Read Kissi 1Dɛnnda lemasalan 15 Bible Online

1Dɛnnda lemasalan 15 - Kissi bible

1Dɛnnda lemasalan 15

¹Mí David tengulun cɛilan o Kobi David-o nin, mó bɛɛndiaa fondaa le kesu Hala-o, mó toandu cɛi-kolaa le kesu kon lueiyo lenin.

²O kon mó dimi aa: «Leviia daama bɛnda le kesu Hala-o cuaa ni, kani nda Mɛlɛka hɛli le ndu cuaa a le baala ndɔɔ tosaa le lɔ́ɔ́-lɔ́ɔ̀ ni.»

³Mí David veelu Israɛlla kpow Yerusalɛm le kɔlan kesu Mɛlɛka-o cuaa, mà hun kɛsi ndu o fonda ndóò bɛɛndiaa le ndu-o.

⁴Mó veelu vɛlɛ poaa Aarɔn-nda a leviia latulu.

⁵O nda tɛɛn, mó veelu poaa Kehat-a n'van kɛmɛ a bidiin (120), Uriɛl puapilɛ nda va simlacinɔ ndaa ni.

⁶O poaa Merari-a tɛɛn, mó veelu n'van kɛmɛ lediin a bidiin (220), Asaya puapilɛ nda va simlacinɔ ndaa ni.

⁷O poaa Kɛrsɔn-nda tɛɛn, mó veelu n'van kɛmɛ a beleyaa (130), Yɔɛl puapilɛ nda va simlacinɔ ndaa ni.

⁸O poaa Elisafan-nda tɛɛn, mó veelu n'van kɛmɛ lediin (200), Semaya puapilɛ nda va simlacinɔ ndaa ni.

⁹O poaa Hebrɔn-nda tɛɛn, mó veelu n'van belaŋɔmaa (80), Eliɛl puapilɛ nda va simlacinɔ ndaa ni.

¹⁰O poaa Usiɛl-la tɛɛn, mó veelu n'van kɛmɛ tɔ́ a à ŋiɔn (112), Aminadab puapilɛ nda va simlacinɔ ndaa ni.

¹¹Mí David veelu vanaa-solia-lasálàá, Sadɔk nda Abiatar, a levii ha: Uriɛl, Asaya, Yɔɛl, Semaya, Eliɛl a Aminadab.

¹²Mó dimul nda aa: «Niaa co simlacia o yungula leviia nin ni, la dindin latulu a puapilɛa niaa, mì la kɔ cua kesu Maalii Hala Israɛlla, mì la kɔ kɛsi ndu o fonda ya bɛɛndiaa le ndu-o.

¹³Kani la ve nanu o tasendɔ le, mí Mɛlɛka Hala naa lɔaa naa, bau n cue ndu mɛɛ tɔŋnda ndɔlan la co yɛ le.»

¹⁴Mí vanaa-solia-lasálàá a leviia dindin le kesu Mɛlɛka Hala Israɛlla yɔɔ.

¹⁵Mí poaa leviia sɔaa yɔmii lakpɔlɔnnde o kesu kalaa, má cua ndu o lacongú, maa mɛɛ Mɛlɛka ndóò dimul Moise le nda cɔmndo yɛ.

¹⁶Mí David dimul simlacia leviia le puapilɛa ndaa, vanaa solia n'condua dimullo maa a cua ɲɛm-caan o laba, bangalan, bondomalan a kɛ́ŋndon, ma va mun lɔɔ, haliko mi diom bɛndoo va fulaa le cɔmndo maa kɔlkɛndɛ bɛndoo co nda o lakɔl.

¹⁷O kon mí leviia yɔngu Heman po Yɔɛl-lo baala kon. O puapilɛa ndɔa tɛɛn, má vɛlɛ hɛli Asaf po Berekia-o, Etan po Kusaya-o, fulaa o polale Merari puapilɛ ndalen nin.

¹⁸O nda kɔɔli, leviaa celen va vɛlɛ lon nda ikɛi, kpalilaa cumulaa ladioa: Sakari, Bɛn, Yasiɛl, Semiramɔt, Yehiɛl, Unni, Eliab, Benaya, Maaseya, Matitia, Elifelehu, Mikneya, Obɛd-Edɔm a Yeiɛl.

¹⁹O vanaa solia n'condua tɛɛn, Heman, Asaf a Etan ndáà nɔ kɛ́ŋun cómulan nda cɔw a daɲan-ndon o laba ni.

²⁰Mí Sakari, Asiɛl, Semiramɔt, Yehiɛl, Unni, Eliab, Maaseya a Benaya nda va bangala diomnda léngbén-léngbénndan lɔɔ.

²¹Mí Matitia, Elifelehu, Mikneya, Obɛd-Edɔm, Yeiɛl a Asasia nda va bondomala diom bɛndulan lɔɔ, le cɔmndo mɛɛ condon mún bɛnda le solinndo yɛ.

²²Kenania va simlacinɔɔ le leviaa ndáà cua kesu Hala-o le kɔlan-ndo ni, kani caa pila ndóò caa baala kon ni.

²³Berekia nda Ɛlkana va kpalilaa cumulaa ladioa ni, ndáà sim kesoo ikɛi kpɛɛlun ni.

²⁴Vanaa-solia-lasálàá va le bululan hɔŋndo kesu Hala-o laci-a va Sabania, Yosafat, Netaneɛl, Amasai, Sakari, Benaya a Eliesɛr ni. Obɛd-Edɔm nda Yehiya bɛɛ, kpalilaa cumulaa ladioa va simndan kesoo ikɛi kpɛɛlun-nda nda va ni.

²⁵Mí David, kaasoŋaa kɔlkalua Israɛl a simlacia vanaa cɔvaa kundala n'van vaa pilɛ-a bii nɛiyo a kɔlkɛndɛ bɛndoo, le kɔlan kesu kpema Mɛlɛka-o cuaa o Obɛd-Edɔm-ndo cɛinin.

²⁶Leviia tiiyaa a ndu, má solul Hala sálàá: navaa tovaa nda ŋɔmmɛw a saa kóndóa nda ŋɔmmɛw, le manda ndu Hala manda nda-o.

²⁷Domala bɛndula toosian a yiiŋii saa lan la va David nda leviaa va kesu kpemaa cuaa-a lekɔɔ, lan koni la va vɛlɛ vanaa solia n'condua a Kenania va simlacinɔ vanaa cuaa kesua-o lekɔɔ ni. Doma ifalen solia lasálàá va David lekɔɔ.

²⁸Mí Israɛlla kpow a kɔa a kesu kpema Mɛlɛka-o Yerusalɛm a kponyo bɛndoo, a va bululan hɔŋndo, ma va vɛlɛ kɛ́ŋndon, tòvalan a bondomalan lɔɔ.

²⁹Telen kesu kpema Mɛlɛka-o tiiya o Kobi David-o nin-ndo, mí Mika, cua Saul-lo tofa o dio-pɔmbɔɔ. Ndóò cɔu masaa David huuloo a yolan, mó pɛɛsaa ndu o kɔl ndɔɔ nin.