Read Kissi 2Masaa 6 Bible Online

2Masaa 6 - Kissi bible

2Masaa 6

¹Paale pilɛ, mí kunda vanaa-tɛɛngaa-diom Hala-a dimul Elise aa: «Tofa vɔ, fonda naa n co hoo icali naa niaa-o dɔɔnan bɔɔ a naa.

²Lelan cɛl mì n kɔɛ Yurdɛn o peelo, mí vana-vana o naa tɛɛn cua pɛngɛi pilɛ, mì n tangulun fonda calaa lon.» Mí Elise mulul nda aa: «Ava, la kɔ.»

³Kɛ mí o pilɛ o nda tɛɛn dimi aa: «Vɛ̀ɛ̀ a cɛl ma kɔɛ niaa buɛyaa nɔmnda le?» Mó muli aa: «I co lakɔ.»

⁴O kon, mó kɔa nda ndaa o peo Yurdɛn kɔngɔ, má kialu yɔmnde.

⁵Vana pilɛ o nda tɛɛn lo yɔmndo kiolɔɔ, mí cuei bɛŋin, mí i del o mɛnndan nin. Mó yonda coocoo aa: «Éé ya! I kɔndu dɛnɛ fɔ vana ni bɛndoo! Cuei pílɛ́i ya yow-ve!»

⁶Mí Elise ɲuna ndu aa: «Kuɛɛ cuei kalɛi del-lɛ?» Mí langbanɔɔ cɔm ndu fonda kon. Mí Elise kialu yɔm bingio, mó vuu ndu o mɛnndan nin o fonda cuei del kon-ndo. Mí cuei hel dɔ́ɔ́ o mɛnndan coo.

⁷Mí Elise dimul langbanɔɔ aa: «Cua ndi.» Mí langbanɔ kon siɛndi baa, mó cua ndi.

⁸Tuma cɔwvo va masaa Aram tɛɛn nda Israɛlla-o, mó tundu nda simlacia ndɔa cɔwva, mó cɔm nɛɛ ndóò yeema mì vanaa ndɔa cɔwva ndáà kila dɔ́ɔ́ngɔ́ ndaa-a.

⁹Mí Elise dimul masa Israɛlla aa: «La caa dɛ! La kei o fondaa ho nda le, kani vanaa cɔvaa Aramiia co lon.»

¹⁰O kon, mí masa Israɛlla viam vannda le kɔlan fɛfɛlaa o fonda vana-tɛɛngaa-diom Hala-o ndóò dimul ndu kon-ndo. Dɛnɛ kon va tosanndo cuɛi-cuɛi, Elise va kɔlan masa Israɛlla dimullo, mí ndu masaa bɛɛ va kelaa a taasi.

¹¹Mí kɔndɔfili bɛndoo bii masaa Aram, mí kɔllo hiilun ndu. Le hee, mó veelu vanaa bɛndua va ndu o ba bɛngu-a kpow, mó dimul nda aa: «Vɛ̀ɛ̀ la cɔɔmuu vana co suansuannden tosaa le masaa Israɛl o naa tɛɛn-ndo le?»

¹²Mí vana pilɛ o vanaa bɛndua va ndu o ba bɛngu-a tɛɛn mulul ndu aa: «Àá masaa! Suansuaannɔ kɛ́-kɛ̀ co naa tɛɛn te. Kɛ vana-tɛɛngaa-diom Hala co kon Israɛl lon-ndo, Elise pɛɛn, o tiwba mo kɔ hivul masaa sɔɔn n dimi hali o cɛi nɔm lɔlaa nin-ndon.»

¹³O kon, mí masaa Aram dimi aa: «La kɔ mì la kɔ tofa nɛɛ o co-a, haliko mi vem vannda, mà kɔ bii ndu.» Má hun downun ndu kona aa: «Elise co Dotan.»

¹⁴Mó viam vanaa cɔwva kunda bɛndoo a soa a á ɲɛla ɲaanannda soa nan-ndan, má kɔa icɔllo, má kɔ balu kobio sɔ́.

¹⁵Idiiyo púŋ, mí buɛi Elise vana-tɛɛngaa-diom Hala-o can le fulaa o kobio kɔɔli, kɛ o komal vanaa cɔwva hin kunda bɛndoo ma balu kobio sɔ́ a soa a á ɲɛla ɲaanannda soa nan-ndan. Mó kɔ dimul Elise vana-tɛɛngaa-diom Hala-o aa: «Éé vana ni bɛndoo! Vɛ̀ɛ̀ naa n tosa yɛnin kpeekpei?»

¹⁶Mí Elise mulul buɛi ndɔ kon aa: «Siòòŋii bii nɔm te, kani vanaa co naa ikɛi-ya hiow vaa sɛ́lɔ́ɔ́ a vanaa co nda ikɛi-ya.»

¹⁷Mí Elise piɛi Mɛlɛka aa: «Mɛlɛka, i co nɔm tɛɛlɔn yandi, kumbi ndu hɔltan, haliko mo ce.» Mí Mɛlɛka kumbi buɛiyo hɔltan, mó ca pembei ipiaa ca a soa leyinnda a á ɲɛla ɲaanannda soa nan-ndan, lan bɛɛ yinnden la va ni.

¹⁸Fɔ́ɔ́fɔ̀, mí vanaa cɔvaa Aramiia can, má va Elise kuello. Mí Elise piɛi Mɛlɛka aa: «Suumiaa vanaa-mangalaa-isɔɔa ha!» Mí Mɛlɛka suumiaa nda mɛɛ Elise dimi yɛ.

¹⁹Mí Elise dimul nda aa: «O co ciee niaa co kɔlan-ndo le co hoo le, la pɔw nɛiyo! La hún ya kɔɔli mì liila niaa nɛɛ vana niaa co nuwviaa-o co-a.» Mó kɔannun a nda Samari.

²⁰Mɛɛ o luɛi Samari ciee, mí Elise dimi aa: «Mɛlɛka, kumbi niko vannda ha hɔltan mà ce.» Mí Mɛlɛka kumbi nda hɔltan, má ca maa o kobio Samari kɔllo nda va ni.

²¹Masa Israɛlla cɔu nda, mó ɲuna Elise aa: «Pua! Vɛ i diw nda?»

²²Mí Elise mulul ndu aa: «A bɛnda ma diw nda le. Vɛ̀ɛ̀ diyɔɔ n dii cɛa n dema biyɔɔ a mɔɛi nɔmii cɔwve a á kpaasiaa nɔmndo-a ni? Ke nda ɲɛdiaa a mɛnndan, mà de, mà kol. O kon a mal nda, a muungun o vana nda bɛndoo lo.»

²³Mí masa Israɛlla ke nda ɲɛdiaa taw, má dia, má kol. O kon kɔɔli, mó mal nda kɔlan. Má muungun vana nda bɛndoo o ibuŋ. Kandɔɔ nin telen kon, vanaa cɔvaa Aramiia muungu lɛ o lɛŋnde Israɛl-ten nin te.

²⁴Telen pum o dɛnnda lan kɔɔli, mí Bɛn-Hadad va masaa Aram-ndo mɔɔsiaa vanaa ndɔa cɔwva kpow, mó kɔ tiila kobio Samari.

²⁵Mí yima fofolama bɛnduan ma luɛi o kobio Samari nin. Mí tiila nda tiila nda kon-ndo kiandu Samaria coo háá mí bolle sofɛlɔɔ le tiiya vɔngoo volin latámán belaŋɔmaa, mí poola kangboo[6] ɲɛ-pɔmbɔ la tiiyaa báà volin latámán mún ŋuɛɛnu.

²⁶Paale pilɛ, mí masa Israɛlla va hiovɔɔ o kpakio coo, mí vanalanɔɔ pum deŋi aa: «Mala ya fɔ vana ni bɛndoo, masaa!»

²⁷Mí masaa mulul ndu aa: «Te Mɛlɛka mala nɔm te, a yɛɛ nɛ ya mala yɛnin nɔm? Vɛ̀ɛ̀ a kullon, te kon te a mɔiyan ya malanin nɔm ni?»

²⁸Kɛ mí masaa ɲuna ndu aa: «Yɛɛ yɔŋnun yɛ?» Mí cua kon muli aa: «Cuaa ho dimul-la pɛi ni aa ‹Yɔngu po nɔmndo mí n de kon hau, o kon siɔdii ya bɛɛ i yɔngu vɛlɛ po nuu, n de.›

²⁹Ɲinkon, mí n yaw po nuu, mí n dia ndu. Diimandɔɔ, mí dimul ndu aa o yɔngu niko po ndɔɔ mì n dii, mi n de. Mó vian po ndɔɔ.»

³⁰Mɛɛ masaa tuei sɔɔn vanalanɔ kon dimi-on, mó sɛɛsian volɔɔlan lekɔɔ. Nduyɛ, o kpakio coo o va kɔlan ni, mí vannda ca ndu, volɔɔla biisilan la va ndu lekɔɔ.

³¹Mí masa kalaa dimi aa: «Te bolle Elise po Safat-o le lo pɛ ndu hau o kɛsei coo few, mɛɛ Mɛlɛka tuisí sanga hiow sangalan kpow-vo ya coo!»

³²Nduyɛ Elise va icali o ndu lo cɛinin, nda kaasoŋaa kɔlkalua kobia latulu. Mí masaa viam vanndo o ndu lo. Kɛ lɔ́ɔ́ pá kiila kon hun tiiya, mí Elise dimul kaasoŋaa kɔlkalua kan aa: «La ce! Po vana diyaa n'vanndo ho vem vanndo le hunɔɔ ya bollen kiolɔɔ. Lelan la caa dɛ! Te langbanɔ kalaa hin pɛ, la kinda dioo, la ɲindu ndu a koŋndo latulu. Vɛ̀ɛ̀ o co pelun vana ndɔ bɛndoo le ya co tueyɔɔ hunɔɔ ndu kɔɔli nuaa le?»

³³O va vɔ nda sɔɛi ken dimullo, mí kiilanɔɔ tiiya o ndu lo, mó dimul ndu aa: «Mɛlɛka tuisi dɛnnda palaalan ndan kpow naa coo ni. Vɛ̀ɛ̀ ya nɔla yɛ vɛlɛ mì tiindan ndu Mɛlɛka?»