Read Kissi 1Dɛnnda lemasalan 19 Bible Online

1Dɛnnda lemasalan 19 - Kissi bible

1Dɛnnda lemasalan 19

¹Telen pum hiovɔɔ, mí Nahas, masa Amɔnnda vu, mí Hanun po ndɔ koma sul masaa o fonda ndɔɔ.

²Mí David yiyan mó dimi aa: «I yeema mi tosal Hanun, po Nahas-o dɛnɛ kɛndɔɔ, kani lende fuɲa ndɔ tosal-la ni.» Mí David viam vannda o Hanun ndo, le ndu ɲɔɔlu biisi fuɲa ndɔ-o. Lɔ́ɔ́ vanaa bɛndua va David o ba bɛngu-a tiiya o Hanun-ndo, o lɛŋnde Amɔnnda nin-ndo,

³mí simlacia Amɔnnda dimul Hanun aa: «Nɔm ca ko aa le yilɔɔ biisio daama David vem vanaa bɛndua co ndu o ba bɛngu-a nuaa ni? A ca ko aa o co suansuaanda le o vem nuaa le hunɔɔ lɛŋnden mɛɛndianndo, le len sinaa a le hunɔɔ len tɛɛmbuuo ɲin pum te?»

⁴O kon mí Hanun viam vannda, má kɔ bii vanaa bɛndua David ndóò vem kan-nda, má sendi nda siaiyon, má kili nda volɔɔlan lekɔɔ pɛɛngu yɔŋnda tumndan, má toaw nda.

⁵Mí vanndo hun, mó dimul David ɲɛ yɔŋnun vanaa bɛndua va ndu o ba bɛngu-a-o. Mí David viam kiilaa le nda kɔlan bɔŋaa, kani siɛmbulan la va nda taw. Má kɔ dimul nda aa: «La kɔ cal pɔɔ Yeriko háá mì siayun niaan vil malan niaa muungu nanu.»

⁶O dɛnɛ kon nin, mí Amɔnnda sina maa a tɛɛmbuu David kɔllo. Le hee, mí Hanun nda Amɔnnda piandu ɲɛla ɲaanannda soa nan-ndan, vanaa ɲaanun o soa coo-a, Aramiia Mesopotamii a Aramiia Maaka a haa Soba o ba, a volion kilolan vaalan beleyaa.

⁷Má sɔla ɲɛla ɲaanannda soa nan-ndan vaalan beleyaa a latiɔn, má handun vɛlɛ masa fula Maaka-o a vanaa ndɔa coo, mí nda hun kɛsi dɔ́ɔ́ngɔ́ ndaa Medeba ciee-lekɔɔ. Mí Amɔnnda cuungian o kobila ndalan nin, má fula le kɔlan cɔwvo.

⁸David tueyɔɔ dɔ́ɔ́ sɔɛi ken, mó viam Yoab bolle vanaa cɔwva kpow.

⁹Mí Amɔnnda fula, má bɛɛndiaa simndan le cɔwvo o kobio sondoo. Mí masaa hin le nda cɔwvo malaa-a nda sim kpengii celen o pollo coo.

¹⁰Mí Yoab ca maa kundalan tan tiɔn la va nda hinullo ni: ndu laci a ndu kɔɔli. O kon mó hɛli vanaa cɔvaa kɛndɛ-kɛndɛa Israɛlla tɛɛn, mó simi nda a kpengii Aramiia.

¹¹Mó simi Abisai puapilɛ ndɔ vanaa cɔvaa tɔ̀a laci a kpengii Amɔnnda.

¹²Mí Yoab dimul puapilɛ ndɔɔ aa: «Te Aramiia va pɛ le ya nɔla, a hun mala ya, te nɔm Amɔnnda va yɛ le nɔlaa ni, i kɔ mala nɔm.

¹³Veesiaa hɔlla ma sim yili, n tosa cɔwvo a dialun fulan le vanaa naa a le kobila Hala naa. O kon mì Mɛlɛka tosa mɛɛ hɛnan ndɔɔ co yɛ.»

¹⁴Mí Yoab sɔɔnguu nda vanaa ndɔa cɔwva le Aramiia delɔɔ coo, mí Aramiia ɲaanun ndu.

¹⁵Tuma Amɔnnda ce maa Aramiia ɲaanun-ndo, mí nda bɛɛ ɲaanun Abisai puapilɛ Yoab-o, má kɔa o kobi ndaa nin. O kon mí Yoab muungu Yerusalɛm.

¹⁶Lɔ́ɔ́ Aramiia ce maa Israɛlla nɔla nda-o, má viam kiilaa le caaŋaa ndaa Aramiaa va peo leeloo-a veeloo, Sofak simlacinɔ vanaa cɔvaa Hadadesɛr-a va nda bollen ni.

¹⁷Má dimul David sɔɛi ken, mó cuungiaa vanaa cɔvaa Israɛlla kpow, mó taŋ peo Yurdɛn, mó kɔ tisa nda coo, mó kɔ sim polama ndan kpɛɛlan. Mí David bɛɛndian le Aramiia delɔɔ coo a cɔwvo. Mí Aramiia ciŋilan ndu a cɔwvo.

¹⁸Kɛ mí Aramiia ɲaanun Israɛlla, mí David nda vanaa ndɔa cɔwva diw vanaa ɲaanun ɲɛla ɲaanannda soa nan-ndan-nda vàálan tan ŋɔmmɛw a vanaa cɔvaa n'pelua vaalan belehiɔɔlu. Má dii vɛlɛ Sofak simlacinɔ vanaa cɔwva.

¹⁹Lɔ́ɔ́ langbaa Hadadesɛr-a ce maa Israɛlla cii nda nɔla-o, má nuwviaa kɔlɲuloo David o ba, má luɛi ndu o ba bɛngu. Kandɔɔ ɲinkon, Aramiia cɛl-lɛ le Amɔnnda malaa le few.