Read Kissi 1Dɛnnda lemasalan 16 Bible Online

1Dɛnnda lemasalan 16 - Kissi bible

1Dɛnnda lemasalan 16

¹Má hun kɛsi kesu Hala-o o cɛi-kola-toandaa David ndóò simi le ndu-o nin. O kon má soli sálàla loamaalan a sálàla kɔlɲululan le Hala.

²David ciiyo sálàlan solio, mó dɔaw vannda duaa o diola Mɛlɛka lan.

³O kon kɔɔli mó piɔw Israɛlla ɲɛm dian: vanapɔnɔ, vanalanɔ, mí vana-vana sɔla buloo, dɛɛ nda toŋ a tamaro-o a dɛɛ nda toŋ rɛsɛnndon-ndo.

⁴Mí David simi leviia pum o kesu Mɛlɛka-o laci le baalaa tosaa, le Mɛlɛka Hala Israɛlla sangalaa a le ndu biiloo.

⁵Nda yɔŋnun haa ni: simlacinɔ tasoo va Asaf ni, o diinndɔɔ Sakari. Telen Asaf va kɛ́ŋndon lɔɔ-o, mí Asiɛl, Semiramɔt, Yehiɛl, Matitia, Eliab, Benaya, Obɛd-Edɔm a Yehiɛl nda va tòvalan a bondomalan lɔɔ.

⁶Vanaa-solia-lasálàá: Benaya nda Yahasiɛl, nda nda va bululan hɔŋndo o kesu kpema Hala-o hɔl-ndɔ.

⁷Paale len le yɔŋnun paale tasele David ke Asaf nda puapilɛa ndɔa baalaa le Mɛlɛka sangalaa a condon-nden ni.

⁸La biilu Mɛlɛka, la lisa diola ndɔlan! La cɔm dɛnnda ndɔla bɛndulan vanaa-mangalaa-isɔɔa tɛɛn.

⁹La solul ndu condon, la lisa ndu a ɲɛm-caan, la cɔm dɛnnda ndɔla kaamaalan.

¹⁰La hini kɔl le diola ndɔla diandaalan. Niaa vanaa co Mɛlɛka nuwviaa-a, la dɔwnun ɲaale.

¹¹La mulul Mɛlɛka hɔlla, la va ndu nuwviaa lɔ́ɔ́-lɔ́ɔ̀.

¹²Niaa cuavaa Israɛl-la, Israɛl yɔŋnun vanaa baalaa ndɔɔ-o pɛɛn, niaa fula o polale Yakɔb, vana o hɛli-o len nin-nda, la loonun a dɛnnda kaamaala o tosa lan, mì la yiyan o kɔndɔfilta ndɔlan a o yaman fula ndu o sondo-on coo.

¹⁴Ndu co Mɛlɛka Hala naa ni, ndu kialu lɛŋnden kpow iyama ni.

¹⁵La loonun a kpema ndɔ o yii le fɛɛn a fɛɛn-ndo, a sɔɛi o dimi ken le lambilan a lambilan-nde.

¹⁶Kpema o yiilu Abraham-ndo co kon ni, mɛnalan o mɛnalan Isaak-o pɛɛn.

¹⁷Mó tiindal Yakɔb sɔɛi ken maa tɔŋ, mó yiilul Israɛl kpema fɛɛn-fɛɛndo.

¹⁸Mó dimi aa: «I yɔngunin nɔm lɛŋnde Kanaan-nden, kɛ́ niaa vanin kon ni, nɔm a polale nɔmnden!»

¹⁹Nduyɛ, kunda pɔmbɔɔ daama nda va ni, a ve sɛ́lɛ́ le, mialla nda va o lɛŋnde len nin ni.

²⁰A cɛn pɛ o lɛŋnden nden nin, a kɔɛ vɛlɛ o lɛŋnde celen nin, a cɛn pɛ o masalen nden, a kɔɛ vɛlɛ o masale celen nin.

²¹Kɛ Hala cɛl mi vana-vana saangiaa nda le, mó vueinun masaa le nda,

²²mó dimul nda aa: «La pilan vanaa nia ya pɔla-a le, la tosal vanaa co diom nuu tɛɛnguuo-a dɛnɛ vɔɔndo le.»

²³Niaa vanaa co o lɛŋnden coo-a kpow, la solul Mɛlɛka condon. La va Yoongu kɛndɛ ciinda ndɔɔ dimio lepalaa-lepala.

²⁴La cɔm vanaa-mangalaa-isɔɔa kpow biilu ndɔɔ, mì la cɔm nda dɛnnda ndɔla kaamaalan.

²⁵Kani Mɛlɛka co o bɔɔ, le ndu biiloo bɛnda ni, o hiow halaa kpow kpaayaa.

²⁶Nduyɛ halaa vannda nɔ kan-nda co ɲɛ-ɲɛ le. Mɛlɛka cɔw halataalaa ni.

²⁷Bɔɔbɔɔyɛi ndɔɛi a pangele ndɔɔ co ndu tengaa laci. Fonda o co icali nin-ndo pɛ cá a kpaayaa a á biilu ndɔɔ.

²⁸Niaa yungula vanaa súúla yɛ́-yɛ́a co o lɛŋnden coo-a, la yɔngu Mɛlɛka, la yɔngu Mɛlɛka bɛɛlen mì la cɔm kpaaya ndɔɔ.

²⁹La sangala diola Mɛlɛka lan, mì la hin a ɲɛm-kén niaan o ndu lo. La luɛi mì la tundun Mɛlɛka o labɛngunin telen diondɔɔ ndɔɔ fula ceen-ndo.

³⁰Niaa vanaa co o lɛŋnden coo-a kpow, la ɲiiya Mɛlɛka o hɔl, lɛŋnden le co isisi yili, le kpeŋan te.

³¹Màá halataalaa dɔwnun ɲaale, mì lɛŋnden le naŋ kɔl! La dimul vannda kpow maa «Mɛlɛka co masaa ni.»

³²Màá mɛmma ihɛllan a ɲɛm co lenin-ndon kpow n kuŋ! Mì yondoo dɔwnun ɲaale a ɲɛm co lenin-ndon kpede.

³³Mì yɔmii co o bundɛlan nin-nde solul Mɛlɛka diomndo a ɲaaloo, kani o co hunɔɔ le lɛŋnden yamɛi kiolɔɔ.

³⁴La biilu Mɛlɛka, kani o naŋ, ɲíí ndɔɛi co le fɛɛn a fɛɛn.

³⁵La yonda mì la dimi aa: «Hala vana naa baŋaa, baŋa naa, cuungiaa naa nɛɛ pilɛ, ma baŋa naa vanaa-mangalaa-isɔɔa o ba, haliko mi n lisa diola nɔmnda diandaalan, mì n cɔm ɲaale naa kpow o nɔm lisaa nin.»

³⁶Biiloo co le Mɛlɛka Hala Israɛlla, le fɛɛn a fɛɛn! Mí vannda kpow cɛl o lepilɔɔ aa: «Amiina! Biiloo co le ndu.»

³⁷O kon kɔɔli, mí David mɛi Asaf nda puapilɛa ndɔa o kesu kpema Mɛlɛka-o ikɛi lon, haliko mi ndáà hiow laci a falenndon tosaa mɛɛ ndóò bɛnda le tosanndo lepalaa-lepala yɛ.

³⁸Mó mɛi Obɛd-Edɔm, po Yeditun-ndo nda Hosa a puapilɛa ndaa n'van belaŋɔmpum a à ŋɔmaa (68) lon, le diolan cumullo.

³⁹Mó mel Sadɔk vana-solia-lasálàá a puapilɛa ndɔa vanaa-solia-lasálàá baala solia lasálàá o Calta Mɛlɛka lan hɔl-ndɔ Kabaɔn,

⁴⁰haliko mi ndáà va sálàla loamaalan solio idii a icɔl o fonda-loamaa-lasálàá coo le Mɛlɛka, a le ɲɛ-ɲɛ sɛvan o tɔŋ Mɛlɛka ke Israɛlla-o nin peeloo.

⁴¹Vanaa va nda ikɛi-ya va Heman nda Yedutun a vanaa celen, a ndáà hɛli má veelu nda diolan le Mɛlɛka biiloo-a ni. Kani ɲíí ndɔɛi co le lɔ́ɔ́-lɔ́ɔ̀.

⁴²Mí Heman nda Yedutun a vanaa va nda ikɛi-ya va bululan hɔŋndo, kɛ́ŋndon a ɲɛm-caan celen lɔɔ, le condun Mɛlɛka-on solio. Poaa Yedutun-nda va kpalilaa cumulaa ladioa ni.

⁴³Mí vannda kpow, vana-vana muungu o ndu lo, mí David bɛɛ muungu o ndu lo le yungu ndɔɔ duaa dɔvɔɔ[28].