yuda len bɛngu, mí Yoram po Akab-o siŋnun masaa Israɛl, Samari o va icali ni. Mó tosa vɔsilan tɔ́ a latiɔn o masalen.

²Mó tosa ɲɛ hɛnan Mɛlɛka loo, kɛ ndóò tiiya dɛnɛ vɔɔndo tosaa maa fuɲa ndɔ nda kala ndɔ le. Kani mó pesipesi piɔmaa Baallaa fuɲa ndɔ ndóò toosiaa-a.

³Kɛ ó va hakila Yeroboam po Nebat-o luei Israɛlla nin-ndan tosaa tuŋ, o mel-tan te few.

⁴Mesa, masa va Moab-o ndóò nɔ cɔlua taw. Vɔsi oo vɔsi saa téndéa vaalan kɛmɛ a saa kóndóa vaalan kɛmɛ a yiiŋii ndɛi ndóò mal muloo masaa Israɛl o ba ni.

⁵Kɛ masaa Akab vuo, mí masa va kon Moab-o koma simul Yoram siŋnun masa Israɛlla-o.

⁶Tuma kon, mí masaa Yoram can Samari, mó hun mɛɛndian vanaa cɔvaa Israɛlla kpow.

⁷Mó viam kiilaa o Yosafat va masaa Yuda-o lo le ndu dimullo aa: «Masaa Moab simul-la, vɛ̀ɛ̀ a cɛl pá ma sɔɔnguu ya ikɛi le lɛŋnde ndɔlen kɔlan delɔɔ coo a cɔwvo?» Mí Yosafat mulul ndu aa: «I cɛl. Kani naa ŋiɔn ɲɛ pilɔɔ naa n co ni, ɲɛ pilɔɔ vanaa nɔmnda a vanaa nia co ni, ɲɛ pilɔɔ koni soa nɔmnda a á nia co ni.»

⁸Mó ɲuna Yoram ndu aa: «Kɛ a nɛi kuɛɛ naa n co yɛ kei le heeloo?» Mí Yoram muli aa: «A nɛi kei o lɛŋnde veselɛilen Edɔm nin-ndo naa n keinin ni.»

⁹O kon mí masaa Israɛl, masaa Yuda a hoo Edɔm a bii nɛiyo. Ndáà tosaa palɛi ndii ŋɔmmɛw o kɔlan nin, mí mɛnndan ma cuu nda o ba few le vanaa cɔwva a le cɔlua ndáà kɔɛ-a.

¹⁰Mí masaa Israɛl dimi aa: «Mbɔ̀ hee kendu a naa! Mɛlɛka veelu naa nanu naa masaa yáá-a ha le naa malɔɔ Moabua o ba nuaa ni.»

¹¹Kɛ mí Yosafat ɲuna aa: «Vɛ̀ɛ̀ hali vana-tɛɛngaa-diom Hala-o pilɛ bɛɛ co nanu, o naa n kei kɔɔli le Mɛlɛka isɔɔ ɲuna le?» Mí simlacia va baalaa o masaa Israɛl-lo bɛ́ɛ̀-a o pilɛ muli aa: «Elise po Safat-o co nanu, ó va Elii mɛnndan cuuŋuuo o ba-o[2].»

¹²Mí Yosafat dimi aa: «Mɛɛ ɲɔɔ bɛnda, ndu tɛɛngulnin naa ɲɛ Mɛlɛka yeema le naa dimullo-o ni.» Mí masa Israɛlla, Yosafat a masa Edɔmnda kɔ komal Elise.

¹³Mí Elise dimul masa Israɛlla aa: «Yɛɛ co yɛ naa tɛɛn naa nɔm? Kɔ o vanaa-tɛɛngaa-diom Hala-a fuɲa nɔm-nda, te kon te o vanaa-tɛɛngaa-diom Hala-a kala nɔm-nda lo, mà kɔ ɲuna nda.» Mí masa Israɛlla mulul ndu aa: «Ɛ-ɛ, Mɛlɛka veelu naa nanu ni, naa masaa yáá-a ha, le naa malɔɔ Moabua o ba.»

¹⁴Mí Elise dimi aa: «Le Mɛlɛka yoomaa, Mɛlɛka-Nɔ-Kpaayaa-Kpow-vo, o ya co baalaa tosallo-o, i co niaa mulul le bɛɛle ya nɔ le Yosafat masaa Yuda len. Te ndóò ve le ndu le, i ve bɛɛ nɔm saalan te, i ve nɔm tofa le.

¹⁵Lelan, la cuu vɔ ya vana ɲɛ-caa.» Tuma vana ɲɛ-caa va ɲɛ-caa lɔɔ-o, mí kpaaya Mɛlɛka-o toal Elise coo.

¹⁶Mó dimi aa: «Diom Mɛlɛka dimi-o co hoo ni aa: ‹La tow soonndan taw o pee pɔmbɔ velɛiyo ho kɔllo›,

¹⁷kani diom Mɛlɛka pila dimi-o co hoo ni aa: ‹La cinin ihoei hɔŋ te, la cinin piɔɔ le, kɛ pee pɔmbɔɔ ho co hunɔɔ piɔ a mɛnndan ca, mì la sɔla mɛmma kolan le niaa pila, le cɔlua niaa a le cɔlua tɔ̀a kpow.›

¹⁸Ken co ɲɛ-ɲɛ Mɛlɛka o hɔl te. O co vɛlɛ Moabua malɔɔ niaa o ba.

¹⁹O kon, la pesipesinin kobila co lakungaalan a kpakio lan a kobila bɛndulan kpow, la tɛɛmbuunin yɔmii tɔalɛi kɛndɛi, mì la baŋul soonnda mamɛnndan kpow, mì la vii powtan o yondola kɛndɛlan kpow nin le lan tɛɛmbuuo.»

²⁰Diimandɔɔ idiiyo, a telen solia lasálàá, mí mɛnndan ma fula o lɛŋnde Edɔm-nden nin, mí ma kumbu lɛŋnden.

²¹Moabua kpow tueyɔɔ maa masaa co hunɔɔ le nda delɔɔ coo a cɔwvo, má mɔɔsiaa vanaa-vanaa ndáà tiiya nin tùú cuaa ɲɛm cɔwvon a vanáà hiow nin tùú kon-nda, má kɔ simi nda o pɛɛngula lɛŋnde ndalen cɛ́-cɛ́.

²²Mɛɛ vanaa cɔvaa Moabua pena cɔnɔn idiiyo púŋ, má ca paalen volio o mɛnndan coo, má va mɛnndan cɔu masiaŋa maa makòó.

²³Má dimi aa: «Koovan ni! Masaa cuelnan mɔɔn cɔwvon má diuvan vellaa-velle. Lelan naa Moabua, n kɔnnun niko mì kɔ cɔwvian ɲɛm ndan.»

²⁴Kɛ ndáà tiiyaa o dɔ́ɔ́ngɔ́ Israɛlla nin, mí Israɛlla fulal nda, má diw nda diwvo pila. Mí Moabua ɲaanun, mí Israɛlla ɲaanun nda kɔɔli háá má kɔ luɛi o lɛŋnde ndalen nin, má kɔ cɛɛluu nda cɛɛluuo pila.

²⁵Má pesipesi kobilan, má lo powtan vuuo o yondola ndala kɛndɛlan nin háá ma pei lan lenin ca. Má baŋul soonnda mamɛnndan kpow, má koombiaa yɔmii ndɛi tɔalɛi kɛndɛi kpow. Kobio Kir-Haresɛt daama va nin isisi ni. Kɛ ndu bɛɛ, o mɛɛlulan, mí vanaa vuaa lafáàndaa kɔ balu ndu pindo, má del ndu coo.

²⁶Masa Moabua cɔu maa o nɔlanin cɔw kalaa simullo le, mó cua vanaa cɔvaa caa mɔɔn cɔwvon hiŋndo ɲɛkɛndɛi-ya n'van kɛmɛ leŋɔmmɛw le pemalen solio kɔlan háá o masaa Edɔm-ndo, kɛ a tiwba le few.

²⁷O kon, mó bii po ndɔ tase óò bɛnda le koma siŋnɔnndo masaa ndu kɔɔli-o, mó soli ndu sálà loamaa o kpaki kobio coo. Israɛlla cɔu ken, mí siòònde bii nda taw-taw[3], má puusiaa dɔ́ɔ́ngɔ́ ndaa, má muungu o lɛŋnde ndalen nin.