Read Kissi 1Dɛnnda lemasalan 18 Bible Online

1Dɛnnda lemasalan 18 - Kissi bible

1Dɛnnda lemasalan 18

¹O kon kɔɔli, mí David nɔla Filistia, mó tuisi nda siɛmbulan. Mó hialu kobio Kat a cieon balu ndu-on.

²Mó nɔla vɛlɛ Moabua, mí nda muungu ndu o ba bɛngu, ma va ndu muloo solullo.

³Tuma Hadadesɛr va masaa Soba-o, o masalen ndɔlen léè tiiya háá Hamat-o va kɔlan a masale ndɔlen pɛngɛlaa o tàndá co Efrate leeloo-o coo-o, mí David cɔlɔba vɛlɛ kon, mó nɔla ndu.

⁴Mi David poonda ɲɛla ɲaanannda ndɔla soa nan-ndan vàá pilɛ, mó bii vanaa ndɔa ɲaanun o soa coo-a vàála ŋɔmmɛw a vanaa cɔvaa n'pelua ndɔa vaalan bidiin, mó mal nda o kaasoo. Mó kili soa nan ɲɛla ɲaananndan-nda kpow tɔndikɔɔlion, fɔ soa kɛmɛ daama o mɛi le ndu pila ni.

⁵Mí Aramiia Damas a hun le Hadadesɛr, masaa Soba cɔwvo malaa, mí David nɔla nda, mó diw vannda vaalan bidiin a latiɔn.

⁶Mí David kɛsi masaa n'bungaa Aramiia Damas coo, má luɛi David o ba bɛngu, má va muloo malɔɔ ndu o ba. Mɛlɛka va David mandaa nɛɛ-nɛɛ o va kɔlan.

⁷Mí David hialu kɔ̀ɔ̀la cɔwla n'sianila va langbaa Hadadesɛr-a o ba lan, mó kɔannun a lan Yerusalɛm.

⁸Mó poondiaa vɛlɛ daɲan va Tibat a Kun-ndon taw, o kobila Hadadesɛr lan nin pɛɛn. Lɔ́ɔ́ levil o kon kɔɔli, mí Salomɔn cua daɲan mun, mó cɔaw kpɛɛnɛi idaɲɛi, sungbuan a ɲɛm-laandon a mun.

⁹Mɛɛ Toou, masaa Hamat tuɛi maa David nɔla vanaa cɔvaa Hadadesɛr masaa Soba-a,

¹⁰mó viam Hadoram po ndɔ o masaa David lo le ndu nuvalio yilɔɔ a ndu lisaa le delɔɔ o del Hadadesɛr kon coo a cɔwvo mó nɔla ndu-o. Kani cɔwvo va Toou nda Hadadesɛr tɛɛn. Mí Toou yɔngu vɛlɛ David taalala kólaala súú-súù ka, taalala kólaala n'sianilan, taalala kólaala n'volilan a taalala kólaala n'daɲalan.

¹¹Mí masaa David kɛsi ɲɛm mun teengen le Mɛlɛka, handɔɔ o volion a sianin ndóò poondiaa vanaa-mangalaa-isɔɔa o ba-on coo, vanaa-mangalaa-isɔɔa kan a yɔŋnun haa ni: Edɔmnda, Moabua, Amɔnnda, Filistia a Amalɛkea.

¹²Mí Abisai, po Seruya-o diw Edɔmnda vaalan tɔ́ a laŋɔmaa o Ból Ihɛllo nin.

¹³Mó kɛsi masaa n'bungaa Edɔmnda coo, mí Edɔmnda kpow a luɛi David o ba bɛngu. Mɛlɛka va David mandaa nɛɛ-nɛɛ o va kɔlan.

¹⁴Mí David tosa masalen o lɛŋnde Israɛl-ten kpow coo. O va yaman vannda kpow kiolɔɔ o sandei nin, o ve nda hiyan tosa tɛɛn te.

¹⁵Yoab, po Seruya-o va vanaa cɔwva bollen ni, Yosafat po Ahilud-o va vana yondaa masaa[33] ni.

¹⁶Sadɔk po Ahitub-o a Abimelɛk po Abiatar-o a va vanaa-solia-lasálàá ni. Savesa va vana sɛvaa ni.

¹⁷Benaya po Yehoyada-o va simlacinɔɔ Keretiia a Peletiia coo n. Poaa David-a a va vanaa tase-a le vaa masaa ikɛi ni.