Read Kissi 1Dɛnnda lemasalan 12 Bible Online

1Dɛnnda lemasalan 12 - Kissi bible

1Dɛnnda lemasalan 12

¹Telen David va Saul po Kis-o ɲaanɔnndo-o, mó kɔ viannun Siklak, mí kuubaa cɔwva pum yiinun kundaa, má komal ndu lon le ndu cɔwvo malaa.

²Ndáà nɔ kɔɔn a fáàndalan o laba, mɛɛ ndáà caa lan kpow vuuo a bala kɛndɛlan yɛ kani ndáà caa vɛlɛ lan vuuo a bala mɛltan ni. Puapilɛa Saul-la nda va ni, kani o polale Bɛnyamɛn-nden nin nda bɛɛ ndáà fula ni.

³Ahiesɛr va simlacinɔɔ-o nda Yoas puapilɛ ndɔ, poaa Semaa fula Kibea-o nda va ni, Yesiɛl nda Pelɛt poaa Asmavɛt-a, Beraka nda Yehu, fulaa Anatɔt.

⁴Yismaeya Kabaɔnnɔ, o va vana pilɛ o vanaa va bolle kunda n'van beleyaa-a tɛɛn,

⁵Yeremi, Yahasiɛl, Yohanan a Yosabad Kederatiinɔ,

⁶Elusai, Yerimɔt, Bealia, Semaria a Sefatia fula Harifiinɔ,

⁷Ɛlkana, Yisiya, Asareɛl, Yoesɛr, Yasobeam a vanaa fula o polale Kora len nin-nda,

⁸Yoela nda Sebadia, poaa Yeroham fula Kedɔr-o-a.

⁹Mí kunda celen can vɛlɛ o polale Kad len nin, má kɔ komal David nɛɛ o va o vionnɔnndo nin o lɛŋnde veselɛilen nin-nda. Kuubaa caa cɔwvo taw-taw-va nda va ni, kɔ̀ɔ̀la cɔwlan a báltan la va nda o laba. Vanáà ce nda pɛ vueinɔnndo aa yàlàá ni, ndáà keleŋa vɛlɛ vanáà ca ko aa puwvɛa o pembon coo ni.

¹⁰Esɛr va simlacinɔ nda tasoo ni, ndu faŋan pɛ Abdia, o yàándɔɔ va Eliab ni,

¹¹o hiɔɔlundɔɔ Mismana, o ŋuɛɛnundɔɔ Yeremi,

¹²o ŋɔmpumndɔɔ Atai, o ŋɔmmɛwndɔɔ Eliɛl,

¹³o ŋɔmaandɔɔ Yohanan, o ŋɔmahiɔɔlundɔɔ Ɛlsabad,

¹⁴o tɔ́ndɔɔ Yeremi, o tɔ́ a ò pilɛndɔɔ Makbannai.

¹⁵Nda yɔŋnun simlacia cɔwva o poaa Kad-a tɛɛn ni. Kuubanɔ cɔw óò hiow dɔɔnanndo o nda tɛɛn-ndo, ndu pilɛ kpé ndóò hiow le n'van kɛmɛ o cɔwvo nin. Kuubanɔ ndóò hiow yɛ nda kpow cɔwvo caa-o, ndu va le n'van vàá pilɛ o cɔwvo nin.

¹⁶Nda fɔlɔn a taŋ Yurdɛn a telen sialte bɛndoo ni. Telen kon pee kon ndóò nɔ hunɔɔ ni, mì mɛmma ndɔan máà fula o kɔngɔlan. Mɛɛ nda taŋ, má kɔ toaw vanaa va calle leeloo o bóltan nin a ba paalen le can-ndo a á ba le del-lo-a.

¹⁷Mí vanpiaandua pum a fula o polale Bɛnyamɛn-nden nin, mí a pum a fula o polale Yuda len nin, má komal David nɛɛ o va o vionnɔnndo nin-nda.

¹⁸Mí David bɔŋa nda, mó dimul nda aa: «Te a yiyan kɛndɔɔ niaa hin o ya lo le ya malaa ni, mɛɛ i cɛl a kɔl nuu kpow, mì n vannun diom pilɛ naa niaa. Kɛ te le ya baa keiyo o mundu, le ya malɔɔ yaamɔaa nia o ba niaa hin ni, nduyɛ i yɔŋ yɛ vana dɛnɛ vɔɔn kɛ́-kɛ̀ le, maa Hala fuɲaa naa mamaa cɔ dɛnɛ kon, mò kelu naa yamɛi tɛɛn!»

¹⁹O kon, mí Kɔl Hala-o luɛi Amasai va simlacinɔ pilɛ le kunda n'van beleyaa-o nin, mó dimi aa: «Le nɔm naa n co ni yoo David! Nɔm po Yisai-yo naa n co kɔɔli ni. Kɔlɲuloo co le nɔm a le vanaa co nɔm malaa-a! Kani Hala nɔmndo cii nɔm mala.» Mí David naŋ kɔl a nda, mó ke nda simlacilen o fondalan lapum vanaa ndɔa cɔwva tɛɛn.

²⁰Mí vanaa fula o polale Manase len nin-nda kɔa David kɔɔli telen o yiinun a Filistia le Saul cɔlɔbaa-o. Kɛ David nda vanaa ndɔa mala lɛ Filistia cɔwvo le, kani ndáà ciiyo sɔɛi lecoo, mí simlacia Filistia mingi David, má dimi aa: «N laalan David le, kani o tiwba mò kɔ mulin Saul vana ndɔ bɛndu paandoo kɔɔli le naa cɔlɔbaa.»

²¹Mɛɛ David muungu Siklak, mí vanaa fula o polale Manase len nin-nda sɔɔnguu ndu ikɛi, nda yɔŋnun haa ni: Adna, Yosabad, Yediaɛl, Mikaɛl, Yosabad, Elihu a Sitai. Nda kpow simlacia kundala n'van vaa pilɛ-a nda o polale Manase len coo ni.

²²Má mala David cɔlɔbaa, kani nda kpow kuubaa cɔwva nda va ni, simlacia nda va o vanaa cɔwva tɛɛn ni.

²³Nduyɛ lepalaa-lepala, vannda va hunɔɔ David ikɛi le ndu malaa, háá mo sɔla vanaa cɔwva kunda bɛndoo maa kunda vanaa cɔvaa Hala-a.

²⁴Mí kundala vanaa cɔvaa lapum la kɔa David kɔɔli Hebrɔn le ndu masale Saul-ten mingio o ba mɛɛ Mɛlɛka ndóò dimi yɛ. Kundala lan la yɔŋnun ndan ni:

²⁵o polale Yuda len nin, vannda vàála ŋɔmpum a kɛmɛ leŋɔmaa (6 800) va a bɛɛndiannda, mí ndáà kɔa a kɔ̀ɔ̀la cɔwlan a á báltan o laba le cɔwvo.

²⁶O polale Simeɔn-nden nin, kuubaa cɔwva n'van vàála ŋɔmmɛw kɛmɛ (7 100),

²⁷a Levii-a vàálan tan hiɔɔlu kɛmɛ leŋɔmpum (4 600).

²⁸Handɔɔ niko Yehoyada va bolle pangalen o poaa Aarɔn-nda tɛɛn-ndo lecoo. Ndu ndu, kuubaa cɔwva vàálan tan yáá kɛmɛ leŋɔmmɛw (3 700) va ndu kɔɔli ni.

²⁹Mí Sadɔk bɛɛ kɔa a simlacia bidiin a ŋiɔn fulaa o yungu fuɲa ndɔ-o nin. Kuubanɔ felengoo Sadɔk kon va ni.

³⁰O vanaa fula o polale Bɛnyamɛn-nden nin-nda tɛɛn, puapilɛa Saul-la pɛɛn, vannda vàálan tan yáá (3 000) a kɔɛ ni. Kani háá o telen kon, vanaa bɔɔ-bɔɔ o nda tɛɛn vannun-ndɔ baalaa o yungu Saul-lo lo.

³¹O polale Efraim-nden nin, vannda vaalan bidiin kɛmɛ leŋɔmaa (20 800) a kɔɛ ni. Vanaa tɔ́ɔ́ bɛndua nda va o yungula fuɲaa ndaa nin ni.

³²O polale tálále Manase len nin, vannda vaalan tɔ́ a laŋɔmaa (18 000) ndáà veelu diolan le kɔlan David suilio masaa ni.

³³Vanaa fula o polale Isakar len nin-nda ndáà nɔ dɛnɛ sinaa le ɲɛ Israɛlla ndáà bɛnda le tosaa-o, mɛɛ ndáà bɛnda le ndu tosaa yɛ, a telen ndáà bɛnda le ɲɛ kon tosaa-o cɔmndo ni. Vanaa lebolla a vanaa va nda o ba bɛngu-a kpow, a va n'van kɛmɛ lediin (200).

³⁴O polale Sabulɔn-nden nin, mí vanaa caa cɔwvo a ɲɛm cɔvun súú-súù ka-a, áà cɛlan ladiom le cɔwvo tosaa-a yiinan kundaa vaalan beleŋuɛɛnu (50 000), má komal David.

³⁵O polale Nɛftali len nin, simlacia cɔwva n'van vàá pilɛ (1 000), a vanaa ndáà nɔ kɔ̀ɔ̀la cɔwlan a báltan o laba-a vaalan beleyaa a laŋɔmmɛw (37 000) a kɔɛ ni.

³⁶O polale Dan-nden nin, vanaa ndáà caa cɔwvo-a kɔa vannda vaalan bidiin a laŋɔmaa kɛmɛ leŋɔmpum (28 600).

³⁷O polale Asɛr len nin, mí vanaa ndáà caa cɔwvo-a kɔa vaalan belehiɔɔlu (40 000).

³⁸O polama va icali Yurdɛn leeloo, a ba paalen le can-ndo-a nin, polale Rubɛn-nden, polale Kad len a polale tálále Manase len, vanaa cɔwva vaalan kɛmɛ a bidiin (120 000) ndáà kɔɛ a ɲɛm cɔvun súú-súù ka o laba ni.

³⁹Vanaa cɔwva ha kpow va a bɛɛndiannda, má kɔa Hebrɔn a kɔlta ndalan kpow, le David suilio masa Israɛlla. Israɛlaa tɔ̀a kpow va a kɔl pilɔɔ le David masalen keo.

⁴⁰Má tosa palɛi ndii yáá lon o David lo, a va dioo a kolɔɔ, kani mí vanaa nda komal lon-nda toosiaa ɲɛ-ɲɛ fee le nda.

⁴¹Hali vanaa va o tàndà kon balɔɔ-a, kandɔɔ o polale Isakar len nin kɔlan tiiyaa háá o polale Sabulɔn-nden a o polale Nɛftali len nin, a va nda ɲɛm dian cuuo o sofɛlɛa coo, o ɲɔɔmɛɛa coo, o milɛɛa coo a o nawva coo. Ɲɛm mun co mun ni: kpeyanndo, dɛɛla toaŋaalan, kpɔ̀nyɔ̀la n'rɛsɛnnda vesɛilan, mɔiyan, cuɛiyan, cɔlua pɔmbɔa a cɔlua bɛndua sɛ́lɔ́ɔ́ taw. Kani lɛŋnde Israɛl-ten kpow le va a kɔlkɛndɔɔ.