Read Kissi 2Masaa 9 Bible Online

2Masaa 9 - Kissi bible

2Masaa 9

¹Mí Elise, vana-tɛɛngaa-diom Hala-o veelu vana pilɛ o vanaa-tɛɛngaa-diom Hala-a tɛɛn, mó dimul ndu aa: «Yiinun yáwlen o caŋ, ma cua lee macuɛiyo, ma kɔɛ Ramɔt o tàndá Kalaad-o nin.

²A tiiya pɛ, a kɔ cɔ Yehu po Yosafat-o, po imama Nimsi-o pɛɛn, a kɔ soli ndu puapilɛa ndɔa tɛɛn, la kɔ luɛi niaa ndu o cɛi lenin connun lándan-ndo pum nin.

³Te la luɛi pɛ o cɛi kon nin, a cua lee macuɛi kon, a taaliaa ndu cuɛiyan o lebol, a dimi aa: ‹Nuaa Mɛlɛka dimi ni aa o pɔla nɔm, mó siinguu nɔm masaa Israɛlla coo.› A cii pɛ, a kumbi dioo, a ɲaanun kɛ, tamala le dɛ!»

⁴Mí langbanɔ felengi kon can, langbanɔ tɛɛngaa diom Hala kon pɛɛn, mó kɔa Ramɔt o tàndá Kalaad-o nin.

⁵Ndóò tiiyaa, o komal simlacia vanaa cɔwva va icali nɛɛ pilɛ, mó dimi aa: «Vana bɛndoo sei! I nɔ isɔɔ le nɔm dimullo.» Mí Yehu dimi aa: «O naa ha kpow tɛɛn, ɔ́ɔ̀ vana kon?» Mó muli aa: «Nɔm kpeekpei ni, vana bɛndoo.»

⁶Mí Yehu can, mó luɛi cɛinin. O kon, mí langbanɔ felengi kon taaliaa cuɛiyan ndu o lebol, mó dimul ndu aa: «Diom Mɛlɛka Hala Israɛlla dimi-o co hoo ni aa: ‹I pɔla nɔm, mí siinguu nɔm masaa vanaa Mɛlɛka-a coo, Israɛlla pɛɛn.

⁷Nɔm diwnin poaa Akab-a ni, ó va paandu vana nɔm bɛndoo-o pɛɛn. Lende ya mingulnin Yesabɛl màá ni le vanaa nia baalaa, vanaa-tɛɛngaa-diom Hala-a a le vanaa baalaa Mɛlɛka-a o diw kpow-va.

⁸Polale Akab len kpede le co cuvɔɔ vu. I diwnin vanpiaandua o polale ndɔlen kpow coo o lɛŋnde Israɛl-ten nin, o va n'hɔ́ɔ́ o va n'cɛ.

⁹I tosanin a yungu Akab-o mɛɛ ya tosa a yungu Yeroboam, po Nebat-o a yungu Baesa, po Ahiya-o yɛ.

¹⁰Tunnda dianin Yesabɛl yondoo nin Yisreɛl, kani vana venin le ndu kumbɔɔ le.›» Ciiyo sɔɔn mun dimio, mó kumbi dioo, mó ɲaanun kɛ.

¹¹Mí Yehu fula, mó muungu nɛɛ simlacia vana ndɔ bɛndoo va-a. Má kɔ ɲuna ndu aa: «Vɛ o co sɔɛi vɔɔn te? Yɛɛ nɛ vana seemɛi kon ndóò hin yɛ tosa o nɔm ndo?» Mí Yehu mulul nda aa: «Niaa pila sina langbanɔɔ ho a sɔɔn fula ndu o sondo-on!»

¹²Kɛ má mulul ndu aa: «Còòlan ni! Downun naa kona.» O kon, mí Yehu dimul nda aa: «Mɛ̀ɛ́-mɛ̀ɛ́ ka o soo o ya lo ni. O dimul-la aa nuaa Mɛlɛka soo ni maa ndu Mɛlɛka pɔla ya, mó siinguu ya masaa Israɛlla coo.»

¹³Fɔ́ɔ́fɔ̀, mí nda kpow vana-vana cua doma ndɔ bɛndoo, má yɛɛmbuu lan o helɔɔlan coo a maluaŋ le Yehu kɛsio lecoo, má hɔŋ buloo, má va deŋio aa: «Yehu siŋnun masaa!»

¹⁴Mí Yehu, po Yosafat-o, po imama Nimsi-o yii Yoram dúmbú. Tuma kon yɛ, Yoram nda vanaa cɔvaa Israɛlla kpow a va kobio Ramɔt co o tàndá Kalaad-o nin-ndo kandaa, yɔŋii Hasaɛl masaa Aram ndóò tɛɛmbuu ndu.

¹⁵Kɛ mí masaa Yoram ndóò muungu Yisreɛl le yɔŋul Aramiia ndáà yɔŋul ndu o Hasaɛl masaa Aramiia cɔlɔbaa-o cɛwvo. Mí Yehu dimi aa: «Te la cɛl pɛ le ya simndan kɔɔli, mɛɛ i yeema mì vana-vana cɛn o kobio ho nin nanu le kɔlan yoongu ɲɛ yɔŋnun nanu-o dimio Yisreɛl te.»

¹⁶Mí Yehu hel o ɲɛ ɲaanan ndɔ soa nan-ndo coo, mó kɔa Yisreɛl, kani lon Yoram va ihini a yɔŋulɔn ndɔɔ ni. Ahasia, masaa Yuda ndóò kɔɛ ndu yilɔɔ-o bɛɛ va lon.

¹⁷Mí kpalilnɔ nda kɛsi o kpaki kobio Yisreɛl coo-o ca kunda va Yehu kɔɔli-o hunɔɔ, mó dimi aa: «I co vannda taw cɔu hunɔɔ.» Mí Yoram dimi aa: «Dimul vana ɲaanun o sow coo-o mò kɔɛ nda diomɔɔ, mò ɲuna nda aa: ‹Vɛ o co sɔɛi vɔɔn te?›»

¹⁸Mí kiilanɔ kɔɛ kon o sow coo-o komal Yehu, mó dimul ndu aa: «Masaa dimi aa: ‹Vɛ o co sɔɛi vɔɔn te?›» Mí Yehu dimul ndu aa: «Ɔ́ɔ̀ mako nɔmndo o ken nin? Hiow ya kɔɔli.» Mí kpalilnɔɔ yɔngu diomndo aa: «Kiilanɔɔ kɔɛ háá mó tiiya o nda lo dí, kɛ o co muungu le.»

¹⁹Mí Yoram viam vɛlɛ vana diinndɔ ɲaanun o sow coo-o, mó komal nda, mó kɔ dimul nda aa: «Masaa ɲuna te la connun o kɔlɲuloo nin nanu.» Mí Yehu muli aa: «Ɔ́ɔ̀ mako nɔmndo o ken nin? Mulin ma hiow ya kɔɔli.»

²⁰Mí kpalilnɔɔ yɔngu diomndo aa: «O kɔɛ mó tiiya di, kɛ o co hunɔɔ le. Nduyɛ, mɛɛ ya co nda cɔu hunɔɔ yɛ, vana ce pɛ aa Yehu po Nimsi-o co hunɔɔ a nda ni. O co hunɔɔ nda laci maa vana seemɛi.»

²¹Mí masaa Yoram dimul vannda le ɲɛ ɲaanan ndɔ soa nan-ndo dovio, má dovi ndu. Mí Yoram masaa Israɛl a Ahasia masaa Yuda a hel o ɲɛla ɲaanannda ndala soa nan-ndan coo, má kɔa Yehu bɔŋa nda ŋiɔn kpow. Má bɔŋan nda ndaa o ciɛi Nabɔt Yisrɛeliinɔ-e nin kpafii.

²²Fɔ́ɔ́fɔ̀, lɔ́ɔ́ Yoram ce Yehu-o, mó ɲuna ndu aa: «Yehu, vɛ̀ɛ̀ la co kɛndɛ nɛ?» Mí Yehu mulul ndu aa: «Kɛndɛ yɛɛ nɛ? Yesabɛl kala nɔm co vɔ piɔmaa fondoa sooloo, o nɔ vɛlɛ balan o mangala lekueiyo nin háá hau!»

²³Mí Yoram mulin dɔ́ɔ́, mó ɲaanun, mó va Ahasia yondallo aa: «Ahasia sei! Dúmbóó ndei!»

²⁴Mí Yehu kindu kpaasiaa ndɔɔ, mó mal, mí kɔɛi kɔ bii Yoram o congúla tumndan tɛɛn, mí i kei ndu kɔllo buli, mí i kɔ fula lekɔɔli. Mí Yoram del o ɲɛ ɲaanan ndɔ soa nan-ndo nin.

²⁵Mí Yehu dimul Bidkar va ɲɛm ndɔn cɔwvon cuaa-o aa: «Cua ndu, mà viow ndu o ciɛi Nabɔt Yisrɛeliinɔ-e nin. Kani taa loonun pɛ telen naa n va kelaa naa nɔm a ɲɛla ɲaanannda soa nan-ndan Akab fuɲa ndɔ kɔɔli-o, mí Mɛlɛka dimi sɔɛi he a ndu Akab o kɔɔ aa:

²⁶‹Ya Mɛlɛka, cɛi mí ca Nabɔt nda poaa ndɔa o piɔ́mndo. Lelan, fɔ mì mingul nɔm dɛnɛ kon, o yondo pilɔɔ ho nin, ya Mɛlɛka soaa nuaa ni›. Lelan cua ndu mà viow ndu yondoo nin mɛɛ Mɛlɛka dimi lɔ́ɔ́ kon yɛ.»

²⁷Ahasia, masaa Yuda cɔu lende, mó sɔndan, mó kei a nɛi Bɛt-Kan-ndo. Mí Yehu ɲaanun ndu kɔɔli, mó dimi aa: «Ndu bɛɛ, la viɔ ndu a kɔɛi.» Má yɔŋul ndu o ɲɛ ɲaanan ndɔ soa nan-ndo coo telen nda va helɔɔ Kur, o co Yibleam ikɛi-yo. Mó kɔ viannun Mekido, lon o vi ni.

²⁸Mí buɛyaa ndɔa cua ndu o ɲɛ ɲaanan soa nan-ndo nin, má kɔa a ndu Yerusalɛm, má kɔ kumbu ndu o sɛi ndɔɔ nin fuɲaa ndɔa mamaa ikɛi, o Kobi David-o nin.

²⁹O vɔsi tɔ́ a ò pilɛndɔɔ nin, o masale Yoram po Akab-o len bɛngu Ahasia siŋnun masaa Yuda ni.

³⁰O kon, mí Yehu luɛi Yisreɛl. Yesabɛl tueyɔɔ lende, mó suinun ɲɛ ŋɛlɛngi-ŋɛlɛngio pum o lahɔl, mó bɛɛndiaa bollen ɲɛkɛndɛi, mó kɔ sim tofaa o dio-pɔmbɔɔ.

³¹Yehu hiovɔɔ dɔ́ɔ́ dio kobio mó luɛi ciee, mí Yesabɛl ɲuna ndu aa: «Vɛ̀ɛ̀ a hin kɛndɛ nɛ, nɔm vana dii hoo masa nɔmndo-o? Nɔm maa Simri lekɛ́ndɛi n co ni[8].»

³²Mí Yehu tofa coocoo o dio-pɔmbɔɔ, o kon mó ɲuna aa: «Nɛ̀ɛ́ co yɛ le ya? Nɛ̀ɛ́-nɛ̀?» Mí vanaa nda kɛsi kɔllo coo o cɛi lemasaa nin-nda a ŋiɔn, te kon te a yaa a nangun o dio-pɔmbɔɔ, má tofa nɛɛ Yehu va-a.

³³Mí Yehu dimul nda aa: «La ɲindu ndu lɛŋ!» Má ɲindu ndu, mí kooma ndɔan ma vesulun o cìì cɛiyo, mí ma vesulun vɛlɛ soa. Mí Yehu kei ndu coo a ɲɛ ɲaanan ndɔ soa nan-ndo.

³⁴O kon, mí Yehu luɛi o cɛi lemasaa nin, mó dia ɲɛdiaa, mó kol. Mó dimi aa: «La toosiaa sɔɛi cua dangaa ho, mì la kumbu ndu, kani cua masaa[9] o va ni.»

³⁵Mí vannda fula le ndu kɔlan kumbɔɔ, kɛ ɲɛ nda komal nin daama-o va kpokpoo, pelon a bala kɔlta ndɔlan ni.

³⁶Má muungu cɛinin, má kɔ downun Yehu kona a sɔɛi ken o kɔɔ. Mí Yehu dimi aa: «Sɔɛi he Mɛlɛka ndóò dimi a sondo vana ndɔ baalaa ni, Elii fula Tisbe-o pɛɛn aa: ‹Tunnda dianin dialun Yesabɛl-lon yondoo nin Yisreɛl.

³⁷Ɲɛ tɔ̀ co lo-o saŋnunnin yondoo nin Yisreɛl lon maa puulu sál. Vana nɔlanin bɛɛ dimio le aa Yesabɛl co hoo ni.›»