Read Kissi 2Masaa 7 Bible Online

2Masaa 7 - Kissi bible

2Masaa 7

¹Mí Elise dimi aa: «La tuei-yɔ sɔɛi Mɛlɛka-e! O dimi aa: ‹A telen vaa nuaa siɔdii, o lɔ́ɔ́ Samari nin, kpeyanndo vanin kiloo tɔ́ a lediin le volii támái ndii pilɛ, mì ɔrse ndu va kiloo bidiin a lehiɔɔlu le volii támái ndii pilɛ.›»

²Mí simlacinɔ vanaa cɔwva, ó va lɔ́ɔ́-lɔ́ɔ̀ fulaa a luɛyɔɔ nda masaa latulu-o ɲuna Elise aa: «Hali Mɛlɛka buuluunin tɛɛngon o halataala, sɔɛi n dimi hee-e nɔla pá tosanndo?» Mí Elise mulul ndu aa: «A canin ndi o tosanndo, kɛ a dinin ɲɛm mun te.»

³Vanaa nàà siaŋaa pum va nda hiɔɔlu o dio luɛyaa kobio sondoo. Má dimulan aa: «Le yɛɛ naa n co yɛ lou nanu háá mí n va piɔ́mndo cumndo?»

⁴Te n dimi pɛ aa n kɔnnun ciee, n co lakɔ vu lon, kani yima fofolan ma co lon. Te n dimi yɛ vɛlɛ pɛ le lou nanu, vuo koni naa n vunin vɛlɛ ni. Lelan, n kɔnnun o dɔ́ɔ́ngɔ́ Aramiia nin, mì naa pila n kɔ malnún nda o ba. Taa mɛi naa pɛ yoomu, n lo yoomu, taa diw yɛ naa pɛ, mɛɛ n kɔɛnnun ciee-piɔ́m.

⁵O kon, má can telen paale yɔngannden, má bii nɛiyo le kɔlan o dɔ́ɔ́ngɔ́ Aramiia nin. Kɛ ndáà tiiyaa o pɛɛngula dɔ́ɔ́ngɔ́ɔ̀, a komal vana-vana lon te.

⁶Kani Mɛlɛka ndóò tosa ɲɛ pum ni, mí vanaa cɔvaa Aramiia va o dɔ́ɔ́ngɔ́ nin-nda tuɛi diom bɛndoo pum, vanáà tuɛi ko aa kunda vanaa cɔwva pum co hunɔɔ sɛ́lɛ́ bɛndoo a soa ndaa a á ɲɛla ɲaanannda soa nan-ndan taw-taw ni. Má dimulan vellaa-velle aa: «Má cè mɛɛ masa Israɛlla cii masa Hitiia a masa Esiptea volion yɔngu, má mɔɔsiaa vanaa ndaa cɔwva le naa hunɔɔ delɔɔ coo yɛ!»

⁷Tuma paalen le del-lo, má mɛi cɛila-kolala-toandaala ndalan, soa ndaa a sofɛlɛa ndaa, má mɛi dɔ́ɔ́ngɔ́ɔ̀ lende yɛngɛsɛɛ, má sɔɔndian le yoomula ndalan ciindiaa.

⁸Vanaa nàà siaŋaa kan tiiyaa o dɔ́ɔ́ngɔ́ɔ̀ pɛɛngulan, má luɛi o cɛi-kola-toandaa pum nin, má dia, má kol. Má cua volion, sianion a volɔɔla cuɛinanndan, má kɔ vian. Má muungu, má kɔ luɛi o cɛi-kola-toandaa celen nin, má cua vɛlɛ ɲɛm va lenin-ndon, má kɔ vian.

⁹O kon kɔɔli, má dimulan vellaa-velle aa: «O co dɛnɛ kɛndɛ le naa n co hoo tosaa le dɛ! Paalen nden hau, paale Yoongu kɛndɛlen le co ni. Te n lo pɛ meiyo nuaa, mì n lo cumndo háá mì paalen le sɛ, dɛnɛ palaa co naa tolɔɔ coo le ken. Lelan la hun n kɔnnun, mì n kɔ tiiyan yoongoo ho o cɛi lemasaa nin.»

¹⁰Má kɔa, má veelu vana pilɛ o kpalilaa va dio kobio kpalillo-a tɛɛn, má downun ndu kona aa: «N kɔɛ mí n luɛi o dɔ́ɔ́ngɔ́ɔ̀ Aramiia nin, kɛ n komal vana-vana lon te, n tui vɛlɛ vanaciee isɔɔ le. Soa a sofɛlɛa co a bayiaa, a mɛi cɛila-kolala-toandaalan lende yɛngɛsɛɛ.»

¹¹Mí kpalilaa cumulaa dio-a yonda, mí vannda hiw sɔɛi kalɛi o cɛi lemasaa nin.

¹²Mí masaa can a ɲumma bɛndu-bɛnduan, mó dimul simlacia ndɔa aa: «I dimul-lɔ niaa ɲɛ Aramiia yeema le naa tosallo-o: le mɛɛ nda sina maa yima fofolan ma co naa coo yɛ nda mal dɔ́ɔ́ngɔ́ɔ̀ ni má vinin yondoo nin, má dimi aa te naa n mɛi dɔ́ɔ́ pɛ kobio mì n tol lon, a fula, a biw naa a kiyɛiya, a luɛi o kobi naa nin.»

¹³Mí vana pilɛ o simlacia va ndu o ba bɛngu-a tɛɛn dimul ndu aa: «N cuannun soa co vɔ yoomu-a nda ŋuɛɛnu, mì n vemnun vanaa ŋuɛɛnu lecoo, mà kɔ tofa mɛɛ la co lon yɛ. Kani a lo bɛɛ nanu, a vílɛ́iya ko nda co nuaa ni maa Israɛlaa lo o kobio ho nin-nda a Israɛlaa vi nin-nda.»

¹⁴O kon, má toosiaa ɲɛla ɲaanannda soa nan-ndan tan tiɔn a soa, mí masaa viam vannda Aramiia fɛfɛlaa, mó dimul nda aa: «La kɔ mì la kɔ fɛfɛla.»

¹⁵Mí kiilaa kan diam foofola Aramiia, má kɔ tiiya háá Yurdɛn o peelo. Volɔɔla cuɛinanndan a ɲɛm celeŋun Aramiia va keiyo sɛŋio o kiltan nin-ndon kínɛí nda va komallo o nɛi ni. Má muungu, má kɔ downun masaa kona.

¹⁶Fɔ́ɔ́fɔ̀, mí vannda Samari kɔa o dɔ́ɔ́ngɔ́ Aramiia mɛi má ɲaanun-ndo nin, má yunga ndu kpede. O kon, mí vannda piandu kpeyanndo kiloo tɔ́ a lediin le volii támái ndii pilɛ, mí ɔrse ndu va kiloo bidiin a lehiɔɔlu le volii támái ndii pilɛ, maa mɛɛ Mɛlɛka ndóò dimi yɛ.

¹⁷Mí masaa dimul simlacinɔ cɔwvo pilɛ, ó va lɔ́ɔ́-lɔ́ɔ̀ fulaa a luɛyɔɔ nda ndu masaa latulu-o le dio luɛyaa kobio cumullo. Kɛ mí vannda nɛw ndu, má kei ndu coo o dio, mó vu mɛɛ vana-tɛɛngaa-diom Hala-o ndóò dimi lɔ́ɔ́ masaa ndóò kɔɛ o ndu lo-o yɛ.

¹⁸Kani mí Elise ndóò dimul masaa ndi aa: «A telen vaa nuaa siɔdii, o lɔ́ɔ́ Samari nin, kpeyanndo vanin kiloo tɔ́ a lediin le volii támái ndii pilɛ, mì ɔrse ndu va kiloo bidiin a lehiɔɔlu le volii támái ndii pilɛ.»

¹⁹Mí simlacinɔ cɔwvo pilɛ o simlacia masaa Israɛl tɛɛn, ó va lɔ́ɔ́-lɔ́ɔ̀ fulaa a luɛyɔɔ nda masaa latulu-o ɲuna Elise aa: «Hali Mɛlɛka buuluunin tɛɛngon o halataala, sɔɛi n dimi hee-e nɔla pá tosan?[7]» Mí Elise mulul ndu aa: «A canin ndi o tosanndo, kɛ a dinin ɲɛm mun te.»

²⁰Ɛ̀ɛ̀ lekɛ́ndɛi, lende i tosan ni, mí vannda nɛw ndu o dio, mó vu.