Read Kissi 1Dɛnnda lemasalan 13 Bible Online

1Dɛnnda lemasalan 13 - Kissi bible

1Dɛnnda lemasalan 13

¹Mí David bii bɔŋanndo nda simlacia vanaa cɔvaa kundala n'van vaa pilɛ-a a kundala n'van kɛmɛ-a, handɔɔ niko bɛndua tɔ̀a lecoo kpede.

²O kon, mó dimul Israɛlaa va lon-nda kpow aa: «Te hɛnan Mɛlɛka Hala naa-o sɔɛi he co ni, te o bɛnda pɛ a niaa, mɛɛ n viomnun kilaa o puapilɛa naa lo kɔɔli o lɛŋnde Israɛl-ten nin-nda lo, kɛ taama-taama o vanaa-solia-lasálàá lo a o leviaa co icali o kobila yɛ́-yɛ́lan nin-nda lo, haliko ma hun handun naa coo.

³O kon, mì n kɔ hunnun a kesu kpema Hala naa, kani o telen Saul-lo pɔ́ naa n pɔɛɛnun a sɔɛi kesu kpema kon ni.»

⁴Vannda cɔu maa toɲaa sɔɛi ken i va ni, mí nda kpow a cɛl ndi a kɔlkɛndɔɔ.

⁵Mí David cuungiaa Israɛlla kpow, kandɔɔ o pɛɛngulan a lɛŋnde Esipte len, kɔlan tiiyaa háá Hamat, le kɔlan Kiriat-Yearim, má kɔ hun a kesu kpema Hala-o.

⁶Mí David kɔa nda Israɛlla kpow Baala, Kiriat-Yearim pɛɛn, o tàndá Yuda-o nin, le kɔlan kesu Hala-o cuaa, le hunɔɔ a ndu. O kesu kon coo diola Mɛlɛka co icali mɛlɛkaa kanda ɲɛm Hala-on-nda tɛɛn-ndo la pialnun ni.

⁷Má kɔ soli kesu kalaa o Abinadab lo cɛinin, má kɛsi ndu o ɲɛ ɲaanan sɛnɛi soa nan-ndo coo. Usa nda Ahio va kɔlan a ɲɛ ɲaanan kon ni.

⁸Mí David nda Israɛlla kpow a va bangalan, bondomalan, dundulan a kɛ́ŋndon lɔɔ, má va bululan hɔŋndo. Mí nda pila va condon a yolan a kɔlta ndalan kpow Hala o hɔl.

⁹Ndáà tiiyaa o kpele lɔaa n'mallo Kidon[26] ikɛi, mí nawva siɛla, mí kesoo va le delɔɔ, mí Usa siɛndi baa le ndu saa,

¹⁰kɛ mí Mɛlɛka tambu kɔl a Usa, mó lɔaa ndu le tùú o tɔɔndan mó siɛndi baa le kesoo pilanndo-o. Mó vu o foofo kon Hala o hɔl.

¹¹Mí David tambu kɔllo le tùú Mɛlɛka lɔɔ Usa mó vu-o. Lelan nda ke fonda kon diolan ni aa Perɛs-Usa (kon co dimio ni aa «Fonda Usa sɔla lɔɔ-o)», diola lan fonda kon nɔ vɔ háá paalen nden ni.

¹²Mí siòònde bii ɲinkon David taw a Hala, mó ɲuna aa: «Vɛ̀ɛ̀ ya luei yɛnin kesu Hala-o ho o ya lo?»

¹³David luei lɛ a kesoo o ndu lo ciee le, má kɔ luei ndu o Obɛd-Edɔm fula Kat-o lo cɛinin.

¹⁴Paangon mún yáá, kesu Hala-o va o Obɛd-Edɔm ndo cɛinin. Mí Mɛlɛka dɔaw yungu Obɛd-Edɔm-ndo duaa a ɲɛm ndɔn kpow.