Read Kissi 1Dɛnnda lemasalan 11 Bible Online

1Dɛnnda lemasalan 11 - Kissi bible

1Dɛnnda lemasalan 11

¹Mí Israɛlla kpow a cuungian nɛɛ David va Hebrɔn-nda, má dimul ndu aa: «Nɔm pila sina maa ɲɛ pilɔɔ naa n co naa niaa ni.

²Paandu pa, lɔ́ɔ́ Saul va masalen tosaa-o, nɔm va Israɛlla simndan laci le kɔlan o cɔwvo ni, kani Mɛlɛka Hala nɔmndo ndóò cii nin nɔm dimul maa nɔm vanin simlacinɔ vanaa ndɔa ni, Israɛlla pɛɛn.»

³Le hee, mí kaasoŋaa kɔlkalua Israɛlla kpow a kɔ komal David nɛɛ o va Hebrɔn-nda, má yii kpemaa Hebrɔn ndon nda ndaa le ndu siinguuo masaa, má pɔla ndu pɔla lemasaa mɛɛ Mɛlɛka ndóò dimi sɔɛi ken a sondo Samiɛl-lo yɛ.

⁴Mí David nda Israɛlla kpow a kuel kobio Yerusalɛm, kobi nɔ vɛlɛ kon diolan aa Yebus-o, kani Yebusiia va icali o tàndá kon nin ni.

⁵Mí Yebusiaa kan tɛɛndan David, má dimul ndu aa: «A lueinin ciee nanu le[21]!» Kɛ mó hialu calta vanaa cɔwva Siɔn, o nda mɛɛlu kon diolan ke aa Kobi David-o-o pɛɛn.

⁶Nduyɛ, David ndóò dimi nin paandu aa: «Vana tase kɔanin mo del Yebusiia coo a cɔwvo-o, ndu siŋnunnin simlacinɔ vanaa cɔwva ni.» Paale pilɛ, mí Yoab po Seruya-o kɔ tiŋ cɔwvo, mó siŋnun niko simlacinɔ vanaa cɔwva.

⁷Mí David kɔ kila calta ndɔlan o calta vanaa cɔvaa kan nin. Lelan ndáà ke fonda kon diolan ni aa: «Kobi David-o».

⁸Mó balu dangala kobio a tangulta sɛnɛilan, kandɔɔ a Millo háá balɔɔ sɔ́, mí Yoab ndu mingi ciee kɔllo tangul.

⁹Tɔ́ɔ́ David-o va hiovɔɔ laci a handɔnndo lecoo tuŋ, kani Mɛlɛka-Nɔ-Kpaayaa-Kpow-vo va ndu ikɛi.

¹⁰Diola kuubaa cɔvaa heelu David o masalen-nda la yɔŋnun ndan ni, nda luei masale ndɔlen yoomuan nda Israɛlaa tɔ̀a kpow latulu ni, maa mɛɛ Mɛlɛka ndóò dimi yɛ.

¹¹Nda yɔŋnun haa ni: Yasobeam[22] fulaa o polale Hakmoni len nin, o va kunda n'van beleyaa-a bollen. Paale pum, mó cua bál ndɔɔ, mó kɔ dii yaamɔɔa n'van kɛmɛ leyáá o lepilɔɔ.

¹²Ndu cɛn pɛ, Eleasar po Dodo Ahohiinɔ-o, o va vana pilɛ o kuubaa yáá-aa ndáà hiow yoomuan kpow-va tɛɛn.

¹³O va David ikɛi Pas-Dammin, nɛɛ Filistia ndáà cuungian le cɔwvo tosaa-a. Ciɛi ɔrse va o fonda kon, mí vanaa cɔvaa Israɛlla ɲaanun Filistia.

¹⁴Mí Eleasar nda vanaa ndɔa cɔwva kɔ cal Filistia mɛngɛlaa o ciɛi ken kɔllo, má fulal nda fɛlɛmɛndɛn a cɔwvo, má diw Filistia kan. Mí Mɛlɛka yɔngu Israɛlla yoomuma bɛndu-bɛnduan, má nɔla yaamɔɔa o cɔwvo.

¹⁵Mí simlacia nda yáá, fulaa o kunda simlacia n'van beleyaa-a tɛɛn, a kɔa David ikɛi nɛɛ o va o pow kpovaa coo, o buululan Adulam nin-nda, dɔ́ɔ́ngɔ́ Filistia ndu va o bóllo Refaim nin.

¹⁶David va o viannanndo nda langbaa ndɔa, mí Filistia nda va Bɛtlɛhɛm.

¹⁷Mí kolɔɔ bii David, mó dimi aa: «Ko nɛ̀ɛ́-nɛ̀ kɔ cuu yɛnin ya mɛmma co o soon mandaa mamɛnndo nin Bɛtlɛhɛm ciee-lekɔɔ-an le kolɔɔ?[23]»

¹⁸O kon mí kuubaa yáá-aa kan dimi aa: «Mɛɛ la va pɛ la va!» Má kɔa cɔ́-cɔ́, má kɔ luɛi a kpaayaa o dɔ́ɔ́ngɔ́ɔ̀ Filistia nin, má kɔandu mɛmma kalan. Má muungu a man, má kɔ yɔngu David. Kɛ David cɛl le man kolɔɔ le, mó solul Mɛlɛka man sálàá, mó cuiŋi man lɛŋ.

¹⁹Mó dimi aa: «Vanaa kɔɛ haa ma kɔ hun a mɛnndan man-nda, sɔngɔ yoomula ndalan nda vɔngul le man kɔlan kɔndɔɔ ni. Lelan te i kol man pɛ, o co kooma vanaa vɔngul yoomula ndalan-nda le ya kol man te?» O cɛl le man kolɔɔ le pɛ. Ɲɛ kuubaa yáá-aa ha tosa-o va kon ni[24].

²⁰Abisai, puapilɛ Yoab-o va simlacinɔ kunda vanaa yaa-o ni. Paale pilɛ, mó kɔ tisa yaamɔɔa coo a bál ndɔɔ, mó dii n'van kɛmɛ leyáá. O kon o sɔla tɔ́ɔ́ bɛndoo vanaa yáá-aa kan tɛɛn ni.

²¹O kunda vanaa yaa kon nin, ndóò hiow tɔ́ɔ́ bɛndoo, lelan ndáà handu ndu bolle kunda kon ni. Vana-vana óò siiman a ndu o kunda vanaa yáá-aa kan tɛɛn te[25].

²²Benaya, po Yehoyada-o, kuubanɔɔ a vana dialun kalaa o va ni, Kabseɛl ndóò fula ni. Ndu dii kuubaa cɔvaa ŋiɔnda Moab ni. Ndu koni tol vɛlɛ paale pum o soon mandaa mamɛnndo nin ni, mó kɔ dii yàlàá. Paale len, mɛmma n'kpungban ma va delio.

²³Benaya kon koni dii vɛlɛ Esiptenɔ va bandei dunndo leŋuɛɛnu-o ni. Bállo va langbanɔ kon o ba celullo maa yɔm nda simbulu kola-yɔɔsɔɔ o ndu tɔndaa-o. Ndóò kuello ndu a yɔmndo, mó del ndu coo a cɔlɔbaa, mó poonda Esiptenɔ kon bál va ndu o ba-o, mó dii ndu a ndu.

²⁴Ɲɛ Benaya po Yehoyada-o tosa-o yɔŋnun kon ni, o kon mó sɔla tɔ́ɔ́ bɛndoo vanaa yaa kan coo.

²⁵Ndóò hiow n'van beleyaa-a tɔ́ɔ́ ni, kɛ ndóò siiman a vana-vana o kunda vanaa yaa-o nin te. Mí David handu ndu bolle vanaa va cumullo o bɛ́ɛ̀ lemasaa-a.

²⁶Kuubaa cɔvaa celen va vɛlɛ o kan kɔɔli: Asaɛl, puapilɛ Yoab-o, Ɛlhanan po Dodo fula Bɛtlɛhɛm-ndo,

²⁷Samɔt Haroriinɔ, Helɛs Peloniinɔ,

²⁸Ira po Ikes Tekoanɔ-o, Abiesɛr Anatɔtnɔ,

²⁹Sibekai Husatiinɔɔ, Ilai Ahohiinɔ,

³⁰Maharai Netofatiinɔ, Helɛd po Baana Netofatiinɔ-o,

³¹Itai po Ribai fula Kibea-o, o lɛŋnde poaa Bɛnyamɛn-nda len nin-ndo. Benaya Pireatoniinɔw,

³²Hurai fula o peela pɔmbɔlan Kaas-o, o tàndá Efraim-ndo coo lan nin-ndo, Abiɛl fula o dɛɛlaa Araba nin-ndo,

³³Asmavɛt Baharumiinɔ, Eliaba Saalboniinɔ,

³⁴poaa Hasɛm Kisoniinɔ-a, Yonatan po Sakue Harariinɔ,

³⁵Ahiam po Sakar Harariinɔ-o, Elifal po Ur-o,

³⁶Hefɛr Mekeratiinɔ, Ahiya Peloniinɔ,

³⁷Hɛsro Karmɛlnɔ, Naarai po Ɛsbai-yo,

³⁸Yɔɛl, puapilɛ Natan-ndo, Mibhar po Hakri-o,

³⁹Selɛk Amɔnnɔ, Narai Berotiinɔ, ndu va vanaa cuaa ɲɛm cɔvun Yoab po Seruya-on ni.

⁴⁰Ira Yetriinɔ, Karɛb Yetriinɔ,

⁴¹Uri Hitiinɔ, Sabad po Alai-yo,

⁴²Adina, po Sisa fula o polale Rubɛn-nden nin-ndo, ndu va simlacinɔ vanaa fula o polale Rubɛn-nden nin-nda ni, mó hun a n'van beleyaa kɔɔli.

⁴³Hanan po Maaka-o, Yosafat Mitniinɔ,

⁴⁴Usia fula Asteratiinɔ, Sama nda Yehiɛl poaa Hotam fula Aroɛr-o-a,

⁴⁵Yediaɛl nda Yoha poaa Simri Tisiinɔ-a,

⁴⁶Eliɛl fula Mahavim-ndo, Yeribai nda Yosavia poaa Ɛlnaam-nda, Yitma Moabunɔ,

⁴⁷Eliɛl, Obɛd a Yaasiɛl fula Mesobaya-o.