Read Kissi 1Dɛnnda lemasalan 20 Bible Online

1Dɛnnda lemasalan 20 - Kissi bible

1Dɛnnda lemasalan 20

¹O vɔsi kon kɔɔli, telen masaa dema fula le kɔlan cɔwvo tosaa-o tiiyaa, mí Yoab sim vanaa cɔwva sɛ́lɛ́ bɛndoo laci. Mó kɔ tɛɛmbuu lɛŋnde Amɔnnda, mó bii kobio Raba. Kɛ mí David ndu lonnun Yerusalɛm.

²Mí David sungu mɔsil lemasaa va Milkɔm, piɔm Amɔnnda o lebol-lo, lusul mɔsil kon ndóò hiow le kilolan beleyaa. Powta báà kalalan ndáà holi ndu ni. Má vow David ndu o lebol. Mí David poonda vɛlɛ bolofaa taw o kobi kon nin.

³Mó biw vanaa va icali o kobi kon nin-nda, mó siinguu nda vanaa tɛɛndiaa iyɔmnda, vanaa sialaa lapowva a vanaa kilia iyɔmnda, mó tosa ɲɛ pilɛ kon o kobila Amɔnnda nin kpow. O kon kɔɔli, mí David a vanaa ndɔa cɔwva kpow a muungun Yerusalɛm.

⁴Mí cɔwvo del Israɛlla nda Filistia tɛɛn Kesɛr, mí Sibekai fula Husa-o dii Sipai. Sibekai kon va vana pilɛ o poaa Refaim-nda tɛɛn. Le hee, mí Filistia vu diallon.

⁵Mí cɔw celen tosan vɛlɛ Filistia coo. O cɔw kon nin, mí Ɛlhanan po Yair-o dii Lami fula Kat-o, puapilɛ Koliat-o o va ni. Ndóò nɔ bállo, piaw ndɔɔ celullo pikii nda simbulu kola lɔaa-e.

⁶Mí cɔw celen del vɛlɛ Kat. O cɔw kon nin, langbanɔ vilɛi pilɛ va lon, ndóò nɔ suon bidiin a n'hiɔɔlu: o ba kɛ́-kɛ̀ suon ŋɔmpum, o pelii kɛ́-kɛ̀ suon ŋɔmpum. Ndu bɛɛ po Rafa-o o pilɛ o va ni.

⁷Mó tɛɛndan Israɛlla, kɛ mí Yonatan po Simea, puapilɛ David-o dii ndu.

⁸Poaa Rafa fula Kat-o-a vanaa cɔvaa Filistia kan va ni. Nda kpow David a vanaa ndɔa cɔwva a dii ni.