Read Kissi 1Dɛnnda lemasalan 14 Bible Online

1Dɛnnda lemasalan 14 - Kissi bible

1Dɛnnda lemasalan 14

¹Mí Hiram masaa Tir vim David vanaa sialaa lapowva a vanaa cuaa layindɔa, má kɔa a yɔmii sɛɛdrei le ndu kɔlan cɛiyo tengullo.

²O kon mí David sina dɔ́ɔ́ ma le kaola Mɛlɛka pila kaola Israɛlla-o o suili ndu masaa, mó soli masale ndɔlen tɔ́ɔ́ ni.

³Mí David yil vɛlɛ laandua celen Yerusalɛm, mó vialu hɔ́aa piaandua a hɔ́aa laandua.

⁴Diola hɔ́aa o velu kan Yerusalɛm-nda la co lan ni: Samua, Sobab, Natan, Salomɔn,

⁵Yibar, Elisua, Ɛlpalɛt,

⁶Noka, Nefɛk, Yafia,

⁷Elisama, Bɛeliada a Elifelɛt.

⁸Lɔ́ɔ́ Filistia tuei maa a cii David pɔla mó siŋnun masa Israɛlla kpow-vo, má heelu le kɔlan ndu nuwviaa. David ndóò tueyɔɔ lende, mó fula le nda kɔlan kpɛngbɛlaa.

⁹Mí Filistia kɔ tiw o bóllo Refaim nin.

¹⁰Mí David piɛi Hala, mó ɲuna aa: «Vɛ̀ɛ̀ o bɛnda pá mi kuel Filistia? A malnin pá nda ya o ba?» Mí Mɛlɛka mulul ndu aa: «Oi, kuel nda, i malnin nda nɔm o ba!»

¹¹Mí Filistia sɔɔnguu háá Baal-Perasim, lon David nɔla nda ni. O kon kɔɔli, mó dimi aa: «Hala yɔngu ya kpaayaa mí puusiaa yaamɔaa nia mɛɛ mɛnndan ma puusiaa kandaa nuaa yɛ.» Lelan nda ke fonda kon diolan ni aa Baal-Perasim (kon co dimio ni aa «Vana-Bɛndu-Ntɛɛngoo»).

¹²Mí Filistia ɲaanun, má mɛi piɔmaa ndaa, a cue nda le. Mí David dimul vannda má loam nda.

¹³O kon kɔɔli, mí Filistia muungu, má kɔ tiw vɛlɛ o ból pilɛ kon nin.

¹⁴Mí David piɛi vɛlɛ Hala. Mí Hala dimul ndu aa: «Ɲáánùn nda kɔɔli sanaa le! Muungu mà kɔ kiolu nda laci, mà kɔ fulal nda o bundɛ iyùúo[27] dangalaa.

¹⁵Tuma n tuɛinin diom n'peloo o yúii ken coo-o, a fula niko le cɔlɔbaa. Kani i vanin nɔm kɔlan laci le nɔm Filistia malaa cɔlɔbaa.»

¹⁶Mí David tosa mɛɛ Hala dimul ndu yɛ. O kon, mí vanaa cɔvaa Israɛlla nɔla Filistia, má toaw nda cɔnɔnndo Kabaɔn háá tiiyaa Kesɛr.

¹⁷Mí tɔ́ɔ́ David-o sɛŋin o lɛŋii ken nin kpow, mí Mɛlɛka siinguu ndu vana bɛndoo, mi vanaa-mangalaa-isɔɔa kpow a vo ndu.