Read Kissi 1Dɛnnda lemasalan 17 Bible Online

1Dɛnnda lemasalan 17 - Kissi bible

1Dɛnnda lemasalan 17

¹Lɔ́ɔ́ David cal o cɛi ndɔ lemasaa nin-ndo, mó dimul Natan vana-tɛɛngaa-diom Hala-o aa: «Tofa vɔ, ya i co icali o cɛi tangulun a yɔmii sɛɛdrei-yo nin, mi kesu kpema Mɛlɛka-o ndu va o cɛi-kola-toandaa nin[29].»

²Mí Natan dimul David aa: «Sɔɛi-sɔɛi co nɔm o kɔl, tosa ndi, kani Mɛlɛka co nɔm ikɛi.»

³Icɔl kon kpeekpei, mí Hala soaa o Natan ndo, mó dimul ndu aa:

⁴«Kɔ dimul David vana ni baala aa o co ndu le bɛnda mò tengul-la cɛi ya calnin nin-ndo le.

⁵Kani kandɔɔ o paale ya soli Israɛlla Esipte len háá hau, i cel-lɔ cɛi oo cɛinin te. Kɛ o cɛila-kolala-toandaalan a o Calta Mɛlɛka lan nin tuŋ ya co kelaa ni.

⁶Ba-ba ya co keiyo a Israɛlla o kelaa nin, lepilɛ bɛɛ i dimul-lɔ Masaa kialaa n'yamaa ya kɛsi vanaa nia laci-a, o pilɛ le ya cɛi tengul a yɔmii sɛɛdrei le.»

⁷Lelan, kɔ dimul David vana ni baala aa Mɛlɛka-Nɔ-Kpaayaa-Kpow-vo dimi aa: «Ya kɔ cua nɔm telen n va cɔlua mandaa yondoo nin-ndo ni, mí siinguu nɔm simlacinɔɔ le yungu nuu, Israɛlla pɛɛn.

⁸Nɛɛ-nɛɛ nɔm óò kɔɛ pɛ, i va nɔm ikɛi. Mí diw yaamɔaa nɔmnda kpow nɔm laci. I cii vɛlɛ diola nɔmndan tɔ́ɔ́ soli maa masaa co o lɛŋnden coo-a.

⁹I kenin vanaa nia fondaa le calle, Israɛlla pɛɛn, a venin ndon a isiòòn te. Vanaa vɔɔŋaa kɛ́-kɛ̀ diw lɛnin nda maa paandu le,

¹⁰maa telen yáà suili Masaa kialaa n'yamaa simlacia vanaa nia coo-o, Israɛlla pɛɛn. I toawnin yaamɔaa nɔmnda kpow, mì tengul nɔm cɛiyo[30], ya Mɛlɛka pɛɛn.

¹¹Telen piɔ́m nɔmndo tiiyanin-ndo, i hɛlinin vana pilɛ o poaa nɔmaa kpeekpeiya tɛɛn, mò siŋnun masaa o fonda nɔmndo. I siminin masale ndɔlen yili.

¹²Po kon tengulnin ya cɛiyo, mì ya simi kpɛŋɛ ndɔ lemasaa le lɔ́ɔ́-lɔ́ɔ̀.

¹³I vanin fuɲa ndɔ, mì ndu va po nuu. I faŋanin ndu kɔllo coo mɛɛ yáà faŋa masa va nɔm laci-o[31] kɔllo coo yɛ le.

¹⁴I kɛsinin po nɔm kon masaa le lɔ́ɔ́-lɔ́ɔ̀ o cɛi nuu coo a o masale nilen coo, kani kpaaya ndɔ lemasaa hiilunnin le fɛɛn a fɛɛn te.»

¹⁵Mí Natan tɛɛngul David sɔɔn Mɛlɛka dimul ndu mun o vundulen nin-ndon kpow.

¹⁶O kon mí masaa David kɔa, mó kɔ cal Mɛlɛka o hɔl, mó dimi aa: «Mɛlɛka Hala nuu, nɛ̀ɛ̀ ya co yɛ? Vanaa súú yɛɛ yungu nuu co yɛ vɛlɛ, le ya heeloo háá o fonda ya co hoo-o?

¹⁷Òó Hala, vɛ̀ɛ̀ hoo tiw-vɔ nɔm o hɔl te! Tofa vɔ, a co ciɛ́ɔn cuaa le siɔdii laci yungu vana nɔm baalaa. A co vɛlɛ ya biyɔɔ maa vana bɛndu, nɔm Mɛlɛka Hala nuu!

¹⁸Yɛɛ ya David tiw yɛnin ba le nɔm dimullo handɔɔ o bɛɛle n ke ya len-nden coo? A sina ya, ya vana nɔm baalaa pɛɛn.

¹⁹Éé Mɛlɛka! Le tùú n kaola ya-o n tosa dɛnnda bɛndulan ndan kpow le vanabɛnduyɛi nɔmnde cɔmndo ni.

²⁰Vana-vana co maa nɔm te Mɛlɛka! Mɛɛ naa n dema tueyɔɔ kabi paandu yɛ, Hala celen co le, fɔ nɔm pilɛ kpé.

²¹Nduyɛ, vanaa celen co vɛlɛ o lɛŋnden nden coo maa Israɛlla le. Nɔm kɔ baŋa nda Esiptea o ba ni, má siinguu nda vanaa nɔmnda. Nɔm Hala, a fula tɔ́ɔ́ taw a dɛnnda kɔndɔfiltan a á kaamaala n tosa le vanaa-mangalaa-isɔɔa tovɔɔ vanaa nɔmnda laci lan.

²²Nɔm Mɛlɛka siinguu Israɛlla vanaa nɔmnda le fɛɛn a fɛɛn ni, mí nɔm siŋnun Hala ndaa.

²³Sisa yɛ Mɛlɛka, peelu sɔɛi n dimi a vana nɔm baalaa o kɔɔ-e. Màá ciɛ́i n cua le ya a le yungu nuu-e peelun le fɛɛn a fɛɛn fɔ́!

²⁴Màá kpemaa ho peelun, haliko mi diola nɔmndan la sɔla biiloo lɔ́ɔ́-lɔ́ɔ̀, o kon mì vannda dimi aa: ‹Mɛlɛka-Nɔ-Kpaayaa-Kpow-vo, Hala Israɛlla, ndu co Hala le Israɛlla ni.› Tiinda masalen yungu nuu o ba le lɔ́ɔ́-lɔ́ɔ̀, ya David vana nɔm baala pɛɛn!

²⁵Nduyɛ, nɔm pila dimul ya vana nɔm baalaa ni maa a co ya cɛiyo tengul[32], nɔm Hala nuu pɛɛn! Lelan ya co nɔm o hɔl le nɔm piɛiyo nuaa ni.

²⁶Éé Mɛlɛka! Nɔm co Hala ni, a cii nihau tuu le ya vana nɔm baalaa dɛnɛ kɛndɔɔ tosal-lo!

²⁷Dɔw niko yungu vana nɔm baalaa duaa, haliko mi polale nilen le va masaa nɔm o hɔl le lɔ́ɔ́-lɔ́ɔ̀! Kani ɲɛ nɔm Mɛlɛka dɔw pɛ duaa, o dɔwnun duaa le fɛɛn a fɛɛn.»